والله يا بنات انتو بتحمسوني اكتر ..
وشكرا لكل الي تبغى تغير من نفسها وبيتها
ان الله لت يغير ما بقوم حتى يغيرو ما بأنفسهم

اليوم اول ليا ابات في الشقه الحمد لله
الله يرزقنا ويرزقك
م بيت البيت الملك الي تقدرو تاخدو راحتكم فيه اكتر وتزبط الأمور أكتر ..
طب هادي الشقه لسه أجار ..

لا تشوفو البيت من الكراتين صح صار في دعسه انو الواحد يقدر يمشي ..
امس في الليل جيت الشقه وكنست الصاله الصاله والممر والمدخل ومسحتهم ورتبتهم
اسمنو لمن الواحد يدخل البيت يقدر يمشي ويشوف طريقو ويتشجع انو يكمل وترتاح نفسيتو
بس لاحد يدخل عندي الغرف راح يولول
المطبخ كلوووووو كرااااتين رغم أني رصيت الكراتين بس مشا الله فل الفل مافي دعسه
هههههههه الله يستر ويعين
ولا غرفة النوم هههاااااي
طبعا عشان رتبتها نوعا ما بقي بس اشيا التسريحه والكمدينو والبترينه لسه ما حطيتها بالمعنى الأصح بس حطيت اشيا السرير حقت النوم هههههه طبعا الكراتين دائر مايدور على السرير يعني حوالين السرير الكراتين لان الغرفه صغيره وعملت ممر مافيه كراتين بحيث الواحد يوصل للسرير هههه اقلكم
الغرفه التانيه شو بدي احكي لأحكي
كل أبوها كراتين ومقفول الباب لانو من جد مافي دعسه فيها كراتين الصاله وكراتين المكتبه وفوق هادا كراتين غرفة الملابس
والصالون فيه كراتين زوجي والتحف والنجف طبعا دا لسه ما اتركب وكمان دولاب الصاله حق التلفزيون ودي الاشيا ولسه ما اتركبت طبعا
زوجي مستعجل يبا يستتب بسرعه ..

انا طبعا دوبي صاحيه وبحكيكم ههههه
طيب حنام ساعه او اكتر ههههه بحكم الصيام وتعب النقل والشغل امس والنوم المتاخر
المهم ممكن اصحى ١١ مع ولدي ان شا الله
فراح أمسك كراتين غرفة النوم لانها الأهم
احاول اخلصها ان شا الله قبل الساعه ٢ ونص لان زوجي راح يرجع ٣ .

يلا حبوبات الي مهي تعبانه تتنشط كده وتأخذ شغله خفيفه عشان الصيام وما نبغى نبذل مجهود كتير والي تعبانه افضل تريح لانو التعب النفسي يولد تعب جسدي والعكس أيضاً

طبعا انا الإتنين الحمد لله على كل حال ..

الله يهدي ويصفي الأمور بين المتزوجين ويهدينا ويهدي رجالنا بحق دا اليوم الفضيل ..
ويارب اي وحده ما اتزوجت يارب ترزقها بزوج الحلال الي يخاف الله وبار بأهلو عشان الي يكون بار بأهلو فحياته راح تكون هانئه بإذن الله
والله يشفي اطفالنا وأي وحده اذا ربنا ما رزقها اطفال ألزمي الإستغفار وخلي إيمانك بالله قوي قوي واحسني الظن بالله واشربي زمزم بنيه الشفاء واقري عليها وعلى بطنك واقري سورة مريم وفي ادعيه كثير قوليها وقولي كمان ربي لاتذرني فردا وانت ارحم الراحمين
وقولي بدايه السوره بس ما افتكر اسمها بس اقتباس
ربي أني خفت الموالي من ورائي وكانت امرائتي عاقرا فهب لي من لدنك ولياً يرث مي ويرث من ال يعقوب واجعله ربي رضيا

اعتقد بدايه سورة مريم فإن أصبت فمن الله وان اخطأت فمن الشيطان ..

يلا صياما مقبولا بإذن الله ..
ولا تنسو تعملو عاشوريه لانها تمد بالطاقه
لكل الي ما تعرفها هيا عباره عن حليب وبليله وفاصوليا ابيض وشويه جريش وزبيب وجوز وقرفه وهيل وفي شي تاني بس مني فاكره ايش
زي الرز صغير ويتعمل زي الشربه بس اثخن قليلا .. طبعا مع أضافه السكر وما الورد

يلا شهيتكم من الصباح ..
بس اعمل ايش الجوع عاوز خفيه ههه

يرثي ويرث من ال يعقوب *
معليش كان في خطا إملائي

مانمت يا صبايا ��

ماجاني نوم قمت رحت رصيت اشيا التسريحه والكمدينو والبترينه بس طبعا موكلها بس باين انو قطعت شوط لانو خفت كميه الكراتين صار في محل الواحد يتجول قليلا فقط بضع خطوات في الغرفه هههههههه
طبعا قلت أسوي الغرفه الين انعس

وانا دحين جدااا نعسانه ..
تعرفو لمن تكونو نايمين غلط شفتو كيف الضهر يوجع انا كنت نايمه معكوفه يعني مو محنيه ضهري لا محني بالعكس يعني مو زي الركوع شفتو الضهر ماني انا بالعكس وذراعي كانت ملويه ههههه لحد يشوفني يضحك عليا ������


الي ينام جنبها طفل في عمر السنه تحس بوضعي لانو مشا الله الاطفال يتحركوووو وانتي وتحريك لا إراديا .. فجأه تلاقي نفسك في الارض
��������



يلا تصبحون على خير ان شا الله حصحى على ١٢ واشوف ايش ممكن اعمل ..

عودتي بكره مثل هذا الوقت ❤️❤️❤️


يلا استودعتكم في يد الرحمن

بنات ابغى اشوف حماسكم وتعليقاتكم
والي تحب تضيف اشياء تتفضل ان كان نصائح او أساليب التنضيف او حتى افكار تشجيع
معليش يا بنات مافي صور عشان اللاب حقي خربان وانا ادخل من الجوال ..

يلا بنات يا حوائيات الي تحب تحط يومياتها مرحباااابها والله منها نشجع بعض ونحمس بعض ..

ماشاء الله قمة النشاااط ربي يبااارك فيك ويبلغك منااااك ويحفظ زوجك وولدك وكل عزيز على قلبك ..