حبيبتي ام ميثا ..متهنين انشاء الله ..
وانا راي مثل اري البنات ...اللون فاتح وايد وما يستحمل يكون في جلسه عائليه ..
الستارة مسكاتها موحلوه ابدا وحاولي تشتري لها مسكات ارتب ..
الطاوله صغيرة جدا ومكانها مو مناسب ..
حاولي تضيفي من اللون البنفسجي في الاكسسوارات.... واضيفي قطعه سجاد بنفسجي ...وارمي بعض المفارش البنفسجيه على الكنب منها تحافظ على الكنب من الوسخ ومنها تخف من اللون الابيض السائد ..
وعلى فكرة حركه الصبغ المتموج طالعه حلوة ..
وهذا راي ولك القرار ..

NeeNee
أنا ما حبيت الغامق لأنه يضيق المساحات والفاتح يعطي اتساع والغرفة صغيرة جداً وبعدين أنا حاطة في بالي لوني المفضل البنفسجي الفاتح ويوم ما لقيت كنب بنفس الدرجة اللي أحبها خذت الوف وايت
أدريبه يتوصخ بس أحبه يانس :(
أما الــ RUG يالسة أدور عليه ألحين



نكوشه
شكراً حبيبتي :)


نـــور
أدري بس الأطفال ما أدخلهم هذي الغرفة ولا أنا أدخلها إلا وهم نايمين يعني حقي أنا وبو العيال مثل الجلسة :)

العنود القيد
الستارة قطعتين القطعة التحتيىة بنفسجية فاتحة والقطعة العلوية المزمومه بنفسية غامجة ومتناسقة مع صبغ الجدار لكن الصور مظلمة وما أعرف ليش!!
بخصوص الطاولة والأثاث كله جديد ما كمل شهر أما XL فما أدريبه وين في السعودية لأني من الإمارات
ياليت أخواتنا السعوديات يفيدنج

BINTalnoor
رايج على راسي وعيني :) ومشكورة عليه بعد
ونعم أحس ان هذي الجلسه بارده وأنا متعمدة أخليها جيه لأني أنا عصبية أصلاً وأبغي مكان في بيتي مريح وهادي أدري ان اللون الفاتح يتوصخ بسرعه لكن الحمدلله ان إيكيا عندها حل لكل مشكلة خذت لبستين للكنب زيادة يعني أغسلهم أول بأول وبعدين أنا أحاول قد ما أقدر ما أوصخ وحاطة مفارش كنب بنفسجية يعني مسوية احتياطاتي
أما النباتات أنا حاطة 3 منها وحدة في الزاوية و(لاكي بامبو على طاولة الطعام) ونبته ثالثة على الأرفف وين أحط نبتات زيادة؟؟ ياليت تعطيني رايج
أما طاولة الطعام فما أقدر أستغنى عنها لأن نيلس عليها الصبح أنا وزوجي نتريق والعطر نشرب الشاي وأحط عليها الحلوياات وأحياناً نتعشى عليها خاصة ان ما عندي في الفيلا مطبخ تحضيري والمطبخ في الطابق الأرضي وخارجي بعد يعني بعيد :(
أما بالنسبة للأطفال فممنوع عليهم الدخول لا لا لا لأن أنا عندي ولد (سنتين إلا شهر تقريباً ) مراوني نجوم الظهر أشقى ولد في العالم الله يخليه يتسلق على ظهر الكنبات والكراسي والأرفف ويتسلق عالأرفف ويقطع أوراق الأشجارويكسر الأغراض ما يعرف يلعب بألعابه يحب يتعبث بكل شي فسويتله غرفة تناسب المرحلة العمرية اللي يعيشا أرضيتها مغطاة بطبقة سميكة من المطاط عشان يمتص الصدمات وعشان بنتي تحبو ومافيها أثاث إلا جلسة أرضية لي يوم أيلس وياهم وهم يلعبون وطبعاً تلفزيون وخزانة ملابسهم وكل الألعاب سيايير قطارات دباديب ولكن كلها آمنه أنا أيلس وياهم فيها وأنا مرتاحة يا أشوف التلفزيون أو النت يا أنام وهم يلعبون والباب مسكر طبعاً مافيه أي خطر

