السلام عليكم ورحمه الله وبركاته
ايه يا شباب انتوا نموسيتكوا كحلى ولا ايه .. انتوا فين ..

أم أنس .. لا ياحبيبتى مش مدب ولا حاجه احنا زى ما قلت لك بنستفيد من آرائنا المختلفة ..
ايه يا طماطم فينك يا حبيبتى .. نوفى.. اشتقت اليك.. بوبا .. انتوا فيين صباح الفل

يا خبر محدش دخل من الصبح ؟؟؟ ايه الحكايه هو مفيش غيرى ولا ايه ..؟؟ لا بجد انا بدأت اقلق انتوا رحتوا فين ؟؟ مالكوا ايه اللى جرى الفايل بتاعنا بدأ يتراجع ليه ..؟؟ لا تعالوا بليز ولا علشان اوشى مسافرة كلنا هنسافر وراها ولا ايه .. ايه يا نيفو مالك يا حبيبتى حرمانه من طلتك علينا ليه انتى وفاطمة .. ها يا طمطم قررتى تسافرى العمرة امتى بأمر الله .. يالا يا بنات انا مستنياكوا ..

انا هنا يا حبيبى ومقدرش ابعد عنكم بس زى ما انتو عارفين يوم الجمعة دة بتاع أمى ويوم السبت حماتى بس رجعت بدرى علشان انتو وحشتونى مووووووووووووووت
اما يا ام فستك يا حبيبتى انا ان شاء الله هسافر يوم 20\4 وطبعا مش هنساكو كلكو فى الدعاء من غير ماحد يقول ربنا يكرمنا جميعا بزيارة الحبيب المصطفى صلوات الله علية ويكرمنا جميعا الحمل السليم المعافى ويكرمك يا رمال بساعة سهلة ويجلنا فستك ينور الدنيا زى الواد كلاوس وانتى كمان يا كوكر والتجمع يتملى علينا عيال
بوبا ربنا يفرج همك يا حبيبتى ويكرمك وما يحرمك امين يارب العالمين
نيفو وحشتينى يا عسل التجمع
اوشى هتوحشينى يا مضروبة
شوشو ازيك وازى انوستى سلميلى علية
ام انس وحشانى يا قمر
ام مريم وحشتينى يا قلبى
باقى البنات انتو فين

السلام عليكم ورحمة الله وبركاته

انا طبعا وقبل اى شئ سعيدة جدا
انكم مانستونيش فى دعائكم

لانى فعلا محتاجاه قوى
انا عاوزة اطمنكم عنى وعاوزة افضفض معاكم شوية
انا طبعا قولتلكم انى هعمل تحاليل هرمونات تانى عشان اطمن
ورحت عملتها ولسة النتيجة ماطلعتش لانها بتظهر بعد اسبوعين
فقولت على ماتظهر النتيجة وبعد البريود ماخلصت اروح اعمل سونار عشان اطمن
على الكيس اللى كان عندى على المبيض
فالحمد لله على كل حال لقيت حجمه زاد من 1.5 سنتم
وصل ل4 سنتم وفى كيس كمان صغير على المبيض التانى
الحمد لله والشكر لله فى السراء والضراء
ومبقتش عارفة اتصرف ولااعمل ايه لانى كنت مقررة انى انزل مصر
فى شهر 8 بس حصلت ظروف مش هتخلينى اقدر اسافر السنة دى خالص
وطبعا حجم الكيس هيزيد وانا خايفة اعمل العملية هنا
ومش عارفة اذا كان فى دكاترة كويسين هنا بيعملوها ولا ايه
وفجاة لقيت نفسى باخد قرار انى انزل مصر بعد اسبوع
وده معناه انى اسيب شغلى هنا ويمكن ماقدرش كمان ارجع هنا تانى
لان اقامتى فاضل عليها تقريبا شهر وتنتهى وانا حاليا ماشية فى اجراءات تجديدها
يعنى من كل الاتجاهات فى مشاكل ومش قادرة اقرر ايه اللى هعمله
لو نزلت مصر اعمل العملية مش هقدر ارجع واكون مع جوزى هنا تانى بسهولة
يعنى هتبقى ايه الفايدة اعمل العملية وافضل بعيد عن جوزى
عشان كده كنت حاسة انى فى محنة شديدة قوى
لانى كان عندى امل ان ربنا يكرمنى ويحصل حمل
بس الدكتورة عقدتها فى وشى قالتلى الكيس على الشمال
وكمان ممكن يسبب التصاقات وانسداد للانبوب السليم

ووزى لما لقى حالتى النفسية بتدهور صمم نروح لدكتور نتأكد
وفعلا الدكتور اكد نتيجة السونار بس قالى مش ضرورى العملية دلوقتى
وانى قبل العهملية لازم اخد حقنة قى البطن تحت الجلد توقف نشاط المبايض وتوقف
البريود كمان لمدة 3 شهور عشان يشوف الاكياس يمكن تختفى مع العلاج ده
وقالى انى حتى لو عملت العملية فى احتمال ان الاكياس ترجع تانى
وانهم بعد العملية برضه بيدو نفس العلاج عشان يوقفو نشاط الاكياس

