نيفووو انا هرغى واحكى على كل حاجة بالتفصيص الممتع زى مابتقولى
بس انا عاوزة الاول اطمن على المشتاقة وطمطم وشيمولاتا
يانهار ابيض دول كلهم عاوزين نطمن عليهم؟؟؟؟
هم هنجوا مننا بسبب الرجيم ولا ايه
ولا دى حالة اكتئاب بسبب الرجيم

طمنونا عليكو يابنات ماينفعش كده

صبايا
وحشتوني كتير
يارب يرزقنا اجمعين بتؤام

صباح الخير عليكم كلكم يا بنات.....مش عارف ليه شامم لون حزاينى فى التجمع كله....مش احنا اتفقنا يا جماعة اننا نتكلم مع بعض و نشيل عن بعض.....بجد لازم تيجو تطمنونا عليكم..و الكلام ده بالأخص ل لطمطم و شيمولاتا و مشمشة و أنتى كمان يا نيفو قلتى هتقوليلنا كنتى غطسانة ليه و سكتى بعدها....يلا فى انتظاركم...

بوبا....ربنا ميحرمنيش منك يا عسل ....و يجعلنا جميعا من دعائك نصيب..و طبعا لكى بمثل....و يجازيكى كل خير و يفرح قلبك دايما.....أوعى تزعلى أنا كنت بانكشك...و قلت لو كنتى مافتكرتيش أنوس ...تدعيله كده و انتى لسه راجعة طازة....عموما يا سكر أنا كمان هانتظر التفصيص الممتع بتاعك بكل شوق الدنيا....

هى مين دى اللى تزعل......؟؟؟؟
انا :04:

لا ماتقلقيش انا عمرى مابزعل ابدا الحمدلله
وعارفة ان كل اللى هنا بيحبوا بعض وبيخافوا على بعض

انكشى يا ام انس براحتك وزغزغى كمان

تعالوا بقى لما احكيلكم بالتفصيل على احلى رحلة فى الدنيا رحلة العمر

شوفوا بقى احنا اتحركنا من هنا يوم الخميس الساعة 2 الظهر وصلنا مكة بالسلامة يوم الجمعة على صلاة العصر بالظبط
يادوب حطينا الشنط فى الفندق ولحقت اخر ركعتين فى العصر برة فى الحرم من الخارج

وكنا انا وجوزى سوا سيبنا الفوج اللى رايحين معاه وروحنا نعمل العمرة لوحدنا
انا وهو اول مرة نروح وطبعا مش عارفين الطريق المباشر اللى يوصلنا للكعبة على طول
وكان الفندق اللى نازلين فيه اقرب شئ للمسعى(الصفا والمروة)
فكان اول دخولنا للحرم على الصفا والمروة على طول وبعدين دخلنا من باب كده ونزلنا سلالم وانا حاسة اننا
ماشين غلط انا عاوزة اسال على طول على الكعبة واروح لها مباشرة بس جوزى قالى امشى وخلاص لغاية مانلاقيها
وبعدين لقيت البرادات اللى فيها مية زمزم وكنت عطشانة جدا بس قولت التزم بمناسك العمرة بالترتيب ومارضيتش اشرب
مع انكم بقى مش هتتخيلوا انا بحب مية زمزم قد ايه كل الناس اللى اعرفها بتقولى طعمها متغير عن المية اللى بنشربها
بس انا كل ما اعرف حد قريب منى رايح عمرة اطلب منه ميه زمزم

المهم احنا ماشيين ومش عارفين الطريق المباشر اللى هيودينا للكعبة وعمالين ننزل فى سلالم والناس حوالينا
كل واحد فى حال اللى بيصلى واللى بيدعى واللى نايم واللى خارج واللى داخل وانا مبهورة
وحاسة انى دخلت دنيا تانية اول مرة اشوفها دنيا كلها هدوء وسلام
ولقيت عواميد كده قدامى وساحة كبيرة بننزل منها بسلالم
وفجأة شفت ستاير الكعبة لاول مرة فى حياتى على الحقيقة مش فى التليفزيون
وبالرغم من انى عمالة طول الطريق ادعى وافكر اول ما اشوف الكعبة هقول ايه وادعى بإيه
لقيتنى انا واجوزى اتسمرنا فى مكانا وماقدرناش نتحرك خطوة لا لقدام ولا لورا
وعنيا على الكعبة مش قادرة حتى ارمش بيها وكل ذرة فى كيانى بتتنفض
ومش قادرة افرح ولا اعيط ولا افكر فى اى حاجة ولا حتى ادعى
لغاية زى ماتكون حاجة هزتنى لقيتنى رحت داعية بأول حاجة جت على لسانى وبدون تركيز ولا تفكير فى اللى قولته
دعيت بدعاء دايما بدعيه فى سجودى من وانا صغيرة اللهم اغفر لى ولوالدى وللمسلمين اجمعين واقبضنى من الشهداء

