.
.
_الفصل الســــابع _
.
.
الضــرة مــرة ولو كانت دُرة
.
.
بدريه ..
.
.
شكلها كان عكسي تماماً فهي قصيرة ممتلئة ..شعرها أسود وطويل ونااااعم وبيضاء ..
إمرأة كأنها أمي ..لبسها قديم ..طباخة ماهرة ..أهم شي عندها شغل البيت ..ترفض تدخل خادمه ..شخصيتها قوية جداً تربت يتيمة هي وأخوانها كفلهم خالها ..
عاشت حياة صعبه شوي كان والدتها تبيع (الحوايج ) وهي بهارات وتوابل وأدوية شعبية ..
وهالحياة علمتها أشياء كثير أهم هالأشياء القوة وتقبل كل الظروف والتأقلم مع كل شي ما أعتقد بتمر بظروف أصعب مع وجود عبد العزيز ..
ببساطه مثل ماتقول خالتي عنها بدريه حرمة سنعه ..وتتحمل المسئوليه ..!
.
.
عكسي تماماً تربيت بوجود خادمات كل طلباتي الاقيها بسرعه ..ما أقدر أتحمل شي أزعل بسرعه ويبين علي أعصب بسرعه أما هـــي ماتدرين وش بقلبها تصبر وتتحمل وتجي على نفسها ...أنا ما أقدر ..
يعني بالعربي أنا مدلعه أو بنت نعمه وصعب صعب أجي على نفسي ..! ومع ذلك حاولت بقدر الإستطاعه أسوي الي أقدر عليه ..
.
.
وأكتشفت بإني ما أقدر أصير مثلها فكل مخلوق ميسر لما خلق له ..
.
.
بتسألون عبد العزيز حضر ولادة إبنه بقول لكم وبكل أسى ...لأ ..راح مع بدريه وماتركها إلا بعد مافاقت من البنج ..!وهذي المشكلة رقم ( 3 )
.
.
وأنا طبيعي رضيت بالأمر الواقع وأبوي يقول عادي يانوال نواف ولدنا ...وكنت أنتظره يانوال خلي أبوه في حاله والحرمه كانت تعبانه وإنتِ ربي فرجها عليك ..
.
.
قلت : صح كلام أبوي ..وكنت من داخلي أشعر بنار بس دام أبوي قال كذا وزوجي جا وقال نفس الكلام قلت خلاص ..
.
.

