شهـــر العســل وبلاويـــه
-------------------------------------------------------------------------------
عندما تشرق شمص الصباح معلنة صباح يوم جديد <<< اقول انطم وبلا فلسفه
ليه يمه تبيني اعرس وش انا مسوي لتس يومتس شابتن علي بالعرس كل يوم والثاني
اقول انطم بس وانت اللي يسمعك يقول وش هالبنت اللي بيزوجونها اهلها على واحد شايب وكاش ... ترا يالثور طولتها وكل يوم مسفرين شغاله عشانك مغير ماورانا شغله الا نراقبك ونلاحقك بتالي هالليول وانت راقي لغرفتها
يابنت الحلال وش شغالته بعد ؟؟ وراكم تفهمون غلط انتم ؟؟ وشفيها يعني اذا رقيت للسطح اشم شوي هواء وبعدين قايل لكم الغرفه اللي جنب غرفتي فاضيه ورا ماتحطون الشغاله فيها ؟؟ ترا والله منيب زعلان لو تسونونها
ولا امدى محمد يكمل كلامه الا امه لافخته بالملاس اللي كان بيدها
وفي الليل وكالعاده كانت ام محمد بغرفتها وفاتحه باب الغرفه عشان تتابع تحركات هالخبل محمد اللي ماينضمن يحطونه حتى مع نيجيريات بالعقد السادس من اعمارهن
ماش ... ماصبرت ام محمد وراحت لمحمد بغرفته وبعد ماطقت باب الغرفه سمعت صوت تخبيط وشي يطيح بالغرفه ومحمد يقول لحظه لحظه يمه ابلبس ثيابي
الام طبعا شكت بالموضوع وترجف الباب برجلها وتدخل الغرفه والحمدلله مافيه الا محمد اللي لونه متغير وياكل علك
طبعا العلك ماجا من فراغ وكان الغرض منه انه يغطي على ريحة الدخان اللي كان يكلخ منه طول الليل
الام سوت نفسها ماشمت شي وان الوضع عادي لانها عارفه هالثور اذا عرف ان امه درت انه يدخن صدقوني من بكره يصك الزقاره قدامها الشين
قالت له امه وش رايك بنوره بنت خالك ناصر ??? والله انها سنعه ومهنا ازين منها والبنت حبيبه ومثقفه ومتخرجه من الساته << يعني من سادس ابتدائي وراعية بيت وتحبك
طيب يمه انا عشانتس ابوافق بس لانتس اشغلتيني وانتي تقولين ابشوف عيالك قبل لااموت ... لكن ابي وحده زينه يمه وطويله وبيضا ... يمه انا ابي احسن نسلي يكفي الشين اللي فيني تبين عيالي يطلعون شيون بعد
شف وانا امك ترا نوره ايه بالجمال طويله وبيضا وشعرها طويل ولاهيب عصلا مصلا الا مربربه كنها اللي لابستن اصفر وترقص في اغنيه البرتقاله وماتفرق عنها الا ان نوره ازين <<< عارفتن له امه
خلاص يمه وترا مهوب عشانها تشبه ام اصفر ابوافق لا يمه انا ابوافق عشان تحسين بأنوثتك وكيانك <<< سكتوه تكفون
وفعلا كلها كم يوم وتمت الخطبه وتملكوا ومابقى الا يومين على زواجهم الميمون
يمه قولي لنورة تعطيتس صورتين لها عشان اطلع لها جواز
هاااااو وانا امك وراه ؟؟ عسى ماصار بعد الزوجه يطلعون لها اقامه مثل الشغالات <<< على نياتها مسيكينه
لحوووووول ... وش خلاني اصير ولد هالقرويه يايمه انا ابي اطلع لها جواز عشان نسافر في شهر العسل لأسبانيا
طيب وانا امك اسبانيه هذي تراها بعيده وطريقه كله بعارين ومايمدحونه ابد انا اقول رح خذلك عمره وبعدها تسدحوا بالطايف بهالبراد يالله من فضلك
وبعد كم صوره جابتها امه من نوره وترجعها لانها مره مصوره وهي ماسكه ورد ومره مصوره عند سيارة ابوها ومره صورتها وهي في الملاهي تلعب سيارات تصادم
