اولا
قعدت عند دكتور عادل من الساعة 1 الظهر لحد الساعة 11 بالليل
والا باين كانت 12
بس اللزيز في الموضوع اني قعدت جنب بنتين عساسيل خالص
واحدة من المنصورة والتانية من الشرقية
انا حاسة ان دكتور عادل بيجيلو محافظات اكتر من اللي في القاهرة

والله كان دمهم زي العسل وربنا يكرمهم هونو عليا القعدة جدا
هما كانو اول مرة يروحو لدكتور عادل وميعرفوش النظام
وانا بقى كنت الخبرة
واديلهم في المعلومات ولا الخبيرة
ولما جوز واحدة فيهم يمش وييجي دورها عشان الكشف عند الطبيب المساعد يقولولي ادخل انا معاهم بدل اجوازهم
كنت ماما من الاخر
الحمد لله المرة دي كانت زيارتي لدكتور عادل فيها ونس وجميلة وضحكت معاهم لما قلبي وجعني من الضحك

نسيت اقولكم ان كل ده جوزي مجاش
الباشا جه الساعة 9 بالليل وكمان مش عاجبه انه استنى
الرجالة دي غريبة
وانا اللي قاعدة طول اليوم لوحدي مش المفروض اتدايق
عادي
المهم
اول ما دخلت لدكتور عادل
سلمت عليه وقلتله انا زعلانه عشان حضرتك مرديتش عليا على الميل بتاعي بتاع اشعة الصبغة
انا قلت الكلمة دي من هنا وعينكو ماتشوف الا النور
الظاهر اني كنت القشة اللي قسمت ظهر البعير
لان غالبا في واحدة قالتلو نفس الكلام بس باسلوب مش كويس معناه انه اجباري يرد على الايميلات وانه غصب عنه مش تفضل يعني
المهم مش هقولكو قال ايه عشان البريستيج بتاعي:)))))))))
بس انا مبسوطة جدا ان دي كانت بداية الكلام معاه
عشان حسيت انه كان بيشرح كل حاجة بالتفصيل الممل حتى في ديقه من كلامي
ودي حاجة بسطت جوزي جدا الحمد لله
واحساسي بيقوللي ان انا مشيت من عنده وهو مبسوط
وانه متاكد من كده ومن اني مبسوطة اني باجي استشيره
والله انا باحترمه جدا وربنا يجزيه عنا كل خير

المهم
بالنسبة للتحاليل قاللي ان التكيس ده مش حاجة هتروح وبالتالي مش لازم نقيس الال اتش والاف اس اتش كل دورة واني لازم انسى المقياس ده
وانه فعلا ملخبط بس مش مشكلة اهم حاجة اخد الدوا(مش باخدو بصراحة)
----------------
بالنسبة للتبويض قاللي مع انهم تلاته يمين واتنين شمال بس مش عاجبينه
عموما هما عجبوني جدا وانا مستكترة افرط في بويضاتي اصلا
كفاية واحدة في الشهر:)
-------------
بالنسبة للتبويض
هو قاللي ان التبويض بتاعي ممتاز رغم اني مخدتش من كورس التنشيط غير حبايتين كلوميد بس
ومن غير الفوستيمون والله
عشان كدة كنت بحاول اقنعه انه يخفضلي كورس التنشيط لاني بحس ان انا مش محتاجة كورس قوي
وزي ما قلتلكم حباية كلوميد واحدة بتقلب الدنيا عندي
مش عارفة ده حلو والا وحش بس انا مبسوطة
عشان مش بحب اكتر ادوية وبحس ان المواد الكيميائية دي خطر عليا ونفسي بقى ابطلها واخلص

اما بالنسبة للصبغة فقاللي انها مؤشر فقط ولا يمكن نجزم بالنتيجة
وانه يعتقد بنسبة كبيرة ان مفيش التصاقات ولا حاجة لكن هناخد فاكتور الصبغة في حساباتنا عشان منطولش في التنشيط ومتابعة التبويض وفي مشكلة تانية قد تكون موجودة