ولا بقى جيبت سيرة حمل ولا ذرية ولا صحة ول اى حاجة فى الدنيا
ومش عاوزة اقول لكم انا كنت رايحة ومتخيلة انى هلاقى الدنيا رايقة وكأنى هبقى لوحدى اللى بطوف
لقيت امم وبشر كتييييييييييييييييييييييييييييييييييير
ومن كل الاشكال والالوان والجنسيات وبدأنا الطواف وبدون تفكير بقيت ادعى واعصر دماغى عشان افتكر الناس كلها اللى مأمنانى بالدعاء
انا كنت كاتبة الاسامى فى ورقة بس من لخبطى نسيتها فى الشنط فى الفندق
ولا خدت مناديل ولا شمسية ولا كمامات ولا مصلية ولا حتى المقص اللى هقصر بيه شعرى بعد العمرة

وطبعا كان كل ذرة جواية بتزقنى عشان المس الحجر الأسعد بس للاسف ماقدرتش ابدا ولا حتى فى طواف الوداع
حتى جوزى بالعافية لمسه بس ماقدرش يقبله زحمة مووووت حتى الناس قدامه بتنسى انها فى الكعبة
وتضرب بعض وتزق بعض وده طبعا حاجة غلط جدا مش عشان نتبع سنة للنبى نموت بعض فلقيت انى الافضل ارفع ايدى
واقول الله اكبر اقتداءا بالرسول عليه افضل الصلاة والسلام

وبعد الطواف صلينا ركعتين خلف مقام ابراهيم وبعدين رحنا شربنا من مية زمزم لغاية ما ارتوينا
وانا بقى كنت بشرب بإفترا لانى عطشانة جدا وبقيت ادعى جامد قوى وانا بشرب من مية زمزم

وبعدين رجعنا للصفا والمروة و بدأنا السعى سبعة اشواط وكنت بتخيل لهفة السيدة هاجر وهى بتسعى بين الجبلين
عشان تلاقى اكل او ميه لسيدنا اسماعيل وكنت متخيلة انى فعلا هشوف الجبلين الصفا والمرة لكن طبعا مش موجودين
وبالرغم من اننا بنسعى فى مكان مكيف ومفيش حرارة للشمس ورخام مبرد وكل وسائل الراحة موجودة
بس فعلا على اخر شوطين انا كنت خلاص هيغمى عليا من التعب تخيلوا ان من يوم الخميس الظهر لغاية وقت السعى كده
وانا قاعدة فى اتوبيس لا عارفة افرد جسمى ولا اتحرك ولا حتى نمت للحظة واحدة واتلطعنا كتير قوى يجى 9 ساعات
على منفذ السعودية عشن التفتيش والبصمات والذى منه وماريحتش دقيقة فى الفندق يادوب حطينا الشنط ونزلنا للعمرة
وبعد ماخلصنا السعى رحت عشان اقص جزء من شعرى ولقينا المغرب بيأذن فصلينا المغرب

مش عاوزة بقى اقول لكم مع انى صليت اخر ركعتين من العصر فى الحرم من برة
بس الصلاة قدام الكعبة احساس تانى خالص انا كنت خايفة انى ما اقدرش اخشع فى الصلاة
بس الواحد غصب عنه بيخشع وطبعا ما اقدرتش تكون الكعبة قدام عينى واخلى نظرى فى موقع سجودى
كانت عينى على الكعبة على طول ماقدرتش انزلها للحظة
فعلا يابنات الكعبة ماشاء الله غير مابنشوفها فى التليفزيون خالص يمكن عشان تصوير التليفزيون مش بينقل جمال الصورة زى مابنشوفها بعينا المجردة
ليها رهبة وجلال كده تخلى اللسان يتعقد عن الكلام والعقل مايفكرش فى شئ غير فى ان ده هو بيت ربنا على الارض
وان فوقيها مباشرة عرش الرحمن يحمله 8 من الملائكة والبيت المعمور ويطوف بيه 70 الف ملك
وفضلت بقى اتخيل لما فيل ابرهة جه عشان يهدمه وبرك فى مكانه ماقدرش يتقدم خطوة واحدة اتجاه البيت
والطير الابابيل اللى رمتهم بحجارة من سجيل واتخيل يوم فتح مكة لما دخل سيدنا محمد صلى الله عليه وسلم منتصرا
يااااااااااااااااااااه فعلا والله احاسيس سبحان الله كنت اول مرة احس بيها فى حياتى

يارب كل اللى نفسه يطلع عمرة او حج تيسر له الامور كلها وتسهل له الطريق لها وتمتعه زى ما انا اتمتعت هناك

