عريس الغفلة الحلقة الاخيرة

<FONT color="#FF00FF">مرحبا اليوم اكتب الحلقةالثالثة من القصة مع اني ترددت كتيرا في كتابتها ولاكني اريد التنوية انها قصة لصديق وكان علي تكملة القصة فسانقلها حسب ماتنشرولكم مني تحياتي اختكم منان</FONT>

اهلا فيكم اخواني القراء ... واعتذر لكم على تاخري بالجزء الثالث لكن والله لظروف خارجه عن ارادتي ... والان اليكم حبايبي الحلقه الثالثه والاخيره من عريس الغفله .... واتمنى انه تكون نهاية صبركم علي خير وتعجبكم القصه

كنا وقفنا بالحلقه الماضيه عند ((ووقفت قدامي ومدت ايدها على غطوتها تبي تشيلها .. وحطيت ايدي على قلبي وصرت ادعي واقول الله يستر بس .. الله يستر بس ... وضرب طبلون دقات قلبي ... وايدها ماشيه لغطوتها .. وماشيه .. وماشيه .. وماشيه


وفجاءه فتح الباب ودخل علينا ابوها قبل لا تفتش عن وجهها !!!(( وانا مالي المخرق عاوز كده )) ويوم شافته بطلت تفتش وراحت تركض برا الغرفه .. وانا من القهر بغى يغمى علي (( وش جابه هاللوح الحين .. والله ياجماعه مو وقته )) المهم قام قال لي:
ياله انتم ماخلصتوا ... يالله تراها مو طمعه عاد ترى عطيناك وجه زياده .. قم رح الحق ابوك ويجيك الرد انشاء الله ..
وضفيت عفشي وطلعت من عندهم ... وهي بقلبي والله اني ماشفتها بس وش اسوي بابوها ..
ورجعت للبيت وطلعت لغرفتي على طول.... تصدقون ياجماعه اني ماقدرت انام ذيك الليله ... من جهه كلامها وصوتها للحين يرن براسي مثل صوت ام كلثوم لامنها غنت (( حب ايه اللي انتا قي تئول عليه .. ترالالام)) ومن جهه ثانيه مقهووووووور كان ودي اعرف شكلها ...
ثاني يوم ... كنت ماشي بقطعة ارض فاضيه ورا بيتهم الا واسمع لكم صوتها بالحوش قلت ياولد فرصة عمرك انك تكحل عيونك بها ... واجيب لكم ذاك الدرام (( الدرام = برميل كبير)) واحطه جنب جدارهم واطلع عليه لكن جدارهم طلع عالي .. لاحوووووول والقالكم برميل بويه وانا احطه فوق الدرام واتطلع عليه وانا ارتجف خايف لا اطيح ... المهم وصلت لحفة الجدار وطليت براسي ادورها .. لكن مالقيت قدامي غير صلوح الله لايصلحه (( ياجماعه هالبزر ناشب بحلقي وين ماروح القاه قدامي؟؟)) وهو شافني من هنا وقام يصارخ .. حرااااااامي حراااااااامي يبه الحق حراااااااااامي ... وانا اتدربي من فوق وافرش بالارض وتلتوي رجلي .. واقوم اتلطم واتجهز للنحشه وماخذيت الله وكيلكم الا ابو سليمان معه فاس وعياله سليمان معه عجراء (( سلاح ابيض يستخدمه العرابجا كثيرا)) وعزوز معه ساطور ونواف شايل له كرتون طماط يبي يحذفني فيه (( صدق بياع خضره )) والله وكيلكم وانا احط رجولي وادق طبلوني الف ... اشوى اني تلطمت وماعرفوني والا خربت الجوازه ... والحمد لله قدرت افرك منهم .. ورجعت مع الشارع الثاني ودخلت للحاره ابي ارجع للبيت والقاهم برا ويدورون علي ... واقرب منهم واسلم عليهم واحب على راس ابو نسب :
- سلامات ياجماعه وش فيكم ووش هاللي بيديكم هذا ؟؟
- الله يسلمك بس فيه حرامي بغى يطب على بيتنا وطلعنا نبي نمسكه .
- لا ياشيخ ... بالله حرامي .. حسبي الله على هالحراميه وين الشرطه عنهم (( تحسون برائة الاطفال بوجهي .. ولا كاني سويت شي ))
- لالالا مايحتاج شرطه حنا نمسكه ونادبه ... بس لو القاه ااااااه !!!!
- اقول ابو سليمان ؟؟
- قل
- ما رديتوا لنا خبر عسا البنت وافقت انشاء الله (( المفروض اني ما اسال لكن ماقدرت حسيتهم طولوها))
- لعنبوا بليسك امس خاطب وتبي الرد اليوم انت ووجهك اصبر ويكون خير لاتصير عجل وانا عمك
- طيب بس ...
- لا بس ولا هم يحزنزون قلت لك اصبر وكل تبن و الرد بياصل لاهلك


