صحباتي سوريات ومغربيات وغيرهم وركبهم سودا لكن فجأه تصير بيضاء .... تعالوا اقول لكم

اولا السلام عليكم ورحمة الله ويارب نكون من اصحاب هالتحيه اصحاب الجنه

وثاني شي ترا البشره وراثه ومن ربي وانا شخصيا اعرف واعرف ويا كثرهم اللي اعرفهم سعوديات وغير سعوديات وما شاء الله تبارك الرحمن بشرات تفتح النفس ومن الطفوله بشرتها على قولت القايل بيضه ومقشره

لكن كلنا نتفق على انو عدم الاهتمام يعدمها

ومعلومه صغيره ..... من سنين فيه حملة شيعيه وانا وحده من اللي كانت حاطه نقرها بنقر هالشيعه واعرف دحاليسهم وحملاتهم المهم انو حملة طلعة من شي كم سنه هدفها تشوهه المرأه السعوديه مره تقول ركبهم سودا ومره يقولون جيبوا سعوديه منطقتها الحساسه بيضاء ومره يقولوا اننا شينات وسمرات ووووووو الخ

لكن باقولها بصوت العالي شكر خاص لكل سعوديه لانها برزانتها وحكمتها وتطنيشها طفت هالكلام الفاضي وحلت المشكله بصمت ......... لكن مو الكل عرف يحلها

بما اني من اهل مكه فصحباتي من كل منتزه ورده من بخاريه الى فلسطينيه الى سوريه الى مصريه الى روسيه الى سودانيه الى مغربيه الى اردنيه الى لبنانيه ووووووووو الخ

وليه اساسا فتحت الموضوع ...... بصراحه انا اتضايقت من بعض البنات اللي يضحكون على الناس اللي تقول حطي بيض ني مع نشاء واللي تقول انا اول ما اصحى من نومي اتفل في يدي وامسح بها وجهي ومن هالضحك وكله عشان ما تقول وش السر ........ وما تدري انو الدنيا صارت صغيره ويا خبر اليوم بفلوس بكره بلاش

حبيت احط معلوماتي اللي اعرفها عن صحباتي اللي من خارج السعوديه وعلى فكره بعضهم سعوديات لكن اصولهم او امهاتهم

وعلى فكره موضوعي فقط عن صحباتي الغير سعوديات ....... بليز لا تجي وحده وتسوي مشاكل لان كل واحد عارفه نفسها ......... ومو لازم نعلم الناس من نحن لاننا مو بحاجه لشهادتهم

بعض صحباتي ايام الدراسه كانت بشراتهم مبقعه وركبهم سووووودا لكن تعجبني حاجه فيهم انهم ثقه ثقه ثقه

طبعا ايام الابتدائي كانو بعض صحباتي وليس كلهم يقولون احنا ما نجي المدرسه الا بواقي شمس ويجلسون يستهبلون كيف امهاتهم يحطون لهم ووحده تقول ماما تاخذ منديل وتعطره وتحطه في فمي وتقول اشفطي عشان ريحة الفم تروح وهذا من غير الاشكال اللي تففففففففففففففففففتح النفس اللي ملفلفه لها امها شعرها واللي مستشوره قصتها واللي واللي واللي حتى الاساتذه يحبونهم لانهم اشكال تجنن

لما نجتمع في البيوت والله يا بنات اللي تقول انو امها تحط لها واقي شمس انو ركبها بيضاء وبشرتها صافيه واللي ما تحط مبقعه وركب سود مع ان لون بشرتهم فاتح جدا


ووحده اعرفها اردنيه تقول انا واخواتي عددنا 7 واذا جينا نخرج لاي مكان مستشفى او سوبر ماركت تمسكنا امي وحده وحده اللي تستشور شعرها واللي تلفلف شعرها واللي تسوي لها تسريحه وتقول عشان انا كبيره تحط لي عدسات وتخليني ابرم اضفاري


وحده سوريه تقول انو خالاتها وامها واكثر اللي تعرفهم يحطوا مكياج لبناتهم الصغار لما يخرجوا لاي مكان وتقول في عاده منتشره في السوريين انو الوحده تصبغ شعر بنتها اشقر لانو الشقرا بسوريا اجمل وطبعا صبغه طبيعيه

