مبـــــــــــــــــــــــــروك عليكم كلكم الملف حبايب قلبي..
بجد لكم وحشه ...
والف شكر لكل من سال عني ...وشكر خاص الى ماما ام جمانه واقول فيك الخير ..
والسبب في غيابي النت كان مقطوع ...والله ان البيت من دون النت ملل ..
ويالله يوم سدد زوجي و دق علي يقول الف مبروك رجع النت حسيت بانتعاش ..

بنـــــــــــــــات ببكي ياليت انا قريب منكم عشان اجتمع معكم و اشوفكم ...يارب متى ارجع السعوديه ...

الفراشه ام محمد
سلامته حمودي ياعمري طولت الصخونه معه الله يشفيه يارب
وبالنسبه ليوم العزيمه كانت جمونه مبسوووووووووطه مره لان كان فيه صغار معها وبس تمشي في البيت رايحه جايه وانا على اعصابي اخاف تطيح او تتعور لكن الحمدلله عدت على خير

ام رسيل زواج الاثنين غريبه قولي الثلاثاء ممكن لكن الاثنين؟؟؟؟؟؟؟؟؟
والله حركه!!!!!!!!!!!!

دموع الحنين حياك الله معنا
وياحليله ولدك حركات ماشاءالله
انا بنتي اول ماتسمع انشوده او قران الله يصلحها على طول رقص بالراس اللي يشوفها يقول شعرها طويل على هالهز خخخخخخخخ ياعمري بنتي شعر ولد تقريبا ..........
ماقلتي لنا كم عندك وكم اعمارهم الله يخليهم لك
احس انك صغيره مدري ليه............

انوار لا ماعليها ان شاء الله بس ترى هو ثقيل شوي بس عااااااادي كثير اطفال ياكلونه لاتخافين ياقلبي

ام نفل هلا والله هلا ببنيتي وشلونك ووشلون بنتك ( افا صرت جده وانا توي في العشرينات )

والله اشغلتيني عليك ومن اليوم ورايح ابي رقم جوالك اتذكر كان عندي لكن يوم غيرت جهازي طاااااار الرقم بس تكفين ابيه ضروري ...........

بنات ترى من الحين انا بقول لكم بالنسبه للطلعه انا بحاول قد مااقدر اطلع لكن من الحين اعذروني لو صارت الظروف اقوى مني وجا الرفض من غيري والله والله والله اني اتمنى الساعه اللي اشوفكم فيها لكن ان شاءالله بتحقق عن قريب عندي امل هالمره .........
بنات تعالوا لي وتخيلوا انكم جايين للبراجون وش بيضر تكفون كله واحد المهم نجتمع ........

ام شهد وين الناس ياخاله وش دعوى ماعاد نشوفك حتى عالمسنجر؟؟؟؟؟؟؟
الظاهر الحرمه طلعت من النفاس وطارت بالعجه خخخخخخخخخخخخخ
بس لا توها ماكملت شهر للحين غريبه هالاختفاء
بس بنات لاتخافون تراها بخير البارح ارسلت لها مسج وقالت ان بنتها تصيح على رجولها الله يعينها يارب.........

صباح الخير علي اللي فاهمين غلط

ام منوه الله يسعد قلبك ضحكتيني من قلبي انا والله ابغي نتقابل

كلنا في اي مكان اهم شئ نجتمع

ام رسيل ياقلبي ماتحلا الجمعه الا بمديرتنا الفاظله

لازم انتي علي راس الحضور بس والله مادريت انكم تبغون نجتمع

بس يالله حددوا وعلشان خاطر ام غلا نحطها وسط الاسبوع وبعد

احلا علشان مايكون فيه زحمه وناخذ راحتنا احنا وعيالنا

ام نفل مرحبا الف وحشتينا موت والله الملف مايحلا الابطلتك

الحلوه ولاتهونون يابنات بس عاد ام نفل لها مكانه من ريحة

الحبايب

ام غلا بغتينا نصير شماته للبنات بغيتنا نروح وننطرد:hahaha: خخخخخ

مايسوي علينا بعيالنا وزمازم القهوه <<<< ام هلال ماتصبر

من القهوه

اقول لا تهوجسين من الفش فاش ماشاء الله بنتي تاكل كل شئ

مع اخوانها تعودت علي قولة ابوها يقول ما احس عندي بنت

احس ان عندي ثلاثه اولاد تقلد اخوانها في كل شئ البارح

عند صديقتي تضرب الاولاد وهم اكبر منها قشلتني واذا غفلنا

عنها راحت علي البراده وتفك المويه والله يصلحهم

خلوووود لاتقولين عن الشعور شئ بنتي شعرها قليل وطاير

في الهواء يضحك شكله وانتي تدللي وش المكان اللي يناسبك

علشان نجتمع بس علموني قبلها بكم يوم علشان انسق مع شفتات

زوجي ويويلكم لو ماتجون اذا وعدتوني تروا انا اصدق واروح

علي طول تعرفون ام هلال عجله تلقط العبايه وتحط رجلها

دموع الحنين بنتي تحب تلبس اكسسواراتي تفتح ادراجي وتاخذ

شنطه وتمر تسلم علينا تقلد الحريم فديت قلبها

الفراشه اريج طيبه الحمدلله واخوانها تمام انا استخدم بامبرز

هي اللي ناسبت بنتي

واخيرا لاتنسون ختام الصفحه

( اللهم اعنا علي شكرك وذكرك وحسن عبادتك)