وقعدنا فى مكة ليلتين وبعدين يوم الاحد الصبح رحنا على المدينة انا كنت متضايقة جدا اننا ماقعدناش فى مكة اكتر من كده
بس اللى كان مصبرنى شوية اننا رايحين مدينة اشرف الخلق صلى الله عليه وسلم والمشوار من مكة للمدينة تقريبا 6 ساعات
والحمد لله صلينا الظهر فى مسجد قباء(اول مسجد فى الاسلام)
وبعدين فجأة واحنا فى الاتوبيس واول ماقربنا من الفندق وهو قدام الحرم النبوى على طول راحت واحدة ست من اللى معانا صرخت
اول ماشافت المكان اللى مدفون فيه النبى عليه افضل الصلاة والسلام
وفضلت تقول حبيبى رسول الله هنا ..............حبيبى رسول الله هنا بحالة شبه هيستريا
خلت جسمى كله اترعش من الفرحة ان ربنا اكرمنى واخيرا وصلت للمكان اللى عاش فيه سيدنا محمد صلى الله عليه وسلم
وحالة البكاء اللى هى فيها اتنقلت لى وبقى جسمى كله يترعش واول حاجة عرفناها ان مواعيد الزيارة للنساء للروضة الشريفة
من 6 الصبح ل 8 ومن 12 ل1.30 ومن 10مساءا ل 12
واحنا وصلنا تقريبا على 2.30 يعنى كان لازم اصبر لغاية 10 مساءا عشان اقدر اروح واصلى فى الروضة
واشوف قبر الرسول صلى الله عليه وسلم وصليت العصر والمغرب والعشا وفضلت مستنية على نار
عشان اشوف بيت وقبر حبيبى صلى الله عليه وسلم واصلى فى الروضة
واتصدمت اول مادخلت الزيارة لقيتهم مقسمين الدخول على حسب الجنسيات يعنى الاول يدخلوا الاسيوين
وبعدين الفرس(الايرانيين) وبعدين العرب (مصر وسوريا والاردن ولاجزائر والمغرب والعراق وبقيت الدول العربية )
فا اتضايقت قوى انا بعد ماوصلت لقرب الروضة مابقاش عندى ذرة صبر واحدة تخلينى اقدر اقعد والمرشدات هناك صعبين قوى
ماينفعش يدخلونى مع اى جنسية غير العرب ففضلت اعيط وانهارت من كتر العياط لانى فعلا مكنتش قادرة اصبر
انا قاعدة من الساعة 2 على اعصابى ودلوقتى كمان مكانوش راضين انى ادخل واستنى للاخر خالص
فصعبت على واحدة من المرشدات السعوديات اللى فى الحرم قالتلى حاولى تدخلى وانا هعمل مش شايفاكى
لو ربنا رايد هتدخلى بس لو رجعتك واحدة من المرشدات اللى هناك لازم ترجعى
لقيت نفسى غصب عنى مش بمشى ولا بجرى لا..... بطير على الارض لغاية ماوصلت لاول الروضة
انا مش عارفة دخلت ازاى من غير ماحد يوقفنى ولا يرجعنى واول ما شوفت السجاجيد الخضرا بتاعة الروضة
رحت وقت فى مكانى وصليت ركعتين لله مش عاوزة اقول لكم بقى كام واحدة وقعت عليا
وكام واحدة فرمت ايدى ورقبتى وانا بصلى ووأنا ساجدة............................. زحمة ماتتخيلوهاش
وفضلت احاول اتقدم عشان اشوف منبر الرسول بس للاسف هم عاملين فاصل بالقماش المتين ماحدش من الستات يقدر
يقرب من المنبر او يوصل لاول الروضة من ناحية البيت ولا حتى يشوف فين بالظبط غرفة عائشة اللى مدفون فيها النبى صلى الله عليه وسلم
وكل ما اتقدم اصلى ركعتين واتداس برضه بس مش حاسة باى وجع ولا اى حاجة
بس كل اللى تعبنى التصرفات الخطأ اللى بتعملها الايرانيات فى صلاتهم وفى معتقداتهم من الكتابة على الرخام وبلاط وسجاجيد
المسجد بأصابعهم لدرجة انى مكنتش عارفة اركز من الحاجات الغلط اللى بيعملوها وساعتها فهمت ليه مقسمين الدخول بالجنسيات
وكل جنسية مع بعضها وحمدت ربنا اننا عرب مسلمين
وبعد ماطلعت فضلت واقفة استنى العرب بقى ادخل معاها لانى حسيت انى مكنتش عارفة اركز فى دخولى الاولانى
ولان مواعيد الروضة صعبة قوى وخفت انى ماقدرش اجى تانى واقدر ادخل ففضلت لغاية 12.30 تقريبا ودخلت مع العرب
وصليت فعلا فى هدوء وفضلت اتخيل الرسول صلى الله عليه وسلم لما كان بيقف على المنبر ويخطب بالناس
وازاى المنبر والبيت قريبين جدا من بعض وفضلت ابكى لما تذكرت وقت وفاته وانه عانى من الحمى وشعر بسكرات الموت
وحبيت السيدة عائشة قوى لما عرفت هى قد ايه ضحت بإنها تدفن جنب حبيبها رسول الله صلى الله عليه وسلم
وآثرت سيدنا عمر على نفسها لما استأذنها انه يدفن جنب الرسول صلى الله عليه وسلم

يارب يرزق حبيباتى فى الله جميعا الصلاة فى الروضة الشريفة فى الدنيا
ويرزقهم شربة هنيئة من يد حبيبنا محمد صلى الله عليه وسلم فى الجنة

عاوزة اقول لكم وانا ماشية من المدينة كنت بعيط وحاسة انى سايبة قلبى هناك فى المسجد النبوى
وفضلت ادعى ربنا انه ييسر امورنا ونرجع هناك تانى

يارب