.
.
بعد فترة جاني عبد العزيز وقال : ترى لازم تجين البيت الأول تتغدين معانا ومع البنات أنا تعبت كذا وكل زملائي المتزوجين ثانيات يقولون نقعد جميع على سفرة غدا وحده يعني مافيها شي وأنا قلت لبدريه وقالت طيب الي تبيه ..قمت قلت له: وأنا بعد أقول الي تبيه ..
وكان المفروض أقول : لأ وألف لأ ...
.
.
وصرت أجتمع معهم ونتغدا مع بعض ..وهذي المشكلة رقم ( 4 ) وهذي أم المشاكل تفرعت من هالمكشلة مليون الف بلوة ومصيبه يعني يوم كنت بعيده وهم بعاد كان الوضع أهون بكثير بكثيـــــــــــــر ..
.
.
الحين تعب ..ونظرات ..خصوصاً بناته يووووه ودهم يجيبون حبل غسيل ويشنقوني ..يمكن لإن لبسي على الموضه ألبس قدامهم قصير وبناطيل ..وفتحات عادي ..وشعري مصبوغ وعلى أحدث قصة طبعاً عندنا مشغل ودايم أروح له ..
وهم لبسهم قديم ..تنانير وبلايز ..أمهم ماتلبس إلا جلابيات وشعرها دايم جديلة ! فيه أحد هالأيام يسوي جدايل ؟ ومدهون بزيت !
بعذر عبد العزيز تزوجني يشوف في المستشفى أشكال وألوان ..ويجي البيت يلقاها كأنها طالعة من مضارب البادية
.
.
وفي يوم جاني عبد العزيز وقال : أسمعي يانوال ترى أم عبد الله ملتزمه ومايرضيها طريقتك في اللبس وأنا عندي بنات !
قالت : إيشششششششش بإستغراب ؟؟!
قال: لا تفهميني خطأ نوال البسي أي شي هنا لي عندي قدامي وبس أما في البيت الأول أرجوك ياحياتي لأ ..يمكن يغارون منك ...!
.
.
رضيت بكلامه الثاني وقلت أكيد يغارون ..
.
.
صرنا نجتمع عندها أما عندي فلااااا بحجة إن العيال هناك وهناك البيت الأول !
.
.
إجتماعي معهم كئيب حزين أنا إذا شفت عياله الصغار يتجمعون حوله أشعر بالذنب ..!
وعبد العزيز مو قادر يكلمني ولا قادر يكلمها ..صير مثل المجرم !
.
.
نواف إبني كأنه غريب ماحد يبيه ..وأنا مو أنا غيرت شخصيتي حتى لبسي وشياكتي ألغيتها عشان خاطر زوجي ماصار عندي أي هويه أعتز فيها مثل الأول ..صرت مثلها البس جلابيات !
.
.
وعساهم رضــوا لا بل بالعكس ناقمين علي ..ومايرضيهم إلا شي واحد يمحوني من على وجه الأرض ..
.
.
أستمر الوضع وأصبح أسوء من الأول ...!
.
.
ويوم جات لعبد العزيز سفرة للخارج وطبعاً بيآخذ مين معاه ؟ بيآخذني ماعندي إلا طفل واحد وممكن أخليه عند أمي ...
.
.
وحنا قاعدين نتغدا ..قال عبد العزيز : ترى الأسبوع الجاي عندي سفره وبآخذ معي أم عبد الله وبعدها عندي سفرة ثانية بآخذ معي أم نواف ..
قامت قالت أم عبد الله : أنا ما أقدر أجي معك في تفس الأسبوع عندي مجلس الأمهات حق بناتي ..وعندعيالي إختبارات كيف أرح وأخليهم ...؟
خل أم نواف تروح معاك السفرة الأولى والثانية بعد
.
.
قام تفششششششل وسكت ...
.
.
أما أنا فكنت أتمنى الأرض تنشق وتبلعني ..
.
.
ويوم رجعنا البيت قال لي : أنا كنت أبي آخذك إنتِ معي بس كنت بحقق مبدأ العدل ..!
ومن هالكلام الي سكتني ..!
.
.
ويوم نام أخذت جواله بالمصادفه إلا والاقي إسمها في الجوال ( الحبيبة الغالية ) وإسمي ( الحقيرة )
.
.
تفاجأت ويوم قام سألته قال : والله مدري يمكن إنهم البنات ...؟
.
.
يعني يعرف إن البنات يكرهوني بس لهالدرجة طيب علم بناتك ربيهم عيب كذا والله ..!
.
.
وأخذت الجوال وكتبت على رقمها ( الدبيه الشينه ) وعلى رقمي ( العزيزه الغالية )
.
.
وصرت أنا أكتب وهي تكتب ..وكل هالتراشق عن طريق جواله هو لإننا قدام بعض مانقدر !
.
.
لين ماكتبت على إسمها كلمة جرحتني بصراحه كتبت ( حبي الأول ) وعلى إسمي ( اللزقة )

.
.
قمت أخذت الجوال وأنا أنتفض من الغضب وكتبت على رقمي ( حبي الأخير ) وعلى رقمها ( هيا الشعيبي
.
.
لين ماعرف زوجي بهالحكاية وماقال لي شي ولا قال لها بس حط قفل لجواله
.
.
وهاقد دقت الحرب طبولها
.
.
.
.
------------------------------
.
.

بعض الرجال يلجأون الى تكوين علاقات عابرة، أو الارتباط بزيجات أخرى
لمجرد التمسك بالشباب، إضافة إلى ان الزوجة العربية، بوجه عام، لا تتقن فن الاهتمام بالزوج بعد الانجاب، وتنسى في زحمة المسؤوليات والاهتمام بالابناء، إن الرجل طفل كبير يحتاج إلى الاهتمام كالابناء تماما، وبأنه على رأس قائمة أولوياتها.