صباح الخير على أحلى بنات
كيفكم إن شاء الله بخير
خلود الرياض كيفك وأخبار بنتك أجل ما شاء الله عليها رقص أنا ولدي مثلهابس الله يصلحه حتى الأذان لو يسمعه يرقص
أنا عندي غيره إثنين يدرسون بنت في ثاني والولد في أول
والله صادقه ياحبيلك توني صغيره بس أخاف أكون أكبر وحده فيكم :22: عمري <<<الحريم مايطيقون هالكلمه(27)سنه متزوجه وأنا صغيره
حتى زوجي بعدأكبر مني بثلاث سنين بس

==========================================

أنوار العمر كيفك حبيبتي وأخبار بنتك تمام
لاتخافين عليها عادي أنا ولدي ياكل البفك معودينه إخوانه يعطونه بس يمكن هي مابعد تعودت عليه ويمكن بعد عمتها الله يهديها مكثره لها
بس لا تخافين عليها
الله يطمنك يارب
=======================================

فنه ماشاء الله ياحليلها بنتك بسم الله عليها الله يخليها لك
كم عمرها يسلم قلبها
أجل مدامها بنت بعد أولاد أكيد شعور ثاني قريبتي جتها بنت من بعد أولاد طايره فيها الله يخليها لها
=============================================

بالنسبه للحفاض وإنتم بكرامه ماناسب ولدي غير هجيز بس الأوربي مو الوطني مع إنه غالي بس وش أسوي ماناسبه إلا هو بامبرز سبب له طفح والأنواع الثانيه خياس :eek: ماتنفع أبدونتم قلولنا وش تستخدمون علشان نستفيد

=======================================

أم رسيل مدري وينها مختفيه:( عسى المانع خير ياليت احد يطمنا عليها
=======================================

بنات بما إن بعضنا من زمان عنكم وش رايكم كل وحده تكتب لنا نبذه مختصره عنها بس علشان نمشي معكم مظبوط:)
أنا طبعا إسمي السابق((في))والحالي ((دموع الحنين))
طبعا في البيت :( لأني ماحصلت وظيفه مالقيت إلا في بنك بس زوجي:arb: رافض الفكره يقول متى بتجلسين مع عيالك
عندي ولدين وبنت البنت في ثاني والولد في أول والصغير القعده عمره سنه وثلاث شهور تقريبا وبس
ونتم يابنات الدور عليكم
علشان نتعرف أكثر وإلي ناسيه تتذكر وإلي من زمان عنكم تتعرف عليكم أكثر
يالله من أول وحده

=============================================

بس بنات ممكن ترا مأكون معكم هالويكند لأني بفرمت جهازي ومدري متى بيخلص لأنه تاعبني بفرمته وبسويله برامج وحوسه يعني ممكن ما أشوفكم إلا السبت
يالله كل وحده تسلملي على نفسها

وإيه قبل لأنسى لي ملف لبنات الرياض إلي تبي تزورني الله يحييها تلقونه في توقيعي:26:

الي العضوات العزيزات ...

تحيه طيبه و بعد....
لقد تقرر بعد البحث عن افضل طريقه لبقاء التجمعات ... و استنادا لما حدث مع زملائنا فى قسم الحمل .. تقرر اقتصار التجمعات على مايلي.
ملف من الولاده الي3 اشهر
ملف من 3 اشهر الي6 أشهر
ملف من 6 اشهر الي سنه و نص
ملف ما فوق السنتين


فمن تجد فى نفسها الرغبه لكي تكون مسؤؤله عن اي من هذه الملفات الرجاء مراسلتي و سيكون الملف مسئوليه اول اسم يصلني بهذا الخصوص و تكون المسئوليه فيه ان تحافظ صاحبته على كيان الملف و ذلك عن طريق المناقشات المفيده و ليس الدردشه التي لا تفيد و لا تنقص ... و عليها ابلاغ المشرفات عن اي مشاركه سيئه ... و ايضا مسئوليتها ابلاغنا عند وصول الملف الي 500 مشاركه لأغلاقه و فتح ملف جديد و يمكنها ايضا طرح اسم اخر يكون مسئول عن الملف الجديد عندما يصل طفلها الي الملف الثاني ....

مشرفات قسم الحياة الأسريه