اليوم جايبه لكم طريقة جريش سهل وبشكل جديد واتمنى يعجبكم انا دايم اسوي جريش واطبخ لحم بعضم لوحده او دجاج واذا سكبت الجريش حطيت اللحم لكن اليوم فكرت وقلت بغير طريقة تقديم اللحم وطلع حلو راح اذكر طريقة الجريش تغسلين 2كاس جريش ونصف الكاس رز مصري مع بعض وينقع بماء مغلي ثم نقطع بصله كبيره و3فص ثوم قطع صغيره ونضعها في القدر ونضع عليها 2ملعقه كبيره سمن لانه يعطي نكهه ويسيح مع البصل والثوم مجرد يذبل البصل نضع الملح ماجي ابيض ورشه كمون ثم نضع الجريش بعد تصفيته من الماء وعلبة لبن الي بريال اوحليب المراعي اي نوع ثم الماء المغلي ويحرك الماء يكون مغطي الجريش ومرتفع بحدود خمس عشر سنتي ونخلي النار هاديه وكل ربع اونص ساعه نحرك ونحاول نهرس حبات الجريش بملعقه خشبيه كبيره انا اسويه بضاغط يقعد تقريبا 3ساعه اما القدر ياخذ وقت اطول واذا شفتي انه ثقيل يالله يتحرك زيدي شوي مويه مغليه
اما اللحم قطعته قطع صغيره مثل تقطيع لحم الشوربه وسلقته بماء وبصل وثوم وملح واعواد القرفه وورق الغار بعدها صفيته من المرق وصلحت كشنه بصل قطعته قطع صغيره وحطيت عليه الزيت ومعجون طماطم وبهارات وملح ولما تكشنت سكرت النار وخلطت اللحم مع الكشنه وحطيتها فوق الجريش عند التقديم وطلع شكلها حلو وطعمها لذيذ تاكلين جريش مع اللحم المكشن اتمنى تجربونها وعليكم بالعافيه