وطنشني الرجال وراح هو وعياله (( كتيبة المدفعيه )) وانا حايس بروحي مدري وش اسوي
صرنا رابع يوم والساعه الحين تسعه بالليل .. وانا رايح جاي من عند التلفون كل مادق ارد عليه احتري الخبر لكن ماوصل للحين .. ويدق التلفون وارفع السماعه على طول من اول دقه:
- الووو
- سلامو ئليكم
- عليكم السلام .. من معي؟؟
- قمر الدين موزود (( قمر الدين والا فيمتو خخخخخخخخ))
- منهو؟؟
- هادا سديك كهربائي قمر الدين موزود
- لالالا النمره غلط
- تيب سوكران
- عفوا (( طس لابارك الله فيك هذا وقتك بعد انت ))
ويدق التلفون عقبها على طول وارد عليه (( كل مادق هالتلفون يدق قلبي معه ))
- الووو
- السلام عليكم (( وجعع وش ذا الصوت ))
- عليكم السلام
- عليك الله ياخي داير اكلم عصمان
- منهو ؟؟
- مالك يازول .. داير اكلم عصمان عليك الله
- عليك اللعنه انقلع النمره غلط
- طيب داير شنوا تعصب علينا .. واحد حومارررر
- اقول اقلب وجهك الحين ماني فاضي لك النمره غلط (( تررررك واقفل السماعه ))
المهم زهقت وطلعت لغرفتي وسرحت مع مدام المستقبل (( مستقبل والا ال بي سي خخخخخخ قديييييمه صح قلتها الحلقه اللي راحت )).. وانا بالغرفه واسمع لكم صوت التلفون يرن لكن قلت بقلبي اكيد هذا واحد غلطان بعد خل الوالده ترد هالمره (( الوالده قويه وتهزئ اللي يغلطون بالارقام )) .. واسمع لكم الوالده تقول : مبروك مبروك اله يوفقهم انشاء الله يام سليمان .. انا سمعت ام سليمان واطمر من فوق السرير واجيك مشوت مع الباب ومن العجله يضرب الباب اصبع رجلي الصغير (( ااااااح ياشينها والله )) واطييييير للوالده واقول لها هاه يمه بشري وافقوا؟؟؟
وهي تناظر فيني وتطرق ذيك الزغروطه الحلوه (( قلللللللللللللللللللللللللوووووووووو ش))
وانا يرتاح قلبي... اللهم لك الحمد
المهم حددنا موحد كتب الكتاب ... لكن اهلها اشترطوا اني اكتب واطلع ولا اشوفها ابد الا يوم العرس .... حاولت افهمهم ان هذا مايصير قالوا لي هذا شرط البنت تبي والا الباب ياسع جمل طبعا ابي انا ووجهي ماصدقت انها توافق .. وكتبنا الكتاب وصارت مها زوجتي رسميا لكن عند اهلها .... وحددنا موعد الزواج بعد ثلاث شهور بعطلة الصيف ..
انا بيني وبينكم قررت على الاقل اكلمها وحلفت انها اذا طلعت شينه لا اطلقها وارجعها لاهلها جزاء لهم باللي سووه فيني وحرموني من شوفتها قبل الزواج ... بس وش الطريقه اللي تسمح لي اكلمها؟؟؟؟
صدفه وانا جالس مروق مع كاسة الشاهي بالصاله الا ويدق التلفون وارفع السماعه :
- الوووو
- هلا بدر
- هلا خالتي ام سليمان وشلونك
- بخير الله يسلمك ... امك فيه ؟؟؟
- ايه موجوده .. بس يام سليمان بغيت منك شي اذا تقدرين عليه ؟؟
- ابشر ياوليدي اامر
- مايامر عليك عدو بس مادري اقدر اكلم مها ؟؟؟
- ههههههههههههههههههههههههههههههه طيب طيب ابشر الحين اقول لها تكلمك مع التلفون الثاني
وانا على طول اصكها برقم تلفون غرفتي وقلت لها خمس دقايق وخليها تدق وناديت لها امي ونقزت اغرفتي احتري البنت تدق
والله لايوريكم الخمس دقايق صارت خمس سنين عندي وكل شوي اقول وشبلاها هالخبله مادقت هي ماتدري اني زوجها خلاص؟؟
ما اطول عليكم دق التلفون ودق مصراني معه وامد ايدي علشان ارفع السماعه
*
*
*
*
*