وترا عموما يهتموا ببناتهم الصغار اهتمام مو طبيعي تدرون ليه ........ يقولوا عشان تتزوج اذا كبرت ..... يعني تكون معروفه بجمالها من الصغر

لما وصلنا المتوسط صارو يهتمون بالمظهر الخارجي يعني اظافير استشوار وماكياج خفيف في المدرسه والمرايل والرياضه لكن اهتمام نظافه او اهتمام اكل نووووووووووووو

لدرجه كان فيه مجموعه من الشله يتسابقون من اللي تتحمل اكثر يوم ما تتروش ووصلو بالاسابيع :09:

لما وصلنا الثانوي .......... صارو يهتموا من برا وجوا واللي اهلها مطاخيخ تروح للمستشفيات واللي قد الحال يكون الجود من الموجود من كريمات لخلطات

لما يوصلون للجامعه ...... كل صحباتي اللي اعرفهم واللي تعرفتهم عليهم يروحوا لمستشفيات التجميل ..... والله يا بنات كانت ركبهم سودا وصارت بيضاء وكانوا مبقعات وصاروا صافيات كانت بشراتهم معدومه وصارت تلمع وصار معروف اول سنه في الجامعه اشكالهم تجيب الهم وثاني سنه حوريات يمشون في الارض

مره قلت لصحباتي انا ابغى اروح مستشفى تجميل بس مو عارفه اش اقول لهم ومو عارفه اش ابغى

فقالوا لي معلومه واشكرهم عليها ........ قالوا اولا اتثقفي بمعنى الكلمه لا تروحي المستشفى وانتي مو عارفه شي لانهم بيلعبوا فيك لعب وفي الاخيرا ما تشوفي نتيجه وفلوسك راحت وممكن يسوون لك شي تندمين عليه زي نفخ مناطق ما بتكون عليك حلوه مثلا يخلون الوجهه مدور وهذا شي مو حلوا

وطبعا مو اي شي اقراه واتثقف فيه ...... اللي انا ابغاه فقط ..... وقالوا روحي قدام المرايا وسمي بالله واتحصني واخلعي ملابسك وشوفي اش المشكله في جسمك وصلحيه وكمان لا ننسى الوجه

اذا متينه اول حاجه ننحف لان المتن هو اساس كل مشكله وعلى فكره وعن تجربه ترا النحف ابسط منه ما في فلا تستصعبونه

اذا عينك صغيره مع النحف والماكياج الخفيف تقدري تكبريه

انفك طويل او عريض .... مع تصفية البشره وتفتيحها حيختفي

فمك كبير احقني فكك كولاجين وليس خدك لان الخد يصغر العين ويكبر الوحده في العمر ..... وعلى فكره الفم الكبير حلو لكن انا اقصد اللي طويل

وطبعا اعرفي ارسمي حواجبك لانها ترتب الوحد بشكل خيالي و كل بنت لها رسمه فلا تقلدي

والجسم ...... طبعا صحباتي ما يحلقوا ولا عمرهم نتفوا المنطقه الحساسه لانهم يشيلوها باليزر في اقرب فرصه تجيهم

واغلبهم يشيلوا الجسم كله

التشققات كل صحباتي كلللللللللللل صحباتي يشيلوها على طول بعد الولاده مباشره ...... وحده شالتها باليزر والثانيه بالميزو والثالثه بالتقشير ووحده سوت عمليه وشالت الجلد المشقق..... وبعضهم ياخذو جلسات ما بعد الولاده عند مستشفى ادمه

التصبغات يشيلوها بجلسات توحيد لون او تفتيح موضعي

وطبعا ياخذوا ابر فيتامينات عشان بشرتهم تسير مرتويه

وابر تنعيم البشره

وابر الميزو ثرابي للشعر

والكيراتين للشعر

ودائما شنطهم ما تخلى من كريم اليد وواقي الشمس ........ ما شاء الله الوحده بدون ماكياج اجمل

مع انهم كانوا مبقعات لعبت فيهم الشمس لعب وكانت حالتهم حاله

وعلى فكره اكثر صحباتي المتزوجات يقولوا انهم نفخوا المنطقه الحساسه وسووا لها توحيد لون وشالوها باليزر وبعضهم سووا تصغير ............ وهذا شي معروف لدرجه انو انفجعوا لما قلت لهم انا ما سويت شي لها وقالوا لي رضيوا يكونوا بشعات وما يهتموا باجسامهم بس هالمنطقه لازم يهتموا فيها


