عجزت وانا اصرفهم + الجديد في المشكلة << مشكلة عضوة معانا بالمنتدى

السلام عليكم
ام انوسي ياليت تنزلي هالمشكله
Xxxxxx
انا بنت 26 سنه
عندي بنات عم بنفس عمري واصغر
لاكن الله يهديهم مره نشبه
يعني لما كنت صغير عمري 15 سنه الى 19 سنه
كنت مراهقه كل همي الوناسه والطلعات فكانو
كل يوم تعالي عندنا نامي عندنا اسهري عندنا يالله نروح كوفي يالله نروح مطعم
لما كبرت خاصه السنتين هاذي بديت امل
من ذا العيشه مره ناشبين فيني بشكل ماحد يتخيله
متخيلين كل يوم واذا مره انقطعو عني 4 ايام ويتصلو
يالله تعالي اسهري عندنا ولا تعالي نامي ولا بنجي نسهر ولا يالله نطلع واذا طلعت معهم كوفي او مطعم مايكفيهم يصغطو علي لما اوجع معهم لبيتهم اسهر
والله عجزت وانا اصرفهم مره اقولهم مشغوله
مره اقولهم عندي طلعه مره اقولهم مانمت
مره اقولهم مافي احد يجيبني مره اقولهم صعبه اترك امي لحالها
لاكن ماكاني اتكلم يجي يومين وترجع ترسل طفشانين ماودك تجين تسهرين عندنا هم زي حبوبين وفاتحين بيتهم للناس
لاكن انا خلاص ماحب كذا اللي ينشب فيني كل يوم تعالي تعالي تعالي تعالي
لاتقولون صرفيها صرفتها كل التصريفات اللي تجي ببالكم ولا تفهم صرت افتح رسالتها ولا ارد عليها ولا تفهم ترجع ترسل
المصيبه ان بنت عمي هاذي عندها بنات خالات
وعندها بنات خال وعندها بنات عمه بنفس عمرها يعني من عمرنا بس ولا مره نشبت فيهم ولا مره قالت لهم تعالو بالعكس هم كان بنت خالتهم يكلمونها بيجون عندهم وتصرفهم ولما اسالها ليش تقول مافي ميانه بيننا وكل جلستنا رسميه او مثلا تقول مالي خلقهم وربي بنفسي اقول يابختهم ليتي انا اللي مالك خلقي
يعني وربي بنات خالتها لاصقين فيها يبونها تطلع معهم ولا تعزمهم وتصرفهم وانا مره ناشبه فيني


الجديد من تفاصيل المشكلة


بنات انتم كلكم جالسين تلوموني وحده تقول لقيتي غيرهم وثانيه تقول بكرا بتندمين
وغيرها يقول انتي بنمعه وغيرها يقول
ليتهم عندي
طيب انتم يابنات وينكم عن اهل ازواجكم؟؟
وينكم عن اقاربكم؟؟
لانكم خلف الشاشه تدعون المثاليه
لاكن لو خوات ازواجكن او بنات عمكن قربو لحياتكم
تضايقتو وقومتو الدنيا واكبر مثال المواضيع
اللي كل يوم تنضاف بالحياة الاسريه
لاتحسبون بس اروح اسهر واراجع
ترا اعاني من تدخلاتهم اعاني من الموانه الزايده معهم
يبغون يعرفون كل اسراري وذا خبيت شي عنهم
حتى امهم تهاوشني وتقول طول عمرك مع بناتي ولا تعلمينهم مالك خاتمه
يعني مو السالفه قصة طلعات وسهر وبس
فيه تدخلات بالخصوصيه هم يبغوني غصب
اعاملهم مثل خواتي اعلمهم بكل شي
يدرون وين بروح ومع مين ووين واحيانا يعزمون انفسهم بالمقابل اختي اللي اصغر مني بستين
مكان لها علاقه نهائي معهم ايام الطفوله
ولا تبيهم ولا هم يبونها ومرتاحه تسوي كل شي تطلع لكل شي بدون ترقب بدون ارتباطات
انا احس كاني محاسبه كانهم زوجي على غفله
يبغون يعرفون حتى متى انام واصحى
ويتدخلون مره كنت ناويه اهدي صديقتي ذهب
تجي بنت عمي بكل وقاحه تقول فاضيه لهم لو انتي ماهدوك يعني وش دخلها اعتقد اهدي او ماهدي
شي خاص فيني ليه بيفرضون حتى كلامهم
واذا طلعت مع بنات خالتي يغارون
وربي انهم يموتون غيره وبس يرسلون لي
ايه هذاك طلعتي مع بنات خالتك وانتي امس مصرفتنا
مع اني اكون شايفتهم قبل يومين وبنات خالتي لي فوق شهرين ماشفتهم
ولا مره خالتي حطت عزومه زواج ولدها ورحت
لان اعرف كل اللي بيحضرون
مرت عمي تزوج ولدها وحطت وعزمتنا ولا رحت
بسبب ان بنات عمي مشغولين مع المعازيم ولا اعرف احد هناك فجلست مرت عمي وبناتها شهرين يعيدون ويزيدون
بالسالفه انها رايحه لعزيمه خالتها واحنا لا
واللي جد جد خلاني اشيل بنفسي عليهم
لما اصرفهم يروحون يشتكون لابوي
بنتك ماتبينا بنتك منقطعه عنا
وش فيها وش جاينا منها ليه ماتكلمنا ليه ماتبينا
ويجي ابوي يقلب البيت وش فيك ليه نفسيتك كذا
فشلتيني يعني انا جالسه اضغط على نفسي واجامل بشكل مبالغ فيه هم يبغون يمشون الكون بمزاجهم
مع ذلك ماعمرهم قالو لابوي ليه بنتك اللي هي اختي ماتجينا بس علي انا مدري ليش مو قصدهم وصل
لو يبون الوصل سالو عن خواتي اللي لهن فوق سنتين ماشافوهم هم قصدهم علي انا وبس يبغون يخلوني وحده منهم بالغصب ولا تتغيري