السلام عليكم
عيدكم مبارك
وكل عام وانتو وعيالكم وعيالي بخير وصحة وسلامه
ادري اني متاخرة اعذروني العيد عندنا دايم مزدحم
راح اقول يومياتي بالعيد بس اول عندي تعقيب على كم شغله
ام الامراء ماعليه ياقلبي احتسبي الاجر والحمدلله اني قريت بنفس الوقت انه اتاسف منك وندم عسى ربي يهديه
بسمة وربي فرحت لقرارة ان شاءالله اطبقينه في عيد الاضحى عسى ربي يفرحك
فرحت كثير من قريت اسماء مختفيه مثل دياري وموقع واحب الطبيعه ورانيا وان شاءالله ماتختفون بعد اليوم
والله يرجع لنا قلم سيال والارمله وسيدة وبسمة مضيئه وام نواف وايمان وباقي المختفيين

يومي كان
نمت ساعتين وقعدت على صلاة الفجر وقعدت عيالي صلو ا وردو نامو وبعد ساعة قعدتهم
لصلاة العيد لبسنا وطلعنا كلنا دخل ولدي الكبير وبيده اخوه الصغير لقسم الرجال وانا معاى بنتي لقسم النساء كبرنا وصلينا وقعدنا نسمع الخطبة وبس خلصت طلعو الحريم واشوف اختي واعايدها ونرجع البيت ونلبس ونفطر ونطلع
رحنا نعايد خوالي وعمامي وعقب طلعنا لبيت اهلي تقريبا الساعه 10 ونص كنت مبسوطة واول ماشفت بيت ابوى واخواني برا يسلمون على بعض والله عورني قلبي ونزلت دموع محبوسه اول عيد نعايد من غير ابوى عسى ربي يشفيه ويرده لنا سالم
دخلت البيت شفت حرص اخواني وخواتي وعيالهم والاحفاد حرصهم على تواجدهم بالبيت الكبير وكأن ابوى موجود طبعا الاطفال كانو كاشخين واشكالهم روعه دخلت وسلمت على الكل ووزعت عيادي نزلت دموع من خواتي وحرصت اكون الاقوى فيهم وكنت اقول لهم لازم الوحدة تكون قوية وتتحمل عشان اخوانها وخواتها تغدينا ببيت ابوى كالعادة عساها عادة ماتنقطع
تجمعنا كلنا ونحاول نضحك وربي افرح من داخل اذا شفت اخواني يضحكون لاني من زمان ماشغت هالضحكة وادرى كلهم يمثلون على بعض
عقب الظهر انتقلنا لبيت اخوى وقعدنا عندهم ورحت ازور جارات امي الله يرحمها واعايدهم كنت بروحى وشفتونى شلون قوية جدام اخوانى بس سالتني بنت احدى الجارات كيف ابوك وهى تدري بحالته ماقدرت اتكلم دموعي سبقت لسانى
اللي يضايقنى انتو تدرون ابوى تعبان ومايشعر بشي وحالته جدا حرجة ولو في اخبار حلوة الكل بيوصله ليش تسالون شلونه وانتو تعرفون الاجابه على حاله مافي جديد
عقب طلعت وعايدت بيت عمي وطلعت لبيتى ونمنا على طول
قعدنا الصباح لبسنا وكملنا زيارات ثاني وتغدينا عند قرايبي انا وخواتى وعيالنا وعقب مريت على جارتي ايام ماكان زوجي عايش وعايدتها
ورجعنا البيت كنت تعبانة حيل ولدي خذا اخوانه وراحو لمكان ترفيهي لعبو وشرو هدايا وشرو لي هديه وجابو عشا وتعشينا وقعدت معهم عالتلفزيون لمن دخلو ينامون دخلت لكم وانا والله حدى منهكة ركزو على منهكة مادرى من وين طلعت

نسيت اقول برنامجي بكرة
ولدى كان ناذر مع انى ماحب النذور وقلت له لاتعيدها ناذر اذا نجح يعزم مدرسينه الخصوصيين بالمرحلة الثانويه
وعزمهم بكرة غدا عندنا وانا ببدى بكرة ان شاءالله صيام الست الحمدلله ماعلي ايام
وان شاءالله اشوفكم بالليل واقول لكم اخبار العزيمة

مساء الخير والرضا

اخباركم يالغاليات

عزوزة الحمد لله عدت على خير انتي عارفه اصعب زياره

والحين ارتحت نفسيا بس شايله هم الروحه لبيتي

الاميره الله يهنيكم يارب اهم شي فرحوا العيال

ام الامراء الله يسعدكم يارب واهم شي راحة كوكي بدله ولاثوب

ملوكه انا مثلك نمت وريحت بالي والحمد لله راح العيد على خير

عيدكم مبارك
اخباركم يابنات واحشيني
وحلوة يومياتكم ارتب نفسي واحكي لكم لي عودة معاكم

انا يومياتى عاديه لا شىء جديد
بس فرحانه لفرحكم الله يديم عليكم السعاده