.
.
- الفصل الثـــــــــامن -.
.
.
لكل إنسان بهالدنيـا قصة كفاح ...يعيشها ويكابدها ...ولكنه ربما لا يستيطع أن يرويها ..
.
.
أصبحت أعيش مع نوال قصة حياتها ..
.
.
قلت لها : نوال هالي تتزوج أبو السته والسبعه أكيد راح تتعب وتعاني ..
.
.
نوال : بس هو يوم تزوجني قال إن زوجته مهملته بشكل كبير ...وهو صاادق بدريه همها الأكبر عيالها وبناتها ..همها الطبخ والبيت ..
.
.
بكمل لك وش صار ..لإني ودي أفضفض ويوم أحكي لك أرتاح ..
.
.
صارت بيني وبينها عداوه مايعلم فيها إلا الله يعني الناس يتحاربون على وطن ..وأنا وبدريه نتحارب على عبد العزيز وهو في الحقيقة وطن لي ..بس هي مقيمة فيه ولا عندها إقامه بعد ..
.
.
وطــلع العكس صحيح إنا الي ماعندي إقامة سارية المفعول ..!
.
.
أنخطبت بنت بدريه ..وماقالوا لي عرفت مصادفه ..!
.
.
وقلت لعبد العزيز قال : هم مايبونك تدرين عن الزواج..! ولا تحضرين الزواج بعد ..!ريحي نفسك ..
.
.
وقامت بيني وبين عبد العزيز أكبر هوشه في حياتنا قلت له ليش : هي مو بنت زوجي ؟ مالك كلمة عليهم ..
.
.
هذا جزاتي يوم عرفت خيطت لي فستان لزواج بنتك..قاطعني
.
.
قال : لا لا مايحتاج خليه لزواج خواتك ..!
.
.
عصبت وبكيت وصحت ونحت بس وش السواة ..؟ مايبوني هــم ..
.
.
ومره قلت أصلاً زوجتك بدريه ماعندها ذوق ..
.
.
وقوم الدنيا كلها وكل الجيران عرفوا وهزئني وقال لو تقولين كلمة مرة ثانية عن بدريه ولا عن أهلها ولا عن عيالي وبناتي ترى لاتلومين إلا نفسك ..
.
.
قلت له : تحبها صح أكثر مني قول ..وراك ماتقول ..قول وأنا أصااااارخ بكل صوتي .
.
.
وفعلاً طلع عبد العزيز يموت في بدريه أكتشفت هذا متأخر جداً وكل يوم يمر علينا أكتشف حبه لها بل بالعكس يزيد حبه لها ..
من يقول الزوجة الأولى تعاني أكثر والله إن الثانية تموت وتحيا من كثرة المعاناة ..
.
.
أما أنا يزيد حبي وتمسكي فيه ..والمرأة عندها غريزة حب التملك ..ودي يصير عبد العزيز لي لوحدي وفي نفس الوقت ماودي أظلم أحد ..!
.
.
أنا بنفسي أخترت هالزواجه ...أصلاً ماكان فيه غيرها عشان أختار ؟
.
.
ويوم تزوجت هالشخص حبيته وصرت أغار عليه أكثر من أي شي الغيرة بتحرقني بتموتني ودي أذبح بدريه وصلت لهالمرحلة ورب الكعبة سببت لي أزمة كبيره ..
.
.
تناقضات غريبة صرت أمر فيها وساوس أفكار ..
.
.
زوجته الأولى وش ذنبها تزوجته وهي صغيره ويتمية وصار أبوها وزوجها وكل شي أهملت في نفسها عشانه ..!بدريه آلة لا ترتاح من العمل ..
.
.
أما أنا فقبلت بإن أكون زوجة ثانية قدمت تنازلات كثير ...وصبرت على شي عظيم مافي ولا إمرأة بها الدنيا تصبر عليه !
.
.
عبد العزيز بعــد أحس إنه كأنه متوهق !
صحيح إن الرجل بطبيعته قادر على التعددومؤهل لذلك ..لكن هل مؤهل للعدل ...؟
.
.
مع ذلك كله ومع كومة المشاكل قلت في نفسي يابنت قدمي تضحيات في سبيل هالزوج ومن أجل (نوواف ) وأخوه الي جاي بالطريق ..
.
.
بديت أشعر بإني إنهزمت من بدريه ..وأنتصرت هي بحب وبقلب زوجي ..لكن لابأس من محاولات ..يمكن أكون واهمه ..لو يجيبون لعبد العزيز كل حريم هالدنيا بيختار بدريه !
.
.
* اذا ميز الرجل المرأة بين جميع النساء فذلك هو الحب، واذا اصبح النساء جميعا لا يغنين الرجل ما تغنيه امرأة واحده فذلك هو الحب.

