سويت لحمه مفرومه بالخضار وهي تناسب ريجيمي مع اني خربته بالخبز المفروض مااكل خبز بس زوجي جايب تميز حار وشكله يجنن قلت يلا الليله وبس والله يستر وسويت بعد رز سليق لبنتي وولدي يحبونه وكليت معاهم بعد يعني الليله تخبيص في تخبيص بس والله حرام لي اسبوع محرومه من الخبز والرز
ياكثر هذرتي نبدا باللحم مع الخضار
المقداير:
1-لحم مفرومه
2-نص كيس خضار مجمده ا
3-3ملاعق معجون طماطم
4-بصل وفلفل اخضر
5-بقدونس
6-ملعقه خل
7--ملعقه كبيره جبنه سايله
والبهارات ملعقه كاري وبزار وملح وكمون
الطريقه:
نقطع البصل والفلفل ونحط كمون حب مقدار ملعقه كبيره وزيت ونقليهم حتى يحمر البصل ونحط معجون الطماطم وكوب ماء ونخليهم 3 دقايق ثم اللحمه والخضار والخل والبهارات والملح وشويه مويه ونخليهم على النار حتى ينضج اللحم بعد مايخلص نحط البقدونس المفروم والجبنه ونخلطهم ونصك القدر عشان تميع الجبن زين وهني وعافيه
وهذي الصور
وهذا من قريب
وطبعا السليق اكيد الكل يعرفه رز مسلوق واذا قرب على النضج نصب كوب حليب سايل على حسب كميه الرز ونقصر على النار لحد ماينشف الحليب
وتقدمين بعد معاهم سلطه بس ماحطيتها وان شاء عجبكم طبخي
ولاتنسون اختكم ام يزيد من الدعاء والله الله بالردود
