طلقني زوجي بسبب تااافه ماراح تصدقون ..

السلام عليكم 
بدخل بالموضوع 
انا عندي بنت عمرها سنه 
من طلعت من نفاسي وانا وزوجي تمام مو مررة بس عادي حياتنا ماشية لين مرت يمكن ثلاث شهور 
بعدها انقلب صار مايكلمني مايسولف معي طول وقته ع جواله بس مااحسه يكرهني لا بس متغير سكت وقلت عادي يمكن مضغوط حصلت بعدها مشكلة بسيطة وانا تنرفزت لانه يتكلم علي كثييييير وانا ساكتة بس لو اتنرفز وارمي كلمة والله بسيطة يسوي النون ومايعلمون على طول يزعل ويتلفظ ويسب وتصير زعله طويلة صار عمر بنتي ثمان شهور كنت اطلبه يوديني بيت اختي كان ف حي وهالحي نفسه فيه ببيت اهلي ووقتها كنا بالطريق رايحين لبيت اهلي ارسلولي اهلي انو احنا رايحين بيت اختك تعالي هناك قلتله قال خلي اخوانك وهو كذا دايماً روحاتي ورجعاتي مع اهلي مايودي ولا يجيبني ابد الا كل اسبوع بيت اهلي مع ان طلعاتي قليييييله 
المهم وقتها كنت ناوية اغير هالطبع فيه فرفضت وتهاوشنا بالسيارة وحطني عند اهلي كانو بالبيت مابعد راحو 
اخوي اللي بيوديهم يعيي يودينا المتزوجات يقول عودو رجالكم يودونكم مع ان زوجته كل طلعاتها مع اهلها وبرضاها بس حسبي الله 
المهم وقتها قلت لامي ماراح اروح عشان اخوي هذا بيرفض قالت لا بس تعالي وكذا ووقتها كنت برفض اروح عشان يمكن زوجي اذا شافني جالسه مارحت يترك هالعادة 
المهم ماكنت بروح ويحاولون فيني امي واختي ويحمسوني وتحمست قلت اوكي كلمت امي اخوي قالت اني بروح معهم قال لا ومدري ايش وانا لابسه عبايتي رجعت للغرفة شلتها كنت مقهووووووووررررررة لآخر درجة رحت ارسلت لزوجي قلت انا طفشت من هالعيشة اذا حسيت بمسؤولياتك كزوج تعال خذني 




مااشوف كلمتي قوية بالنسبة للقهر اللي فيني مو قهر عشان الروحة قهر منه هو طبعا فيه تفاصيل ماذكرتها تبين تقصيييييييره الشديد بالبيت ومعي
كل اللي عنده للبنت وللناس لدرجة يوم خطبني كلن يقول كريم كريم وانصدمت لأنه عند الناس شكل ومعي شكل








المهم وقتها جلست عند اهلي اكثر من شهر دخل رمضان وصرت ادعي واستغفر كثيييييير لحد ماكلمني هو وقال تولمي بجي اخذك شفتو كيف الجفاف اللي باسلوبه بس قال بشرط (تلبسين عباية راس ) هالشي كان موافق عليه من يوم جبت بنتي لدرجة انه معي بالمحل ويختارها لي يعني موااااافق عليهااا اقصد عباية الكتف 




وقتها عمرها عشرشهور تقريبا وتوقعته ناسي هالموضوع انقهرت كثييييير لان هالشي مهمممم عندي وماصدقت يوافق عليه ( تكفون لحد يقول حلال وحرام مو هذا موضوعنا انا ادرى بالعباية اللي بلبسها ومتاكدة انها حلال ماراح يغير رايي لو قلتو حرام لاني ادري بتحسبونها الكتف العادية بس لا مو هي اللي اقصدها ) المهم حاولت فيه ومارضى قلت بنفسي خلاص بوافق وبعد فترة اكيد بيتراجع لانه اساسا موافق عليها 
المهم رجعنا احسن من قبل بس هالموضوع منكد علي بس ماابين له 




رجعنا احسن من قبل بكثير هالكلام كان نهاية رمضان طبعاً الى الآن اموري اللي ابيها ماسواها لي بس حسيته احسن من ناحية امور ثانيه صار يسولف معي صار يضحك معي وهذا يكفيني 