ام رغد وغادة
اللون مب مشكلة لأنه تلبيسة وينغسل وحتى أقدر أشتري تلبيسات أكثر وبألوان أما بخصوص الستارة بعدني ما لقيت مسكة أنا رابطه الستارة المزمومه بخيط لووووووووووول لكن بفصل مسكة على شكل وردة
والسجادة وباقي الأشياء أكيد بدور عليها

هلا أم ميثا :
تحتاجين "في رأيي" , كم اطار للصور العائلية بلون البنفسجي اللي تحبينه بس يكونون بسيطين و من غير تعقيد + لوحة عليها المنظر اللي انتي ترتاحين للنظر له ( حديقة منزل مثلا ) + الطاولة الوسطية حطي عليها 3 شمعدانات متفاوتة الاطوال بس حجم صغير علشان ما تحجب الرؤية للتلفزيون ( تلقينهم عند هوم سنتر ) او ( هومز ار اص ) ( محل في الوافي في الدور الاخير تطلعين له بالمصعد بس عنده اشياء روعة و اسعار معقولة جدا ) وعلى الشمعدان شموع تناسب الجلسة ......
الاصيص اللي حاطته على طاولة الطعام , ليش ما تحطينه على الطاولة الصغيرة وتملينه ورد بنفسجي و اوف وايت لان الزاوية اللي فيها الطاولة الصغيرة تحتاج شئ يملاها , و خلي الورد اعلى من الاصيص ( شوفي محلات الورد مثل محل في الوافي عنده اشياء روعة صناعي بس غالي ) ... خذي افكار .... ايضا , طاولة الطعام تحتاج مفرش يغطي رجول الطاولة + ضعي عليها ما يسمى ( under plate ) فيه في الاماكن اللي ذكرتها , هو عبارة عن قطعة اما دائرية او مستطيلة يوضع غليها الصحن , تعطي منظر راقي للسفرة .
الاشياء اللي حاطتها في المكتبة , بصراحة مخربة المنظر , انتي ممكن تجملينها بطريقة اخرى , ضعي فيها مثلا صور عائلية بس لا تحشرينها و اختاري الوان الاطارات بطريقة متناسقة مثلا بنفسجي و درجاته .... بس اهم شئ لا تملينها علشان ما تفقد جمالها ,,,, اقتراح ليش ما تحطين المكتبة مايلة , يعني الزاوية وراها ؟؟ ضعي عدد من الكتب في جهة وعليها شئ يسندها " يباع في المحلات اختاريه مع الوان الغرفة " , وكتب في الناحية الاخرى من المكتبة ويسندهم اللي ذكرته ,,, في الوسط بينهم نبتة او صورة ,,شمعة .
الستارة تحتاج مسكات غير هذي ...... ( في جاهزين ارقى من التفصيل و الورد )
ليش ما تحطين ( بلاك اوت ) بيج او بنفسجي وراء الستارة , منها يحجب شمس الظهر , و منها يجمل الستارة بخلفية سادة ( تلقينه عند سيدار ) .
اختاري نبتات تكون اوراقها نحيفة و طايرة " كشة " :) / او اللي اوراقها طايحة " كشة هابطة " :) :)

السجادة تأكدي من الحجم اللي انتي حابته , ممكن تجي اكبر او اصغر من اللازم , انتي متري الحجم قبل لا تشترين .... جو هالجلسة مودرن , لذلك ابتعدي عن السجاد المشجر , دوري شئ فيه اشكال هندسية ....و نسبة الفاتح اكبر على السجادة / ايضا ضعي اباجورة صغيرة لتضفي جو هادئ و رومانسي للجلسة مساء .اضيفي القليل من الاكسسورات و لا تحشرين الجلسة , و الا فقدت هدوءها .... شوفي الاماكن اللي ذكرتها و شوفي لايف ستايل ...
ترى انا مب من اهل دبي بس اعرف الاماكن اللي فيها ... لاني احبها و احب اهلها جدا !