روعة يا نايس الله يخليلنا سوريا والشام واهل سوريا واهل الشام ويديم هالبلاد عامرة الله يجزيك الخير عاموضوع الرائع والصور الاروع

فراقك يا شام ألهبني
أفديك أفديك هذي بعض امنيتي

:(:(

الله يكرمني وشوف الشام عن قريب واسكن فيها واتهنى وانبسط ...

صحيح هي متل ما كتب التقرير بس والله نحنا منحب الشام كتير , وما فينا نعيش بلاها

اسألي أغلبية الناس هنيك مهما كانوا معترين وتعبانيني بحياتهم , بدك تسافر وتتغرب وتعيش حياة أحسن ؟ بقلك آكل خبزة وبصلة ببلدي احسن ما اتغرب

الناس هنيك عندهم هموم والضغوط كترانة والمشاكل كبرانة لكن بتلاقيهم بيطلعوا سيرين وبروحوا مطاعم وبسلوا حالهم , عندهم هالرفقات وهالحلقات والدروس جو العيلة والروح الحقيقية للشام اللي هي الدين والروحانيات , خلص هي بتجلي كل الهموم والكروب .....

بكفي صوت المناجاة من المساجد بالثلث الأخير من الليل وخصوصا جامع الإيمان يا الله , صوت بخليك غصب عنك تقومي وتتوضي وتعملي تهجد ..


والله بيرضى بعيش ...

سامحيني يا نايس سميل كتبت بالعامية , لأني والله بكيت من الصور واشتهيت لو روح لهنيك وقضي حياتي هنيك ,
ورجيت ولادي الصور فطار عقلهم وحزروا وين هالمكان واتذكروا مين اخدنا عليه وشلون كان الوضع ...

طلعنا على جبل قاسيون 3 مرات بالليل ومرة بالنهار , كنا نشتري هالشاورما العربي أو هالفلافل من عند فابيان من آخر الخط - المهاجرين - أو أحيانا من غير أراني ونطلع على الساعة 11 بالليل وتلاقي ناس وأمم وسيارات وعجقة كل الناس رايحين لهنيك

وتعي إذا كنت شاطرة تلاقي ارنة ظريفة مشان القعدة مو معجوقة ...

ايه ... ذكريات حلوة والوطن حلو مهما صار ومهما جرى ...

الله يردنا لبلادنا سالمين غانمين مجبورين القلب والخاطر

عم اقرا التقرير المكتوب : والله الشام حلوة كتير

تذكرت لما رحت وجددت هويتي هنيك , يا الله سترك

هلكونا على روح من هون وتعى من هون

جيب رقم الهوية , لا الهوية ضايعة
لا ما بعتوها من الوزراة , لا بعتوها بس الموظف ما عم يعرف يعطيك الرقم المظبوط
روح عل ىالكمبويتر وطالع اسم الطلب , وين صاحبنا ...؟؟؟

عم يطق حنك مع الموظفة

هلأ عم اضحك من قلبي لأني تذكرت مشهد أخي لما طلع خلقه وصار يدردش ويشوبر بإيديه ويمشي بعصبية لأن مسكين تأخر على شغله وهلكوه تلفونات من الشغل , ونحنا قلنا لحالنا مننزل منستلم الهوية شغلة نص ساعة ضلينا 3 ساعات ....

الله يغير حالنا لأحسن حال يا رب

بالرغم من اني لست من سوريا
لكن لا يمكن ان انكر ان مجرد دخول سوريا والتعرف الى طيب اهلها
ولا اقول جمالها بل عذوبتها احببتها وبتمنى ان ازورها دائما
فما بال ابن البلد عندما يعيد ذكريات الاهل والصحبه والزقاق
والفطور يوم الجمعه وهم مجموعين على اكله فول ومسبحه وووو.......
الله ينهى الغربه على خير وتعودون لبلدكم سالمين غانمين

نايس بدك بوسة غير شكل على هالموضوع الحلو :)
يسلمو ايديكي الحلوين يلي تعبوا و كتبوا هالتقرير الرائع
و ضحكتيني لما حكيتي عن صخرة الحب.. اتذكرت لما كنا مراهقين و نمرق من جنبها و نقعد نقول عن جد في هيك حب.. هلأ بقول يضربوا ما أجدبهم, انتحروا مشان شغلة ما بتسوى..ههه

و الصور بتجنن.. أكيد مأخودة بالشتوية مو بالصيف لأن عجقة الصيف و الدخان بيطلعوا الصور مو حلوة.. على فكرة الشام بتاخد العقل بالشتوية.. لأنها بتكون مكنكنة و هادية و ما فيها عجقة..
و آه على تلجات بلودان... بدي روح إلعب بالتلج.. اشتقتله كتير..
و شامو انتي كمان بتاخدي الشاورما من المهاجرين و بتطلعي على قاسيون :)
خالي بيحب يجيب صبارة من ساحة الروضة و يطلع على قاسيون.. و منقعد نتحزر وين البيت من فوق..
ذكرتوني بأيامات حلوة.. أيام ما كانت تبعتني ستي لجيب خبز من السكة بالمهاجرين.. و آكل نص الربطة على الطريق..
ذكرتوني لما كنت روح على المدرسة و المطر عم ينزل و أنا عم إتخبى تحت الجاكيت و الشمسية..
ذكرتوني بعرنوس الذرة السخن بالبرد و كيف كنا ناكله بسرعة مع إنه عم يغلي غلي..
اتذكرت أيام الطفولة يلي عشتها بالشام مع إنها قليلة يا دوب وصلت للصف الثالث هنيك و بعدين سافرنا..
اتذكرت مدرستي و صفي و مقعدي.. اتذكرت الباحة و الوقفة الصبح لتحية العلم..
اتذكرت حنفية المي تبع الجامع يلي كنت امرق من جنبها و أنا رايحة على المدرسة و اشرب منها..
سقى الله تلك الأيام.. و ان شاء الله شامنا بتتحسن و بترجع متل الأول و أحسن.. أيام ما كان الخير خير..الأيام يلي بتحكيلي عنها ستي, لما كانت العالم عايشة مرتاحة و مبسوطة..

و على فكرة.. فينا نحسن بلدنا.. بيكفي نربي أولادنا على حب وطنهم و نعلمهم كيف يحاولوا يحسنوه و يهتموا فيه.. و إلا ما يجي يوم و يرجعوا هالأولاد و يبنوا بلدنا..
شكراً يا نايس مرة تانية و آسفة على كترة الحكي يلي مو مرتب...