المهم انا كل مابين فترة وفترة ارسله كلام ليّن بخصوص العباية بس ركزو اني الى الآن والى اللحظة اللي انا اكتبلكم فيها اني البس عباية الراس وماعمري عاندته
كل مافي الموضوع اني اكلمه بهدوء احاول اقنعه رفض اسكت فترررة 
لحد يحسبه الموضوع سهل مو سهل ابدا تخيلو ان اخواتي واخواته كلهم وحتى امي وامه كبار بالسن يلبسون الكتف تخيلو ان انا واخته معه بالسيارة انا عباية راس ولا نقطة زخرفة فيها ونقابي مغطي نص عيوني ( طبعاً الزخررفة والنقاب انا من نفسي ماابي اغيرهم مو عشانه رافض بس لو بغيت اغيرهم راح يرفض ) واخته عباية تبين جسمها وطرحة قصيرة ومزخرفة واكمام مزخرفة صح اسود بس اسمها مزخرفة ونقابها عيونها كاملة طالعه ولاهي متزوجة عشان اقول في حكم زوجها لا في حكمه هو ومع هذا يسولف ويضحك معها وانا اللي مرضيته تمام مسحوب علي 




المهم بعد مارجعت تغيرت كثير في نفسي والبيت ولبسي وكلامي وكل شي 
جلسنا تمام حتى ف العلاقة (...) يمكن شهر وزيادة بعدها رجع نفس قبل حتى العلاقة مرة بالاسبوعين ويالله بس الفرق صرت احسه يكرهني
صرت اشوف الكره بعيونه 
صرت مهما اسوي مايبين بعينه 




ماأدري ليه رجع تغير 
سكت ومشيت الحيياة 
هو طبعه اذا زعل مني مستحيل يسوي لي اي شي حتى لو ضروري يطنشني لاخر درجة 
انا لا 
ازعل بس اسوي واجباته كاملة حتى اذا بغى ينام جيت وجلست بالسرير معه ومع ذلك يعطيني ظهره وينام 
ملابس الدوام اكويها واجهزها الغدا اجهزه على اكمل وجه حتى القهوة والشاهي اسويله واصب له بعد 😣 




صارت بيننا زعلة جلسنا يوم وبدينا نرضى طبعا برسمية 
وهي حالتنا كل هالفترة 
بعدها على طول صارت مشكلة والله والله بسيييييييييطة بتنصدمون 
تخيلو جاب مقاضي ومن ضمنها دجاجة صغيرة قال سويها للغدا قلت ابشر وادخل للمطبخ جا ع بالي اسويها محمرة وياليتني انطميت ع الكبسة المعتادة وبس لانه مايستاهل من يتفنن له 
المهم قمت سلقتها كاملة بنية اني اذا استوت بتبلها واحمرها بالفرن 
توني شبيت عليها 
ويدخل للمطبخ سالني وش سويت وعلمته طبعاً هو طبعه كذا يتدخل بشغل البيت والطبخ اكثر مني 😒 
المهم صار يهاوش وعصصصصصصب صار يتلفظ علي يالرففلا ماتعرفين تطبخين خلي امك تعلمك مدري ايش انصدمت قلت وشفيك قال فيه احد يحط دجاجه مايقطعها 😳 قلت انا الطبخة اللي ناوية اسويها كذا المهم اصلا ماكملت كلامي يهاوش هو تركته واخذت بنتي ورحت للغرفة وكمل هو الغدا ( لاتقولون ياحظك ترا دايم يسويها وودي افتك من هالعادة 😭)  المهم وانا بالغرفة اسمعه ياكل بالصالة خلص ودخل بينام وقتها بنتي نايمة انا بسرعه طلعت ورحت اتغدا واطلع صوت ابي احسسه انه مايهمني لاني تعبت حاطه له قدر وادور رضاه مافاد قلت اجرب اغير 




