صينية مقبلات .. من تقديمي

مسا الخيرات او احلى صباح عليكي وتسلم ايديكي بنت ديرتي بس الماجي احطه مرتين والا كيف راجعي وصفتك

مساء النور نهي حبيبتي
الله يسلمج يارب
اسفه الماجي نحطه اول شي مع الفلفل الاخضر بس حركيه على طول وخففى النار عشان مايحترق ولاتكثريين الزيت لان الماجي فيها دهن .. لاني احب احمس الماجي مع البصل .. واحب احمس الفلفل الاخضر مع البصل عشان يتغير لونه ويصير طعمه احلى

طبعا يمكن فيه وحده تحب تحط الماجي بعدين عادي بكيفها
مشكوره على الرد :26:

( الصنف الثاني )

هذا الصنف بسيط
طبعا الهدف من صينيه المقبلات هذي انها تضم اصناف سهله وخفيفه وماتتعبج

المقادير

- خبز صاج جاهز او اللي متعود يسوي يسوي براحته
- جبن حلوم مقطع شرايح رفيعه شوي
- طماط شرايح بدون اللب الداخلي ( عشان مايطلع عصير طماط )
- زعتر ( اللي فيه سمسم مو الخضره )
- زيتون مقطع بدون لب
- شوية نعناع مفروم

هذي تقريبا مثل الشاميات

ناخذ الخبزه ونلفها وتصير نص دائره وبعدين نلفها وتصير ربع دائره وبعدين نقطع اطرافها عشان تصير مستطيله
نحشي الخبزه بكل المقادير الباقيه بشكل مرتب ومانكثر حشوه واخر شي نحط شوية نعناع فوق الحشوه وبعدين نلفه عدل مثل الرول ونقطعه رولات صغيره
طبعا تقدرين تقدمينها جذي بس بتنفك عليج وبتفشلج
انا حطيتها في شواية وسكرت عليها شوي لحد ماتحمرت شوي وصكت او بالفرن تتحمر من فوق
بس صدقيني الشواية احسن عشان تصك
فيه ناس فاضيه تييب جزرة طويله وتقطع خيوط رفيعه وتلف على كل قطعه مثل الشريطه

بعدين صفيها بالصينيه عند التوست ورشي على كل وحده شوية زعتر للمنظر او ممكن تخلينها جذي

طبعا ممكن تسوين اي عدد من الخبز وممكن تحشين الصاج بأي حشوه مثل فلافل ولبنه(ترشين على الوجه شوي سمسم ) او بطاط وزهره وباذنجان عقب ماتنشفينه عدل من الدهن او دجاج مسحب مع مايونيز مع خيار مخلل وليمون ( وترشين على الوجه شوية سماق) او نقانق وجبن سلايسز او مرتديلا تصفينها بشكل طولي على الخبزه وفوقها جبن سلايسز وقطع خيار طوليه رفيعه عشان اذا قصيناها تعطي شكل حلو
بس انا عطيتكم اسهل حشوه
وبصراحه انا ماقريت هالصنف لانه سهل والواحد ممكن يبتكر خصوصا ان اكثر المطاعم تقدم شاميات الحلوم بس البيت احلى وانظف

وبالعافيه :cook:

الله الله عليك حبيبتى لاتنسو اسرانا القمرررررر :26:

اولا نووووووورتى قسم المقبلات بطلتك الحلوه

ثانيا ايش هل الفن رووووووووعه عيونى

وسهله وبسيطه وتنفع للازمات وراح اجربها وارد لج خبر

والله يعطيك الف عافيه وتسلم الايادى يا عسسسسسل

وننتظر المزيد منك حبيبتى

تحياتى
ام علاء

:21::21::21:

رووووووعة أختي.. ماشالله كلهم حلوين.. خاصة الحشوات مع خبز الصاج..

تسلم ايدج والله يعطيج العافية