طلع الجواز له ولنوره وعلى فكره ترا محمد ماعمره سافر وابعد شي راح له هي مزرعة جده اللي تبعد عن الرياض ميتين كيلوا
تم الزواج والامور زينه وفعلا صارت تشبه ام اصفر اللي بالبرتقاله لكن من بعيد بس والا اذا قربت صارت الخالق الناطق باسكال عجرم << يمديكم على الثقافه الفنيه
عاد انواع الاحراج بأول ليله من زواجهم وهالخبل جايب معه بلاي ستيشن بالفندق واول ماغير ملابسه قال تعالي باريني واللي يفوز يطلب من المهزوم طلب وينفذه
مغصها بطنها نوره ودرت وش هو ناوي عليه وقالت ان تسانك صادق جب الكيرم وتحداني
عاد ماعلينا منهم وش صار بينهم .. ياحبكم للقافه بعد انتم المهم انهم صحوا الصباح والميانه طايحه بينهم لدرجه ان نوره مصحيه محمد بكاس مويه صابته عليه وهو نايم وش تبون بعد اكثر من كذا ميانه
بالليل موعد سفرتهم ومحمد ونوره مجهزين شناطهم وطبعا محمد لاعبن عليها ومسوي نفسه انه راعي سفريات وانه يعرف انقليزي وانهم كذا مره عرضوا عليه وظيفة مترجم افلام امريكيه
اقلعت الطياره ونوره المسيكينه متجوده بيدين محمد وتتنافض من الخوف ومحمد اردى شوي ويصبصب عرق لكن مسوي نفسه مااهتم
شوي وبدت ترج الطياره ونوره اغمى عليها الا شوي ومن الروعه قامت تتشهد : ووش وش فيهم يامحمد؟؟ ورا الطياره ترج ؟؟
ابد ياحبيبتي بس يمكن البنزين فاضي لكن لاتخافين انا خابر ان فيه محطه بعد عشرين كيلوا عساهم يعبون منها لأن هالمحطه كل عشره ريال تعبي فيها يعطونك علبة مناديل عاد تعرفين طياره ويالله عاد عليك الحساب .. الله من عشره وعشره بتروح .. الظاهر بيعطوننا كرتون مناديل
وصلوا لاسبانيا وركبوا التكسي ومحمد ياعزتي له يدربي رويسه ويحتسي حتسي(ن) مهوب لم سنع يعني لاهو انقليزي ولاهو عربي ويالله وبالله راعي التكسي والظاهر ان اصله لبناني عرف ان محمد يبي فندق والا وش هاللي يقاله يعرف انقليزي ويقول ياصديق انتا ودي انا غرفه انا يبغى نوم انا يجي من رياض كتير تعبان انا
ووصلوا للفندق وزانت امورهم وخذوا لهم جناح وش زينه << تحسون ان ام محمد هي اللي تسولف عليكم صح
عاد وش يصير بتالي هالليول بينهم والله لو تنقزون ماعلمتكم
قاموا الصباح وينقز محمد ونوره بيحللون العرض حق الاوتيل لان الاقامه فيه مع وجبه الفطور
افطروا واستانسوا وطلعوا يتمشون بعد الفطور
عاد من زود الدجه اللي براس محمد يتمشى حول الاوتيل يخاف يضيع وينصب على نوره ويقول هذي افضل منطقه بأسبانيا والا باقي المناطق كلها تفحيط وعصابات
وش حليلهم كأنهم عصافير يناقزون من محل لمحل وشروا بعض الاغراض وبعض الهدايا لاهلم ... ياحبي لها نوره داخله محل تقول يامحمد اسأله ان تسان عندهم سجادات وجلال صلاة نسيت اجيب معي سجادة وجلال
رجعوا للأوتيل وتروشوا وتسدحوا قدام التلفزيون الين قال الله اكبر العشاء طبعا بتقولون وشلون يأذن عندهم ابقولكم عادي جايبين معهم ساعة العصر
صلوا العشا ونزلوا يتعشون وكان محمد وهم يتمشون العصر حول الفندق شايف مطعم بطريقهم وكان مخطط يتعشى فيه
دخلوا المطعم وجلسوا بطاوله صاده شوي << عشان ياخذون راحتهم
