صينية بطاطس بالتونة

أهلاً أهلاً صبحكم الله بالخير صباح الخميس الونيس صباح الجو اللي يفتح النفس ياربي ياحبيبي 💜💜أمس سويت صينية بطاطس بالتونة و أول مره بصراحه بالنسبة لي أجربها يعني تونه مع بطاطس ماتوقعت المكس هذا بيطلع لذيذ بهالشكل كانت فطور ومن لذتها تسحرنا عليها بعد ما شاء الله 😂❤️مالكم بالطويلة طريقتها سهههههله ومقاديرها أسهل :- تحتاجين خمس حبات بطاطس كبيرة قشريها وقطعيها شرايح - ثلاث علب تونه صغيره - كزبرة - فلفل رومي حبه وحده كبيرة تقطعينها صغار- فلفل أخضر حار تقطعينه صغار - جبن سايل - علبتين قشطة - صلصة حمراء الطريقة : تقلين البطاطس اللي قطعتيه بعدين تحمسين التونه مع الكزبرة والفلفل الرومي والفلفل الحار وحطي البهارات اللي تبين أنا حطيت فلفل أسود شوي وكركم شوي وصلصلة حمراء شوي 😂 كلهم شوي ، وتقصرين على النار تقريبا عشر دقايق بعدين تجيبين صينيتك وتصفين فيها البطاطس بعدين فوقها التونه .الصوص :ست ملاعق جبن وقشطة تحركينهم لين يتجانسون مع بعض بعدين صبيها فوق الصينية وحطي رشة اوريقانو ودخليها جوا الفرن بس منن فوق لين تتحمر وبعدين كلوها بخبز مفرود وبالعااااااافية 😍😍😍كذا يصير شكلها * موب حقتي الصورة بس أوريكم الشكل عشان اغريكم تسوونها  😂👍❤️