.
.
- الفصل التـــاسع -
* الرجل الذي لا يغتفر عيوب المرأة، هيهات ان ينعم بحبها.
.
.
كل البنات معانا في الدورة أصبحوا هامش بالنسبة لي خصوصاً الهنوف
.
.
ركزت على قصة ( نوال ) بشكل فضيع ..وعلى جوانبهاالإنسانية ولإجتماعية ...
.
.
تكمل نوال وكلها أسى لتعلن بعد قليل نهاية مأساوية لقصة حب من طرف واحد ..!
.
.
تقول : تفاقمت المشاكل بس كلها كانت تندثر ونقدر عليها ..
.
.
وهناك مشكلة أزلية بس مو قادره أمسك شي حقيقي كله كلام وإحساس قد يكون كاذب !
أحياناً أقول بقول لعبد العزيز يلاقي حل بس لأيش ؟ مدري أنا مو مرتاحه ..
.
.
وكل يوم أسأله : عبد العزيز تحبني ..؟
لين زهق مني وقال لي : والله لو كنتِ مراهقة يانوال أكبري أعقلي !
.
.
صحيح إن الرجال إذا تزوج ثانية فهو يضحي بجزء من سعادته وسعادة أسرته في سبيل الوصول لمجتمع سوي ..!
.
.
كل معادلات هالدنيا لها حل إلا هالمعادله :
.
.
أنا + عبــد العــزيز + بدريه =؟؟؟؟؟
.
.
صبرت وعشت أيام أعوذ بالله وتوفي والدي في هالفترة وتعبت أكثر ..وحبيت وتمسكت بعبد العزيز أكثر وأكثر ..
.
.
لين ماجات المشكلة الي قصمت ظهر البعير مثل مايقولون ..
.
.
كان عيد الأضحى ..والمفروض يومي ..وأنا حامل وتعبانه ..بس بعد محتاجه له ..
.
.
في الليل راح عند حلاق وحلق ورجع وتروش وهو يقول لي : نوال أنا أهم شي عندي ترويشة العيد لازم أجهز كل شي حتى الشور جيل ..
.
.
ورحنا صلينا العيد أنا وياه ولبست نوااف لبس العيد ..
.
.
وبعدين قال : نوال لازم أمر على بيتي الأول أعيد على العيال وأمهم أشوف محتاجين شي ولا شي ..
قلت له : طيب يالله ..
.
.
ورحنا وياليتنا مارحنا ..
.
.
أول مادخلت البيت كأنه متغير ..!
.
.
بخور وحركات ورد أحمر عند المدخل ..قلت في نفسي : سلامااااااااااات !
.
.
بناته وعياله لابسين لبس ماركات والبنات لابسين بناطيل ضيقه ماشاء الله على الإلتزام !
.
.
كل هذا يهون عندي ..قعدنا في الصالة وزوجي يسأل : وين أمكم ...بعايد عليها وبمشي ؟
.
.
شوي وتدخل بدريه تصدقين ماعرفتها سوت ريجيم وطلع جسمها صحيح مليان بس يهبل وصبغت شعرها ذهبي وعلى بياضها زادت بياض ولابسه بنطلون جينز وبودي زهري ..
يوم شفتها تفاااااااجأت صرت أبلع ريقي ياربي من هذي الإنسانه ...؟؟
تغيرت مية وثمانين درجة ..
.
.
صارت مثلي بالضبط ..علمتها كل شي ..لبسي موديلاتي حركاتي حتى لون صبغتي !
.
.
المشكلة إن زوجي صار مو على بعضه يوم شافها وده يمدح وده يخم !يعني لو كان أبوي ولا أخوي صعب أعرف شعوره وأكشفه لكن زوجي أنا الكاشف حقه !
.
.
وأنا أناظر فيها بحقد لدرجة إني صرت ما أناظر وهي طالعه من جد قمر ..بقووه
.
.
ياحسرة علي محزنه على أبوي وأتوحم ..وحالتي النفسية زفتتتتت ولابسه جلابية مثل ماقال لي هو ؟؟
.
.
خرجنا وزوجي في عالم آخـــــــــــر ؟
.
.
أكلمه ..أناديه ..عبد العزيز أبو عبد الله ..مافيه فايده مسرح ..!
.
.
يسوق وهو يفكر فيها ..وأخيراً تحقق الي يبيه صارت بدريه تهتم بنفسها ..
.
.
والفضل لذلك يرجع لي أنا الي علمتها ..أنا ماحد غيري ..أنتهى دوري خلاص ..
.
.
رجعنا البيت ..
.
.
قال : أسمعي نوال أنا بروح أشوف أضحياتنا وش صار عليها وبرجع ..
.
.
وهو يقول أضحياتنا قلت في نفسي أنا أكبر ضحية ...!
.
.
وراح ..وتأخر وأنا أتصل على الجوال مقفل ..أتصل ..أتصل مافيه فايده ...!
.
.
رجع بعد آذان الظهر وأنا متأكده إنه كان عندها ..!
.
.
سألته وين كنت : قال في المسلخ ..ذبحنا الذبايح و..وسلخناها ..يعنني هو الي سلخ !
.
.
قلت له : وكل هالتأخير ...؟
.
.
قال : وزعت الأضاحي بعد عشان كذا تأخرت خلاص نوال تراني تعبان ودي أنام في لعصر بنروح بيت الوالد ..
.
.
قام وراح الحمام وتروش ورجع يصلي الظهر ..
.
.
بعد ماسلم من الصلاة ..قلت له : ليش ماصليت في المسجد ؟
.
.
قال : بس بس ريحتي صارت مزفره لحم ..قلت لازم آخذ دش وبعدين أصلي ..!
.
.
قلت له : عبد العزيزترى ماتمشي عل هالحركات أحلف بالله إنك مارحت عند بدريه ..جعلك يارب إذا كذبت ربي يبتليك في بناتك يارب يارب وأنا أصيح من قلب ..
.
.
سكت وقال : وش عندك إلا بتسوين مشاكل من أول يوم في العيد ..
.
.
إيه كنت عند بدريه وش عندك ...بيتي وزوجتي على سنة الله ورسولة ..
.
.
نوال : قلت لك تحبها وإنت تنكر ليش ماقلت لي يوم خطبتني إنك تبيني بس عشان أ صلح لك زوجتك وأعلمها تعطيك حقوقك ..إنت ظالم أكبر ظالم ...
.
.
قام وعطاني كف ..أول مره يمد يده علي ..
.
.
قمت قلت له :ياليتني ماتزوجتك ليتني بقيت عانس على أن أتزوج رجلاً ليس له حظ من الرجولة إلا الاسم!!
.
.
قال بصوت يخوف : نوال أقصري الشر ..