والمشكلة ان اول عيادة دكتور قابلتنى دخلتها انا وجوزى مفكرتش انه يكون كويس ولا لا
لانى معرفش مين الدكاترة الكويسين هنا
وياريت لو كوكر او ريهام يعرفو دكتور كويس هنا يقولولى عنه
قبل ما ابدا فى الحقن دى لانها طبعا هتوقف نشاط المبيض وده شئ مش سهل
وكمان تمنها هنا غالى جدا تقريبا 1800 جنيه مصرى للحقنة الواحدة
فمش عاوزة اغامر وارهق نفسى ماديا وجسديا لو مافيش فايدة منها

معلش انا كلامى ملخبط وتايهة مش عارفة اشكركم واحدة واحدة على دعائكم ليا
بس ماتنسونيش وادعولى ربنا يفك الكرب ده ويفرج همى
وانا كمان هدعيلكم معايا لان اللى بيكون فى محنة ويدعى لللمؤمنين ربنا اكيد بيستجيب منه

حبيبة قلبي بوبا
ربنا يكرمك و يفرج كربك و ينور بصيرتك و يهديكي لكل اللي فيه الخير و يشفيكي و يعافيكي و يرزقك من حيث لا تحتسبي
بصي يا حبيبي 000خلينا نفكر سوا بهدوء عشان نرتب افكارنا و نشوف ربنا هيهدينا لأيه
اولا 000 انت بتقولي ان الدكتورة قالتلك انه لازم عملية و الدكتور التاني قالك لا مش لازم يبقى كدة عندنا رأيين عكس بعض
الحل اننا نشوف رأي تالت يرجح واحد منهم و ان شاء الله يكون فيه الخير و بأمر الله كوكر ترد عليكي في موضوع الدكاترة دة و هي ربنا يكرمها مش بتتاخر على اي حد بالمساعدة
و طبيعي انك تستني على الحقنة و مش تاخديها غير اما تروحي لدكتور تالت 000 و احنا متفقين ان راي الدكاترة امر مش بيكون مسلّم بيه طول الوقت
و كمان عندي اقتراح 000انت كنتي قلتي انك بتراسلي د / عادل 000 طيب ما تبعتيله تاخدي رأيه في الموضوع ( دة بجانب انك هتروحي لدكتور زي ما اتفقنا ) و يا ريت لو تقدري تبعتيله صورة السونار و نشوف هيقولك ايه و اعتقد من خلال كلام البنات عنه و احسبه كذلك انه انسان محترم جدا و مش هيبخل عليكي بالنصيحة
ثانيا 000بالنسبة لاقامتك و شغلك 000انا من رأيي و انت طبعا حرة في الاخذ به او لأ000 الغربة يا حبيبتي مش سهلة و زي ما بتقولي ايه فايدة انك تعملي العملية و انت مش هتقدري تكوني جنب جوزك؟؟؟؟؟؟؟؟؟؟
يبقى نصبر لحد ما نخلص اوراق الاقامة بتاعتنا على مهلنا علشان اما نقرر ننزل مصر نكون مرتاحين نفسيا و كل امورنا مستقرة بأذن الله تعالى
بالنسبة لشغلك انا طبعا مش عارفة طبيعته ايه بس خليه آخر حاجة تفكري فيها بعد ما تكوني استقريتي على كل حاجة و عرفتي هتعملي ايه000و اعتقد انك ممكن بعد كدة تقدمي على اجازة و حتى يا ستي لو لا قدّر الله مش نفع ترجعي شغلك هيبقى الهدف اللي عندنا و اللي كل شيء يهون عشان خاطره و ان شاء الله تتلخمي في الحمل و الولادة و مش تحتاجي شغل و يا رب يوسع رزق زوجك و يرفع من قدره و يعلي مراتبه ( على راي جدتي الله يرحمها )
ثالثا 000 مش انت يا حبيبتي كنتي واقفة العلاج طوووووووول الفترة اللي فاتتت؟ 000 و اعتقد ان دة سبب زيادة حجم الكيس 000معلش بس اصبري لحد ما نشوف الدكتور هيقولك ايه و كل مشكلة ليها حل يا حبيبتي
بس الصبر و الحمد لله انك دخلتي فضفضتي معانا عشان تهدي و تقدري توصلي للقرار السليم و نصيحتي ليكي بلاش تتسرعي و تمهلي اوي لانك زي ما بتقولي القرار مش هياثر في اتجاه واحد بس لا دة له 3 ابعاد ( ماديا و شغلك و اقامتك )
يبقى نصبر يا حبيبي و نفوض امرنا لله و ربنا قادر يحلها من عنده
رابعا 000 مش عارفة هتصدقيني و لاّ لأ لو قلتلك انك في بالي على طووووول و بالذات و انا بصلي و الحمد لله رب العالمين بدعيلك و انا ساجدة كمان ( يلا يا عم اي خدمة 000دعوة نقاوة اهيه000جاية بواسطة من على وش القفص )
خامسا 000و سادسا 00 و عاشرا و مليون كمان 000 الصلاة و الاستخارة ثم الدعااااااااااااااااء و طبعا انت مش عاوزة توصية 000ربنا يقوي ايمانك و يرضيكي و يراضيكي ( دعوة تانية اهيه من دعوات جدتي ) شوفتي طلعتلك كل الورث و الزبد
بدعيلك من قلبي000ربنا معاكي يا حبيبتي و قادر يفرك كربك و يكشف همك و ينور بصيرتك و يزيل غمك اللهم آمين
و ابقي طمنينا عليكي دايما