صديقتي تريد منكم نصيحه عن كيف تتصرف مع زوجها بوضعه الحالي المتأزم!

السلام عليكم ورحمة الله وبركاته

لي صديقة عندها مشكلة وودي اخذ رأيكم بالحلول .

صديقتي هذي مدرسة وزوجها رجل اعمال وانضرب بسوق الاسهم وفلس وصار مديون وانمرض نفسيا
وصارت تصرفاته معها ومع عيالها صعبة جدا مع انه يحبهم موت ,لكنه صار حساس بقوة اي تصرف من زوجته يفسره تفسير ثاني خاصة انها هي اللي تصرف الان على بيتهم وهو مامعه شيء ويساعدونه اهله وهو عزيز نفس صعبه عليه مرة لانه عليه قضايا ومعرض للسجن بأي وقت وديونه كبيره مرة صعبى على اهله يسددونها لانهم على قد حالهم .
هي تقول اخطي اخطاء بسيطه ماكان يدقق عليها اول الان بقوه مثلا اذا فيه اشياء كنت متعوده استأذنه فيها وماستأذنته يفسرها بتفسير ثاني ونا راحمته مابي اكثر عليه فيه اللي مكفيه .
مره صارحني يقول انا عارف اني فقدت القوامه بنظرك لاني ماصرت اصرف عليك وصحتي تعبانه ونفسيتي سيأه حتى عيالي مااقدر اساعدك على دراستهم ومااقدر اجيب لهم مدرسين زي اول لظروفي المادية الحالية والله سبحانه وتعالى يقول (الرجال قوامون على النساء ) وارجع السبب الى انفاقهم (ذلك بما انفقوا ) ويقول اني فقدت القوامه عليك بعد ماصرت ماانفق عليكم .
تقول انه حبو بومايقصر ويوم كان وضعه طبيعي كان يسفرهم ويوسع صدورهم ومايسافر بلحاله ابد ولا يروح الا بهم الا اذا للبر مع خوياه .
تقول هي عندها عدة مشاكل :
الاولى انه ممكن يتعرض للتوقيف والسجن في اي وقت ويمكن يجلس سنوات لان ديونه ضخمه
الثانيه انها الان اثناء الشهر ينقصهم اشياء كثيره لانهم متعودين على مستوى عالي من الصرف واطفاله مايبي يبين لهم وهو يقول لاتقولين لهم شيء وتشوف بعيونه الالم والقهر لابغو شيء مايقدر يجيبه لهم زي اول وماتقدر تمنعهم يطلبون منه شيء علشان ماتخالف كلامه وتجرح مكانته عند عياله .
الثالثه مشكلته النفسيه وحساسيته الزايدة من كل كلمه او تصرف
الرابعه صحته في تدهور كامل نفسيته مسدوده عن الاكل مره وضعف جسمه ووزنه واصابه الوهن .
الخامسه في الافق موب باين حل واضح
السادسة انا نفسيتي بعد تعبت والشغل كثر علي بعد ماصار يقعد في البيت وراحت شغالتنا وماجبنا غيرها وصرت امل احيانا وارسل له الاكل مع عياله وغالبا يرده ماله نفس واتصدد عنه مابي عيوني تجي بعيونه رحمه له بس اخاف يفسرها بشيء ثاني .

صديقتي تقول ماعندها وقت تكتب مشكلتها بنفسها تبي اراءكم والحل من وجهة نظركم ونصائحكم لها وش تسوي ووشلون تتصرف .

الله لايحرمكم الاجر يالله انا بانتظار ردودكم لاجت من المردسة باعلمها او اخليها تقرأ الردود اذا جتها فرصة .