والمطعم كان فخم واضاءته هاديه وبكل طاوله شمعه وورده حمرا يعني هالمطعم مايدخله الا الرومانسيين ومحمد ونوره طبعا مهوب قليلين شر وفيهم حقهم من الرومانسيه
نوره : الله يخليك لي يامحمد والله ان المطعم وش زينه يجنن صح ان لمباتهم شويه بس ازين كذا وازين شي اعجبني طرابيزاتهم <<< اللي فيه ربو لايقرا هالكلمه
الله يسلمك يانوره انا اصلا كل شي اسويه ترا عشانتس الله لايحرمني منتس ياحبيبتي
وقف عندهم الويتر وعطاهم المنيو عشان يطلبون عشاهم ومحمد الله يخلف عاد مهناش بالانقليزي ونوره اردى شوي واطلق شي تعرف تقوله بالانقلش : تشيز برقر لا واذا قالته جلست لها يومين ماتكلم احد من زود الغرور
محمد حس انه تأخر على الويتر وبدأ يأشر على الصور اللي بالمنيو وهو طبعا مسوي نفسه عارف وش هو يطلب
جاء العشا وطبعا كله من مشتقات المكرونه والسلطات يقول محمد انها اضمن عشان يخاف يكون لحمهم لحم خنزير
وكلوا وانبسطوا من هالمكرونات والسلطات يوم خلصوا متعشين ويجي الويتر ويضف صحونه وجاب منيو بالعصيرات الموجوده ويأشر مثل العاده محمد على نوع فيه من كوكتيلنا اللي حنا خابرين
المشكله ان العصير اللي طلبه محمد هو عباره عن كوكتيل من اقوا انواع الخمور تركيز ومايشربه الا ناس ماتصحى ابد من الخمر الله يكفينا الشر يعني مفعوله قووووي
وجاء عصيرهم وشربوا المعاريس منه .... لا .. ونوره تقول وش زينه هالعصير ياليت من ياخذ جيك من هالعصير يذوقه امي وخالتي
خلصوا كاساتهم حتى قطع البرتقال اللي بطرف الكاس كلوها وامورهم الا الحين زينه
شوي وتمسك نوره يدين محمد وتقول ياحبي لك يامحمد والله انك كويس وودي اكلك ياملحك <<< بدأ المفعول
شوي وبدت الخنبقه بالسوالف وبدأ يطلع حتسي(ن) ماله سنع ابد وقام محمد يطلع سوالف من ايام بيتهم اللي بالشميسي وحتسي يقال وحتسي مايقال ياليتها على كذا قام محمد يسلم على هاللي بالمطعم كلهم ويعزمهم واحد واحد واللي معه حرمه جلس يسوي عليها حركات قلة ادب
ونوره ربطت راسها بشيلتها من الصداع وقامت تضف الصحون اللي على الطاولات وراحت للمطبخ تغسلهن وتنظف القدور والكاسات <<< سنعه هالبنت قايل لكم
ويالله مسكوهم السكيورتيه حقين المطعم وربطوهم وركبوهم بحوض الونيت حق المطعم وطيران على قسم الشرطه
ومن بكره يجيهم مندوب من السفاره ويطلعهم من قسم الشرطه اللي هم متوقفين فيه وعلى المطار سيدا عاد محمد يقول والله مااجلس بهالديره ابد والله لو مااحصل حجز ان ارجع للرياض لو بالنقل الجماعي حق اسبانيا <<< قايل لكم حده شاليهات الثمامه
:p :p :) :)
منقول
هبة نسيم @hb_nsym
عضوة فعالة
يلزم عليك تسجيل الدخول أولًا لكتابة تعليق.
هههههههههههههههههههههههههههههههههههههههههههههههههههههه
ههههههههههههههههههههههههههههههههههههههههههههههه
هههههههههههههههههههههههههههههههههههههه
يحليييييييييييييييييييييييييييييييييييلهم :42:
ههههههههههههههههههههههههههههههههههههههههههههههه
هههههههههههههههههههههههههههههههههههههه
يحليييييييييييييييييييييييييييييييييييلهم :42:
الصفحة الأخيرة
تسلمين يا قلبي على هالنقل....