السلام عليكم ورحمة الله وبركاته.
الله يسعدكم جميع.
عندي طريقة كبسه جربتها سحور
والنتيجه بطله ☺️،
يلا ع الطريقه ،
رز تخمرينه تنقعينه اي كلمه 😂
اهم يتخمر مدة لا تقل عن ساعه
ووقت التخمير حطي معه ملح.
بعد ساعه اغسلي الرز ،
وضيفي عليه مويه وملح وزيت
( واحلى شي زيت زيتون )
لان الحبه تجي طويله ونحيفه وطعمها رهييييب ولا تخافين مافي طعم زيت زيتون
شغلي عليه الفرن وماتكون المويه كثيره
وانتي عنده واقفه شويه المويه اذا نقصت
وباقي منها شي قليل قصري النار قوووووه
ع اخر درجه هاددددديه ، واتركيه لو يوصل ساعه عادي بس اهم شي تكوني مخفضه
النار على اخر درجه.
ملاحظه الرز اذا تبينه يطلع ممتاز
لا تفتحين القدر خلاص اذا ضبطتي مويته
وقصرتي النار خلاص اتركيه لا تفتحين القدر
ولا تحركينه بالملعقه بعدما تقصرين النار
،،،،
الدجاج تخمرينه لماً يذوب.
وتقطعينه قطع مربعات صغار بس مو
صغار قوه
تقطيع حلو والعظام اتركي فيها شويه لحم
المهم بعدما تخلصين تقطيع الدجاج.
خذي قدر صغير وكشني فيه بصله تقطيع
ناااااعم بصله كبيره اذا الدجاجه كبيره
وبصله وسط اذا نصف دجاجه.
قطعي البصل ناعم
وحبة ثوم حبه وحده بس
قطعيها ناعم وشوية زيت حركي البصل
والثوم.
بالوقت اللي كنت تجهزي البصل والثوم
خمري حبتين طماط طازج بشوية مويه
حاره عشان تقشيرها يكون بسيط.
وتشيلي القشر اللي فوق ع طول
بعدما يطبخ البصل والثوم شويه
ويبدا ياخذ لون
ضيفي الطماط الطازج تقطيع نااااعم.
وحركي وحطي بهارات وملعقه صغيره كركم
وحركي وحطي حبة قرفه وحبة ليمون اسود وحركي او قلبي😂
بعده ضيفي الدجاج المقطع واتركيه
دقيقين يطبخ وبعده ضيفي مويه ممكن
كوب ونص ع حسب حجم الدجاج
وضيفي الملح حسب رغبتك.
اتركيه يطبخ لماً ينضج ،
وهنا السر ☺️👌🏼
اذا نضج الدجاج وباقي مرق شويه
مايكون مرق كثير انتبهي
مرق قليل
خذي قدر الدجاج ومرقه
وحطيه فوق الرز بقدر الرز بدون تحريك
والرز مقصور عليه قووووووه
حطيه فوق وغطي القدر
مدة نصف ساعه او اكثر عادي
لو كنت مستعجله اقل عادي
بس قبل تطفين النار ب 10 دقايق
حركي الرز مع الاطراف
بتلاحظين الرز يتغير لونه
هو ابيض قوه لانه مسلوق.
وبيجي معك اربع الوان لرز ☺️
شويه احمر وشويه برتقالي
وشويه اصفر
وشويه ابيض.
بيجذب عينك قبل طعمه 😍
وقبل تغرفي حركيه كله.
وبعده خذي القدر وفرغيه بصحن
او صينية بوفيه 🤭 للغرف بالصحون الصغيره
ع حسب عادتكم بالتقديم
ملاحظه لا تغرفي بملعقه خذي القدر
وفرغيه مباشره كله
وبعده عدلي براحتك بالملعقه.
جربوه 🤗💜
عصفوره ناعسه :) @aasforh_naaash
محررة فضية
يلزم عليك تسجيل الدخول أولًا لكتابة تعليق.
الصفحة الأخيرة
الدجاج والمرق
فوق الرز ،
خفت تفهمونها القدر تحطونه فوق الرز🤣🤣