الاخت دارين

انا مصرية ومغتربة في ابو ظبي وفي اول غربتي عانيت من اللى تعاني منه وهذا شئ طبيعي ....
اولا ياسيدتي : الاسرة المشتتة ما تجني من ورائها الا الدمار بمعنى لو بعدتي انت عن زوجك بالاولاد راح تحسون بانكم غرباء عن بعضكم من بعد المسافة ووقت ما ينزل لكى مصر هتحسي نحوه بغربة ايضا.وكذلك الاولاد....ولدي قصص كثيرة من هذا القبيل, اوعي تفكري بهذا الموضوع نهائي لان واجبك ان تلمي شمل الاسرة.
ثانيا : بالنسبة للمعاناه الكل بيعاني في اول الغربة. لكن الان مايجب ان تعمليه هو تغيير طريقة حياتك. لازم تتعلمي السواقة لانها من الضروريات وتقدري تذهبي للمسجد وما أحلى صحبة المساجد وتتعلمي تلاوة القران والحفظ ايضا هذا هيأخذ منك الوقت.
ثالثا : شوفي ايه اللى تقدري تعبي به وقتك...لا تتركي مجال لنفسك تختلي بها ....حبيبتي شغل البيت ما يخلص ابدا ابدا ....انت حددي ايه اللى تقدري تشغلي به نفسك.
رابعا: انت اولادك صغار لسة مادخلوا المدرسة ....وان شاء الله لما يدخلوا المدرسة مش هتلاقي وقت تهرشي راسك .

اختي الفاضلة
الغربة بتقوي الانسان وتخليه اقدر على مواجهة المصاعب وخصوصا النفسية.... والظروف اللى مرت بك من وفاة الوالد (رحمه الله) فينا من مر بها ومنا من ستمر به ..فكوني صبورة ودوام الحال من المحال ....ولا تدعي الشيطان يسيطر عليكي ....وفي الاخر الغربة بتخليكي انت وزوجك انسان واحد ما لكم الا بعض .

اسفة للاطالة ولكن هذا من وجهه نظري انا مغتربة منذ 14 سنة لدرجة اني احس حالي غريبة في بلدي

اختي ميجو جزاك الله خيرا علي اهتمامك والله يحقق لكي كل ما تتمنيه
الورده الحمرا
انا فعلا من كلامك قررت بامر الله اتعلم السواقه يمكن فعلا تخجني من عزلتي بارك الله فيكي وفعلا الافضل الا افكر بالعوده الان لاني فعلا خايفه ارجع
اوزوريس
كلامك جميل ويا ريتك طوليتي بجد كلامك بيشجعني ويقويني بامر الله لان فعلا جت عليه فتره ياست فيها من حل لحياتي والله ان البعض قد يراها مشكله تافهه لكنلا يعلم بمراره الوحده الا اللي جربها
جزاك الله خيرا اختي

دارين

المشكلة اللى انت فيها ما يحسها الا انسان اتغرب وبعد عن اهله لاي سبب من الاسباب.....يعني واحدة مثلي اعرف مدي الاحساس اللى انت عايشة فيه .....لذلك لو الظروف وضعت واحدة جديدة في الغربة بحاول اني اخفف عنها لحد ما نفسيتها تروق

اختي دوام الحال من المحال بعد سنوات قليلة سوف تتغير احوالك وبكرة ان شاء الله تقولي اوزوريس قالت
ثانيا حابة انبهك لشئ .... في الغربة لما الواحدة بتكون عايشة مع نفسها أفضل بكتير من الاختلاط ..وصدقيني عن تجربة وحصل معي مواقف غريبة عجيبة بسبب محاولة التعرف على ناس جديدة ....يوجد وليس الكل ناس نفسيتهم وحشة جدا وخصوصا لما يكوني اقل منك في المستوى المادي والمعنوي....وفيه ناس حقودة بطبعها....وفيه ناس تحب تعمل مشاكل من مفيش, صحيح انت متضايقة لانك وحيدة بس صدقيني انت في نعمة ....اما عن جاراتك ...التمسي لهم العذر لان اللى بتعمل مش بتلاحق على البيت وما بيكون عندها وقت ...انت كل فترة اتصلي اسألي ولو لدقائق ...خلي بينك وبينهم ود

اختي اوزوريس
جزاك الله كل خيرا علي اهتمامك وتصدقي انا كل كلامك فعلا مقتنعه به جدا لاني فعلا اول ما جيت هنا واتعرفت علي زوجه صديق زوجي وهما الاتنين كبار عننا يعني هي تقارب عمر والدتي ومع ذلك سببتلي تعب كتييييير في بدايع حياتي لانها كانت تحاول تتدخل بيني وبين زوجي وبعدت عنها لكن كنت دايما اقول ان ربنا ان شاء الله قادر يعرفني بانسانه طيبه والحمد لله علي كل حال
والله يعينا علي الغربه وفراق الاهل
اختي دجله
جزاك الله خيرا اختي والله يكون بعونك علي الغربه في بلاد الغرب فعلا عندك حق البلد العربي ارحم
ربنا يهون عليكي غربتك يا رب
وعلي فكره انا عملت بنصيحتكم وطلبت من زوجي اتعلم السواقه وهو وافق ووعدني بامر الله هيقدمنلي بمدرسه لتعلم السواقه والله فرحت حسيت اني هعمل حاجه جديده تشغل فراغي
جزاكم الله خيرا

السلام عليكم دارين

مبروك على تعلمك السواقة وبصراحة فرحت لكي قوى...وصدقيني حياتك هتتغير كتير بعد ما تاخدي الرخصة
حابة اقولك حاجة ..انت زوجك يعمل بالنهار واخر الليل يرجع ينام ي البيت...انا زوجي بينام في العمل لانه مجال البترول يعني شوية في البيت وشوية في الشغل.....((أدي نعمة انت كمان فيها))
يعني بعض الاوقات اكون الاب والام معا ....واتحمل مسؤلية اولادي لحالي.
بس الحمد لله انا معي رخصة وبسوق في الامارات منذ 6 سنوات وفي مصر ايضا

طبعا ....ولازم تحكي لنا شعورك اية اول مرة تروحي تتعلمي ...واحكي لنا مغامراتك ايام التدريب

الله معك