صارو الحريم يخطبون المفسخات واللي تطلع مع شباب سبحان الله

الله وأعلم

اعوذ بالله يااختي وش هالكلام
اجل الكفار ليش بجنات ودول متحضرة ومسلمين بدول حروب وحصار؟؟
اجل ليه مسلمة ومعجبينها قليل وفاسقه معجبينها الالاف
ليه فاسقات او كافرات بصحة وعافيه. ومسلمات بالمستشفيات
ليه كافرات عندهم اطفال. ومسلمات ماينجبن
صرنا نعبد الله سبحانه وفق خطه :~
ابعبده و بسوي كذا. ثم بجلس واراقب. بينزل علي خير ولا معناته هالطريق مو جايب لي شي هل اتركه!!
وكاننا نختبر الله سبحانه بعبادتنا ونجربه .. ان لقينا اللي يسرنا كملنا معه .. مالقينا ناقف ونفكر نتركه .. يمكن لا تركناه جانا الخير مثل ذ اك وذيك
يااختي الدنيا دار عمل مهي دار نعيم ..
تقدرين تقولين يارب عطني النعيم واللي ابيه كله ومتنازله عن الجنة ونعيمها وكل عباده عبدتك وصدقه ابي ثوابها بالدنيا والآن مابي الآخرة .. تقدرين تقولين هالكلام ؟؟؟
طبعا لا. لأنك عارفه انه الخسارة والهلاك
فيه مسلمات قتلو وهم بعمرك
فيه مسلمات طردو من بلادهم بسبب دينهم
فيه مسلمات قتلو اهاليهم قدام عيونهم
فيه مسلمات انسجنو عمرهم
وماتراجعن عن دينهن
وماقالن وش فادنا ديننا
وش اللي جاك عند اللي جاء المسلمين؟؟
فقط ان زواجك تاخر انبهلتي؟؟
اعوووذ بالله
دائما ادعي الله بالثبات وأنه يجعل همك الآخرة وأنه ما يجعل الدنيا اكبر همك ولا مبلغ علمك

وعليكم السلام ورحمة الله وبركاته


يعني عشانك ماتلبسين مشخلع ومكشف صرتي احسن منهم وتستحقين الزواج ؟!
وهم عشان لبسهم مشخلع ومكشف ويكلمون شباب صارو اشين واسوء منك ولا يستحقون الزواج ؟!
وش هالمقياس الجائر الغير عادل
ارزاق الله مقسومه على عباده وكلن بياخذ قسمته ونصيبه في هذي الحياه سواء كان مسلم او كافر زين او شين
المقاييس السطحيه المبنيه على الشكل واللبس والاعمال هذي مقاييس بشر وعقليات بشر
اما رب العالمين سبحانه وتعالى عز وجل عادل لا يظلم احد بناء على اعتبارات اختلافات ومزاجات البشر
طهري قلبك واصلحي نفسك وانشغلي بحياتك وصفي النيه عشان يتسهل امرك وتتوفقين
واتركي الخلق للخالق
ماقدرتي تقولين لهم هذا الكلام بوجيههم يوم كانو يسولفون لك بأريحيه عن علاقاتهم واستمتعتي بالكلام ومن وراهم حاقده عليهم وغيرانه منهم وحاسدتهم ولو بيدك منعتي عنهم الخير لانك تحسين نفسك افضل منهم !

القاعده الي الكل فأهمها خطا .. ان الملتزم لازم يكون له رزق افضل وحظ افضل ..
والعاصي والكافر لهم رزق اقل وحياه قاسيه ..
هذا قضاء وقدر ولازم تكوني مؤمنه بالقضاء والقدر خيره وشره ..
بما ان ربي انعم عليك بالستر والحشمه لا تشوفي ان العالم اقل منك وأنك افضل منهم .. الي انتي فيه من ستر بفضل الله بأمكانه عز وجل يقلب حالك وتصيري تعشقي البس العاري ..
وهم الي فيه رزق من الله مكتوب لهم ..
لو كان احد احق بحياة النعيم بالدنيا لكانت لحبيبنا محمد عليه الصلاة والسلام .. أوذي أشد الاذى
وفرعون وأبو جهل وقارون كلهم مشركين كفره لا يؤمنون بوجد الله ومع ذالك لهم نعيم الدنيا كله ..


تحتاجين قراءه بموضوع القضاء والقدر عشان تفهمي ان الي انتي فيه فضل من الله ولا تنظري لناس على انها لا تستحق نعم الله ..

قال تعالى (الْخَبِيثَاتُ لِلْخَبِيثِينَ وَالْخَبِيثُونَ لِلْخَبِيثَاتِ ۖ وَالطَّيِّبَاتُ لِلطَّيِّبِينَ وَالطَّيِّبُونَ لِلطَّيِّبَاتِ ۚ أُولَٰئِكَ مُبَرَّءُونَ مِمَّا يَقُولُونَ ۖ لَهُم مَّغْفِرَةٌ وَرِزْقٌ كَرِيمٌ)