شوفو وش صار لي باحد محلات الملابس

السلام عليكم
تحية طيبة ابعثها اليكم من مكاني هذا <<<<<<<<<<< هاي تراه موضوع مهب رساله
نسيت مامداني ابدا
لابس بصراحه مادري وشلون ابدأ موضوعي لاني انا والتعبير اعداء :30:
بس تراي أحب الاملأ <<<< علشان معلمات العربي مايزعلون طبعا مفهوم من اقصد
المهم نرجع لسالفتنا اللي مابعد بديناها
هذا طول الله اعماركن بالعمل الصالح طالعين انا وعيالي من صبح الله خير يوم الخميس رايحين ندوج بهالاسواق ندور لنا ملابس للعرس <<<<< الله يعين :(
وطالعين من بيتنا من الساعة 8الصبح طبعا :D
افطرنا برى <<<<<<< كشخه
وبعدين دخلنا احد المجمعات نلقى المجمع خلن خالي <<<< يعني فاضي مابه احد حنا اول من جاء ونقعد ندور لمن افتحن المحلات
وندخل محل ونطلع من الثاني نبي شي زين وساتر الله لايكشف سترنا او شي نقدر نتصرف فيه ونستره
وندخل ذاك المحل وتطلع بنتي منه قطعه قالت بكم هذا قال سعر قلت 250 قال لا 2500 قلت وراه
قال لانه كان 5000ريال وسوو عليه خصم وصار2500 انا سمعت هالسعر
واضف اعيالي واطلع من المحل لا واطلع من المجمع كله :(
وطبعا كان الوقت بدري قلنا نروح لمجمع ثاني وندخل ذاك المجمع وندور نفس الحكايه الى ان لقينا فستان شكله حلو وممكن نتصرف فيه نستر الباقي المهم سالنا عن السعر قال 850طبعا حريم لازم نكاسر ماقلنا ايوالله اهون من ذاك اللي 2500
قلت نبي ناخذه 700ويالله عطنا اياه قال العامل وكان عربي لامايصير ان سعره اصلا 1200وسوينا عليه خصم وصار بهالسعر قلت ايه بس يبيله تصليحات تبي تاكل علينا المهم رفض العامل وانا كبرت في الدماغي :30: قلت نروح ندور في محلات ثانيه
قال : روحوا <<<<<<<يبي الفكه
حنا طلعنا من المحل الابنتي الصغيره تاخرت شوي كان يمسكها العامل
وقال لها : قولي لامك لعاد ترجع للمحل <<<<<<<هههههههههههههههه
جت بنتي قالت لي اللي قاله الرجل
طبعا كان معنا ابو الشباب قال : اللي مايستحي اروح اوريك فيه
انا منب احب الهواش وخصوصا في الاسواق اذا شفت هوشه قمت اتنافض عاد وشلون تبي تصير لي
المهم انا قلت مافيه داعي وانا فعلا منب راجعه للمحل مره ثانيه
كملنا تسوقنا بس ماش ابو الشباب براسه شي قال خلاص ابروح اجيب كرته وبما انه عامل ابكلم راع الحلال
وفعلا راح لمه واخذ كرت منه وذاك مايدري وش السالفه
قعد البو يجري اتصالاته وحنا خلصنا تسوقنا بخفي حنين
بس البنت كان خاطرها في الثوب
ماحصل ابو الشباب راع الحلال قالو له مايداوم الا في العصر
رجعنا للبيت
طبعا تغدينا <<<<<<<< اكيد ولا نهلك من الجوع
ونمنا <<<<<<<<سالناك وش زينتو
المهم المغرب طلعنا مره ثانيه <<<< الله يعين راسي
وحنا في الطريق كلم ابونا على راع الحلال وقاله السالفه
وقال كل اللي يهمنا مصلحتك لان لو كل احد يبي يكاسر بالسعر يبي يقوله لعاد ترجع كان المحل راح يتقفل ، عاد راع الحلال ماقصر وقال مايصير خاطرك الا طيب
كلم على العامل وتفاهم معه
حنا في تلك الفتره كنا نفتر بمجمع ثاني وبعيد عن اللي صار فيه المشكله
وحنا في المجمع كلم الرجال على ابونا وقاله رح وخذ الثوب بالسعر اللي انت حددته ولايكون خاطرك الاطيب
بنتي ماصدقت قالت يالله
بس انا قلت انا منب رايحه معكم <<<<< عندي كرامة :16:
راح ابونا وبنته للمحل وأخذوا الفستان وارتحنا من التدوير له
يقول ابونا الرجل مارفع راسه ولا ناظرن <<<<<<< اكيد بعد يمكن وده ايكفخنا
وبس خلاص بعد قضت السالفه
بس عاد انا قلت لبنتي ترى كان الثوب طلع مهب مضبوط عليك ياويلك لاننا محنب قادرين نرجعه بعد يبيله هوشه ثانيه
بس الحمد لله طلع مقاسه مضبوط :icon28:
عاد الله يعين كل من عنده عرس باقي بنت ثانيه ندور له

وسلامتكم
تعبت من الكتب

معاني الكلمات لغير الناطقين قصيمي
ندوج = ندور بالاسواق
ندور= نبحث
برى = خارج البيت
وراه = لماذا
واضف = اشيل = احمل = اطلع اعيالي من المحل
نكاسر= نفاصل = ننزل من السعر
تبي تاكل علينا = تبي تكلفنا مبلغ من المال
روحوا = اذهبوا
منب =ماعرفت له مراد بس هي فعل مساعدتاتي مع الكلمات التي لاتنصرف
يعني اقول منب احب او منب اواديه <<<<<<< ايه والله من زين الشرح
الهواش = المضارب = الخناق
شفت = رايت = شاهدت
اتنافض = ترتعد فرائصي
ماش = ماعرف شرحه
ابو الشباب= البو = زوجي
جت = اتت = جاءت
راع الحلال = صاحب المحل
السالفه = القصه
نفتر= ندور = نتسوق في المجمع
ولا ناظرن = لم يضع عينه في عيني
ايكفخنا = يضربنا