السلام عليكم بنات حواء طبعا نحن العرب معروفين وكل بلاد ليها مميزات من الشعر وخصايصه وانا من جهتي حبيت انعرفكم عن الشعر في بلادي الحبيبه الجماهيريه العظمى من خلال ابيات شعر فكاهي حدت في حادت سير بين شاب وشايب او رجل عجوز والعجوز دخل في العمود الكهرباء المهم بعد انتهاء الحادت جي رجل المرور للتحقيق تابعوووووو
رجل المرور
شن دارلك يا حاج البالو هو قطع قدامك ولا بروحك جيته
امبارك اكيد شبحته واقف متيل الصقر ماد اجنحته
مصبي مع خوته قباله تحته القطران زاهي ضاويه حاشيته
العجوز
ماهو مني ماشي بكرهبتي وانا متهني
فاتح المجعاوي حداي يغني ماسك ايميني واليسار عطيته
منندري علي وراي طعني عزقني علي هالبالو قليته
لا سكرت لاني جايه متعني تحرم عليا حجتي ماريته
شرطي المرور للشاب
ياشاب جاي تعالى اعطيني اوراقك كل شي قباله
شن جيبك للحاج تخبطهاله لين انعزق علي البالو خليته
انت اللي غلطان حسب اقواله بخرخاشتك من لاورا قبيته
رد الشاب
كف ملامي ماني اللي غلطان غير اقسامي
سي الحاج شد فرينو قدامي ونا يا دوبني بالطارقه حفيته
تلكمس تلفتلي مشي متعامي طلع من الطريق وصار هاللي ريته
وتوا يعني الان نشوفو معاني الكلمات
شن دارلك معنها مادا فعل لك
مصبي معناها واقف
البالو عمود الكهرباء
انعزق ارتمى عليه
المجعاوي حادي يقصد فنان اسمهم المجعاوي يغني جنبه في السياره مش جالس بس في مسجل السياره
مانندري منعرفش او ما نعلمش
متعني تعني بالقصد ويقصد هنا انه ماجاش للبالو قصدا
ماريته ماشفتاوش
بخرخاشتك السياره الخرابه الرابش او اللي معندهاش حيل
فرينو الفرامل
الطارقه لوحه ارقام السياره
حفيته لمسته لمسه بسيطه
تلكمس تلخبط
تلفت التفتلي
نستنى في ردودكم و***** الله تعجبكم ولو مفهمتوش ممكن تسالو
يلزم عليك تسجيل الدخول أولًا لكتابة تعليق.
خليك أول من تشارك برأيها 💁🏻♀️