المهم صار زعلان يومين وبهاليومين انا مطنشته حتى اذا دخل ينام ماادخل معه اذا بغا شي يناديني جا الاربعاء قبل الظهر وكان لي فترة تعبااانه وابي علاج بس ماقلت له الثلاثاء قلت له ماجاب 
قلت يمكن ناسي 
الاربعاء الظهر ارسلت له العلاج ماجاب
وقتها زي ماقلت تعبااااانه ونفسيتي زفت وحالتي يرثى لها 
دورت اذا كان جايب العلاج ماجابه ( طبعا وقت رجعة زوجي نتقهوا وبعدهاابدا بالغدا لانه يجي مرة بدري وهذا نظامنا من تزوجته وهو طلبه مني ) سالته قلت ماجبت الحبوب قال لا قلت ليه قال منيب جايب شي قلت لو انه شي لبنتي على طول جبته قال خلاص معدنيب جايب شي انا تنرفزت شي ضروري حتى لو زعلان مفروض يجيبه انا ماقلت طلعني اتمشى ولا قلت ابي كذا وكذا هذا حبوب اقسم برب الكعبه اني محتاجتهاااا مرررررة 
المهم شلت بنتي وجيت بروح للغرفة وقلت اذا جبت الحبوب علمني اسويلك غدا 
اقسم بالله لي سنتين ونص متزوجة ماعمري قلت هالكلمة ولا شي مثلها بس مليت خلاص 
على طول تلفظ بكلمه قبيحة مااقدر اقولهها وقال ظفي عفشك اوديك بيت اهلك 
تاكدت انه ناوي من زمان بس يدور اي شي عشان يقولها
طبعا حوارنا اللي بقوله الحين ماعمر كلمه قلتها قد صارت بحياتنا ابد اول مرة اقوله هالكلام لانها كانت واصلة معي 
قلت هذا اللي ابيه من زمان المهم ظفيت اغراضي وتركت اللي ماحتاجه قال ظفيه كله معد لك دخله للبيت قلت كلها اشياء ماحتاجها مابيها تذكرني بحياتي هنا المهم لزم وانا رافضه مادري وش الكلام اللي دار بيننا بالضبط بس اذكر قال انا من زمان حايمه كبدي منك 💔💔 قلت انا اكثر منك صار يسكتني يعني خليني اتلفظ واسكتي قلت منيب ساكتة اذا تكلمت علي برد  
من ضمن الحكي قال بخليك شهر عند اهلك عشان تتأدبين قلت بيت اهلي مو عقاب عشان اتادب عندهم العقاب جلستي هنا ( قبل كان اذا زعل خلاني بييت اهلي مايمر اسبوع الا اتعذر منه حتى لو كان غلطان .. غبيه ادري لحد يجرحني 😅 ) المهم وصار يحلف يقول والله لأخليك تتمنين الطلاق ماتحصلينه قلت لمعلوميتك انا من زمان اتمناه بس ساكتة عشان هالبنت ( ادري كلمتي تنرفز بس غصب ياخي الحريم اذا عصبت تنشب برقبته تقول طلقني مايطلق يصبر عليها يدري انها معصبه انا ليه لازم احول نفسي ماكينة واتصنع بكل شي عشانه ) المهم تنرفز وقال تراك طالق 💔 
وقام لبس ورحنا بيت اهلي الطريق ساعه الا ربع ماتكلمنا ولا حرف 




يوم نزلت بعدها بشوي ارسل لامي انا طلقت ... والله يستر عليها قالت امي وش صاير قال خلي عباية الكتف وقرقرتها الزايدة تنفعها الحرمة تتزين لرجلها وبس ماتتزين للناس 




تخيلو ذكرت قبل اني ورب الكعبه مالبستها قدامه ابد بس مجرد اني كل شهر اترجاه شوي واذا قال لا سكت 
ولحد يسالني وشي قرقرتي الزايدة لان علمي علمكم مدري 😢 اي قرقة وانا حتى مطبخي من اعرست مافيه لا مكيف ولا درايش ودواليب متكسرة عقب اللي ساكنين قبلي مع انه بيت امه مو اجار من احد ومطولين فيه يقدر يزين فيه اي شي 
حتى المروحة اللي فيه يوم خربت مادرا الا بعد اسبوع لاني ماقلتله 
مادري وش القرقة اللي يقصدها 




هو يبي وحدة عبدة عنده وبس جاااااااارية 
شفتو يوم يقول تتزين لرجلها وبس كانه من شياب اول ويبيني اصير من عجز اول حتى عند الناس مايبي اتزين 
المشكلة العباية اللي ابيها معتبرها زينه وعباية اخته وشي حشمة وسترر !!!!!!!!!!! 




الزبدة انا عند اهلي لي اسبوع ونص ولا سمعت صوته ولا شفته 
وابوي لحد الحين مايدري لاني خايفه يقنعني ارجع له ويقنعه ونرجع بدون مانتفاهم وبدون قناعه زي قبل رجعنا بهالطريقة وزادت المشاكل 
ومضطرة اقوله لانه كل شوي يسال وش عندها هنا وش فيها واخاف يدري عن طريقه ويقول ليه ماعلمتيني 




وغير كذا انا ابي طريقة اننا نرجع لبعض بدون مااتنازل عن الاشياء اللي ابيها وبنفس ودي اتطلق وارتاح ترا تفاصيل كثييييرة ماذكرتها 




مادري وش الحل 




ادري كلامي طويل ومخربط بس ابي حلول تكفون ضايقة فيني ابي ارجع عشان بنتي مو عشانه ومابي ابين له اني برجع عشانها عشان مايعتبرها نقطة ضعفي 








تدرون الاسبوع اللي حصلت فيه المشكلة كنت اقول يارب فكني منه بدون طلاق 😢💔 كنت تعبانه معه وكاااااارهته بس مابي اتطلق عشان بنتي وبنفس الوقت ابي الفكة من بيتي والعيشة فيه احس نفسي ضايعه 
اكلمه ولا اطنش ولا وش اسوي