قلت له أطردني ..بسرعه أطردني ..قال : إذا ودك تروحين عند أهلك روحي مع السلامه !
.
.
قلت له : لاااااااااااا شكلك نسيت أن هالبيت بيتي ..هذا بيتي وأبوي كاتبه بإسمي ومارح أطلع من بيتي !
.
.
قال هــو : يعني أطلع أنا ..
أرجع لمكان ماكنت لزوجتك وعيالك الي من يوم تزوجتك وإنت محسسني بالذنب تجاههم ..
.
.
قلت هالكلمة وسمعت صوت الباب يتصكر بقووه
.
.
.
وعلمتني الأيام أن أشكر من أهدى لي جرحاً! فهو يحوي دروساً أتعلم منها

طرقاً لمعايشة البشر

_ الجـــزء الأخير _
.
.
طيب ياقلبي طيب ..ولافكرت بعدك هعــمل إيه ؟
وطيب ..وجرح قلبي طيب ..وجـــرح قلبي إزاي أنا حقدر عليه ؟؟.
.
أنتهت الدورة التدريبية وأستلمنا شهادة حضور ..
.
.
كل البنات هنوف ..وديمة ..وريمــا ..وأسيل ..ونوال إستلمو شهادات حضور لهالدوره وأنا أستلمت شهادتي وأستلمت قصة نوال ..
.
.
ظللت على علاقة مع البنات الى أجل ..وأنقطعت هالعلاقه بإنتهاء الدورة ..
.
.
لكن لا بأس برسائل من حين لآخــر..
.
.
أما نوال فقالت لي في آخر يوم : أنا ماتطلقت للآن ..جبت ولد ثاني وسميته فيصل ..والحين مع الوالدة كل خواتي تزوجوا والحمد لله باقي الصغيره ولا وحده تطلقت يمكن لإنهم ماتزوجو من رجل متزوج !
كل يوم أدخل النت وأتصفح المنتديات ..وشاغله وقت فراغي
وسمعت إن عبد العزيز ناوي يرجعني لكني رافضه تماماً الرجوع للإهانات مرة أخرى صحيح أحبه بس ما أقدر ...
.
.
نوال الآن في نظري أكثر قوة وبأسا في مواجهة وفهم الحياة من قبل
الآن عرفت هذا العالم المجهول البشع!
مجتمعنا رحيم مع العانس.....! ومتعاطف معها ولكنه ليس رحيم بالمطلقة فالمطلقة محكوم عليها دون حتى سماع وجهة نظرها أنها زوجة لم تعرف أن تعيش وأكيد زوجها عنده ألف سبب حتى طلقها .. والمجتمع يراها لقمة سائغة ..
صحيح بإنها غيرت لقب عانس الى لقب مطلقه لكنها لم تطلق حتى آخر مره رأيتها فيها ربما لم تطلق ..الى الآن ..لإني علاقتي معاها إنقطعت تقريباً فالدنيا ومشاغلها لا تدع لنا فرصة الإلتقاء مرة أخرى ..
.
.
ربما لازالت معلقة الى الآن ..وهذا أسوأ من الطلاق والعنوسة ..
.
.
.
.
.
.
كــــلي أمل بغدٍ مشرق
إنتهى

الله يعوضها خير ويكتب لها ماكانن الخيره
اكثر شي عورني لما تروش عندهاااااااااااااا
اللهم صل وسلم عى محمد