*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
(( هههههههههههههههههههههه لاتخافون ماراح اقول لكم في الحلقه القادمه نتابع ))
المهم رفعت السماعه ويجيني ذاك الصوت اللي والله ماسمعت احلى منه (( تحسون واحد ماعمره شاف خير ))
- الووووو
- هلا هلا هلا هلا هلا هلا هلا وغلا بشيخة البنات والله شدعوه مابغينا نسمع هالصوت
- هلا بك يابدر
- اااااااااااه ياقلبي (( ياجماعه يازين اسمي من اثمها ))
- سلامت قلبك حبيبي
- حبيبي ؟؟؟؟ ياااااااازين هالكلمه الله الله الله
المهم ماني مكمل لكم لانها زوجتي وعيب تسمعون وش حنا نقول... هذي اسرار عائليه (( احلى صارت لي عائله خخخخخخخخ))
واستمرينا على التلفون الين ماجا وقت العرس .... وذاك اليوم تنظفت نظافه مو طبيعيه
وحلقت سكسوكه وخففت الشنب (( صار شنبي تقول بقايا فيمتوا تحت خشمي )) وكشخت بالبشت وصرت تقول اني .............تك تك تك تك تك...(( افهموها انتم )) ورحت للقصر ووقفت مع ابوي وعمامي عند الباب نستقبل الناس ... ومن جا يبارك لي ويقول منك المال ومنها العيال (( ويرد وراهم صلوح الله لا يصلحه ويقول منك العيال ومنها المال == ياجماعه ياثقل دمه هالبزر على قلبي بس هين وين بيروح بكره اوريه شغله )) والشباب اخوياي كلهم حضروا العرس واللي يقول لي شد حيلك ... واللي يقول لي اذبح لها الئطه (( الئطه = قطو = بس )) .. واللي يقول لي عليك بالاستاكوزا ؟؟؟؟؟؟... واللي جايب لي حبوب (( حبوب كيرم لاتفهمون غلط علشان العب انا وياها ونتسلى )) .. وانا طول هالفتره قاعد افكر وش اسوي يوم نصير انا وياها لحالنا (( على فكره معلومه للشباب المقبلين على الزواج كثرة التفكير بهذه النقطه تسبب احراجات ومشاكل الشاب بغنى عنها ليلة زواجه والافضل نفسيا انه مايفكر فيها ويخليها على ربه )) وافكر وشلون راح يكون شكلها .. اكيد قمر اربع طعش والا هالصوت مايليق الا على وحده مزيونه ... وتعشوا الناس ومشت وانا رحت بالسياره واخذت المره معي للشقه (( اول مره اجيب بنت للشقه وما اخاف من الهيئه خخخخخخخخ)) ودخلنا عش الزوجيه ... وقلت لها ادخلي لين اصرف اللزقات اللي جو معنا (( امي وامها وعماتها وخواتها وخلاتها == حشا كل الحريم اللي بالقصر جو معنا؟؟؟)) وبعد ساعه من التصريف بقيت انا وياها لحالنا.... المشكله انها جلست بالصالون على الكنب وموطيه راسها بالارض واسمع دقات قلبها تقول انها طيران الطقاقات اللي كانوا بالعرس وطبعا مغطيه وجهها بالطرحه البيضاء ... وقلت ياولد ما بدهاش قررت اني اول حاجه ارفع طرحتها واشوف وجهها وبعدين ابدا اقردنها الين تدخل للغرفه ونتصرف هناك بالباقي؟؟؟؟؟؟؟؟
وامشي جهتها وانا اغني اغنية راشد الماجد (( شيلي الطرحه عن الوجه السموح ...)) من زين صوتي بعد .. المهم واوصل عندها وامد ايدي ابي ارفع الطرحه وهي تميل براسها يمين ويسار وصارت تلاعبني (( من زود الحيا .. وقهرتني بغيت اصكها كف واقول لها اثبتي مكانك ووجع )) المهم وامسك طرحتها وابدا ارفعها شوي وشي


- بدر... يابدر .. يابدر.. يالله قم تاخرت على شغلك اعوذ بالله كل هذا نوم ؟؟

- طيب طيب يايبه كم الساعه الحين ؟؟
- الساعه سبعه وربع يالله يمديك تغسل وجهك وتلبس وتلحق دوامك
- يالله يالله جايك الحين خلاص
- بس وش فيك كنت تهرج وانت نايم
- اووووووه يايبه حلم ولا اروع الاحلام لكن الله يسامحك ماخليتني اكمله ؟؟
وهكذا اعزائي القراء تنتهي قصتنا مع عريس الغفله اتمنى انها عجبتكم وبالنسبه للنهايه انا قلت لكم (( المخرق عاوز كده )) لكن النهايه مفتوحه واتركها لتخيلاتكم لو ماكانت حلم واكيد بتحطون لها نهايه سعيده ... والله يوفقكم ويزوجكم المراءه الصالحه ويزوجكن الرجل الصالح ويخلي ايامكم كلها افراح وسعاده يارب قوولووو آآآآمين

وسلامتكم
وتوته توته خلصت الحدوته