وانا لاحظت انوا الاغلب صار مثقف من هالناحيه .......... ويا بنات احنا في عصر اللي موحلوا تقدر بغمضت عين تصير ملكة جمال فلا تبخلوا على انفسكم وعلى ازواجكم لان الوحده اذا كانت واثقه انو مافيها عيب بدلع زوجها اخر دلع.............. ونسد حلوق الحسده

بعض اسرار صحباتي


اعرف وحده مغربيه تقول انا اسبوعيا اتنقع في حليب ولما اخلص افرك جسمي بسكر وزيت زيتون والتقشير يوميا تسويه ...... وتقول مره في الشهر اسوي حمام مغربي .............. ماشاء الله تبارك الله ما انسى بشرتها روووعه

وتقول من عادات المغاربه انو اول ما تبلغ الوحده يعطونها حليب تتنقع فيه

_____________________________

ووحده من صحباتي فلبينيه تقول انا ما اقطع كريم فيداوت ...... معاها في كل مكان ودائما تحط منه على يدينها والمفاصل

_______________________

ووحده من صحباتي سوريه تقول انا مرتين بالشهر اسوي تنظيف للوجه واروح اسبوعيا الصالون اسوي بديكير ومنيكير وتقول امي تجبرنا ناكل خضره وفاكهه

____________________________________

ووحده مصريه تقول انا ما اقطع الفتله واحط بعدها مزيل مناكير عشان ما تطلع حبوب

ووحده بخاريه تقول بعد الفتله احط زيت شجرة الشاي اللي بدي شوب

______________________________

اعرف لبنانيه تقول انا اتنقع بزيت زيتون وملح عادي في ماي فاتر ولما اخلص افرك جسمي فرك مو طبيعي بملح وزيت زيتون ولما تخلص الشاور تاخذ جك فيه فنجان خل تفاح وقد الجك ماي وتكبه على جسمها وشعرها بالكامل ........ ماشاء الله تبارك الرحمن ما انسى جمال شعرها

ونفسها تقول امي تحط في طاولة الصاله صحن كبير في فاكهه وما يجي الليل الا مخلصه وتقول مرات كثيره ناكلها مجبورين من امهم وتقول احنا نشرب بدل الشاي الزهورات وهي عباره عن ازهار مجففه يحطونها في ماي حار ويشربونها

_______________________________

ووحده عراقيه تقول جسم امي اجمل من جسمي لانها تمشي كل يوم ساعه وتقول احنا نحني المناطق السمرا عشان تفتح ووالله يا بنات قدامي قالت شوفي مفاصل يدي كيف سمرا وجت اليوم الثاني محنيه مفاصلها ويوم راح الحنا رجع ابيض .............. ونفسها تقول انا ما استغني عن زيت الزيتون كل يوم احط بجسمي

وكمان السوريات ما يستغنوا عنه وعلى فكره هو سبب حمرة الجسم والخدود والاطراف ولمعة الاظفار وعن تجربه





الاهتمام هو سر الجمال ........ لكن في اشياء ما تروح بالاهتمام اليومي ممكن تخف لكن ما تروح فلازم مستشفى او كريم قوي .......... اتذكر اول ما رحت مستشفى تجميل قلت لها انا مخطوبه وابغا وابغا وابغا ....قالت لي انتوا كذا يا السعوديات ما تجون الا لما تنخطبون او متزوجات !!!!

فكرت مع نفسي وقلت صحيح ليه نايمين في العسل طول المده ........... لكن هذا مو مانع اننا ما نصلح ما افسده الدهر


وفي الاخير حبيت احط تجارب ناس معروفين بجمال بشرتهم وانو عندهم مشاكل مثل مشاكلنا لكن لان بلادهم اختلاط ولازم الوحده تكون حلوه عشان تقدر تعيش وتتزوج ........ فكان الاهتمام الاول والاخير للبنت هو الجمال واي نقطت عيب تسوي المستحيل عشان تبعدها ........ ومو عيب اننا نستفيد من تجاربهم


واتمنى موضوعي يكون اعجبكم ويا ريت لو تردو ولو بالرفع عشان تعم الفايده