ضربني على راسي

السلام عليكم .. مثل ماهو بالعنوان ضربني على راسي وشد شعري وصار اللي صار الآن ابي كيف اتعامل معه

اخواتي من الآن استبعدو اني ادخل اهلي بالموضوع لأسباب خاصه جدآ

السالفه اليوم كنت طالعه الحديقه مع اهل زوجي وجاراتهم علاقتي معهم عاديه موب رسميه لكن عاديه جدا ولا فيه احتكاك وميانه قويه من تزوجت كذا

وانا وبناتي صارلنا فتره نقول لزوجي نفسنا نسافر نطلع برا السعوديه حلم بالنسبه لنا ماقد طلعنا
وبناتي يبكون يابابا كل صيفيه كذا يابابا ويابابا يرفض رفض موب طبيعي لا سألناه ليه يقول لاتسألوني كذا مزاجي

لكن هو يسافر كل مكان كل مكان واكثر مكان اندونسيا ولا قلت ليه انت يقول موب شغلك ماخذك منك شي
دافعه لي ( مع العلم انا موب موظفه ربة منزل )

قبل كان يقول محمول مكفول الآن يقول دافعه لي شي ماخذ منك شي عندك اربع جدران اضربي راسك فيها

المهم طالعين الحديقه وهو قايل لاهله انو انا وبناتي ودنا نسافر وجاي يعلمني تراني علمتهم ان ودكم تسافرون قلت ان شاءالله بتسفرنا وجلس يضحك ضحك قوي وسويت نفسي ماتضايقت

ويوم جلسنا بالحديقه جابو طاري السفر هم وجاراتهم اللي بتسافر خارج المملكه واللي قريب بالمملكه واللي واللي

اخت زوجي ذي مدري ليه دايم تسوي معي كذا قالت لي فلانه بتسافرون قلت اذا الله كتب ضحكت ضحك قوي مثل ضحكة اخوها وانقهرت ورجعت سألتها وانتي بتسافرين قالت ايه انا وخواتي قلت ماشاءالله هي دايم تسافر مع زوجها بس هالمره قالت انا وخواتي وسكتت وشي وسكت انا قالت فلان بيودينا قلت صدق قالت ايه عندك شي قلت لا قالت ماخذين منك شي دافعه لنا وتضحك زي كلام اخوها انقهرت وقلت الله يسعدكم وين بتسافرون سمعتني جارتهم وتعتبر صديقه لهم قالت ليه منتي رايحه معهم حسيت انا حتى الجاره عندها خبر وانا زوجي اللي بيسفرهم ماعلمني ولا عندي خبر قلت لاوالله ماعندي خبر وسكتنا ورجعنا البيت قلت فلان انت صدق بتسافر مع اهلك وجه تغير قال لا قلت احلف صدق قال قلت لك لا قلت اذا كنت بتسافر الله يسعدكم لكن انا وبناتك ماراح نحللك قال يالكلبه منتي محلله عشان سفر وجهك انتي وجه سفر قلت شفيه وجهي وليه السفر له وجيه معينه قال ايه وجيه ناس تجيب الخير ماتسد الرزق ضحكت انا قلت اخر شخص يتكلم عن الوجه والشكل انت ( والله يابنات من قهري مدري كيف طلعت مني ) من تزوجني يابنات وهو يقول انا مزيون وانا الف وحده تمناني وانا وانا وانا .. وهو ولا وحده من اللي قالها فيه لكن رضينا بالهم والهم مارضا فينا المهم قال انا ولد فلان والله ان قمت لا اصمخ وجهك بالجدار اخلي عيونك تشوف قلت ايه ما اشوف انا لو كنت اشوف ما طافت علي اشياء كثير قال وشي الاشياء اللي طافت عليك قلت اولها تخطيطك للسفر مع اهلك وانا وبناتك كل سنه نترجاك قال حريمتك قلت انا راضيه حريمتي بناتك وش ذنبهم قال معك حريمتهم سكت انا .. وشوي قلت يغنيني الله وكنت جالسه اكل قدامي اكل قال يغنيك وانتي تاكلين من خيري زعلت انا وحز بخاطري مابقا الا هذي وقمت قال ارجعي كملي اكل قلت الحمدالله شبعت قال والله ان مارجعتي لا اسحبك مع شعرك مثل الورع قلت والله ما ارجع وانا رايحه مادريت الا هو وراي وضربني على راسي وشد شعري ورجعني مثل الورع صدق سواها وجلسني قدام الاكل غصب وجلست ما اكلت وانا ابكي جلست افضفض اللي بصدري قلت حارمنا من كل شي طلعه اكل سفر صديقات جارات بس مقابلتك وان خليتني اقابل اقابل اهلك قال غصب عنك مو طيب منك قلت لا مو غصب ماعاش من يغصبني قال تعقبين عشت وهذاني قدامك بعدين قال كلي بدون صوت ويجلس يقلد صوتي وانا ابكي يستفزني بزياده وانا اساسا ما اكل جالسه كذا قدام الاكل شوي قال وشدراك بنسافر قلت فلانه قال تكذب عليك قلت طلعت من خاطري السفر والطلعات مانبي منك شي وقمت ودخلت فراشي ونمت والحين صحيت علموني وش اسوي احس بداخلي غصه وجرح كأني فعلا ورع من ضربه لي مالي نفس اطالع بوجهه حسيت بكره له وكره شديد ماكرهت انسان كثره