السلام عليكم ورحمة الله وبركاته
وان شاء الله بتخلص هالسنة وبتبدأ السنة الجديدة وانتو وكل حبايبكم بخير .. وتكون سنة خير على المسلمين جميعاً في كل مكان آمين ..
بصراحة الموضوع ما فيه إلا كم طبق جديد والباقي إعادة ، لأني كل يوم عم تجيلي رسائل بتطلب وصفات او صور من المواضيع اللي راحت الصور منها .. وطبعا الوصفات ضايعة بين الصفحات كمان فقررت احط موضوع اجمع فيه كل اللي نزلته من اطباق ووصفات ان شاء الله يكون أسهل للكل ..
معظم الأطباق مصورتها في عزايم وعشان هيك رح تشوفوا سفر كتيرة وأطباق قليلة لان أطباق العزايم غالباً متكررة .. معظم عزايمنا في رمضان .. ورح تلاحظوا انه ما في اي شي اله علاقة بالمعجنات لانها مش طبق رمضاني عنا ولاني انا ما بعملها نهائياً (فاشلة فيها)..
طبعا اللي عندها اي سؤال بخصوص اي وصفة انا جاهزة للرد والتوضيح. ما عرفت كيف أقسم كل الأطباق طالما كلها موجودة عندي وجاهزة .. فقررت أحط كل عزيمة أو جمعة لحالها في رد ومعها الأطباق والوصفات .. والطبق اللي بيتكرر ما رح احط طريقته اكتر من مرة طبعا .. وان شاء الله يكون تصفح الموضوع سهل عالكل ويكون مفيد ..
بصراحة تغلّبت كتييير في هالموضوع مع انه كلها اطباق قديمة بس الصور اضطريت اجمعها من اول وطبعا كتييير في صور ضاعت ووصفات طارت لان كمبيوتري وكاميرتي انسرقوا من فترة وعليهم كل شي .. لقيت شوية صور على المنتدى لسه ما طاروا ولقيت صور على الفيسبوك كنت بوريها لصاحباتي .. فيمكن يكون كم صورة ناقصين او مو مزبوطين تمام بس المهم توصل الفكرة بعد كل هالتعب ..
ويا ريت اللي يعجبها شي تقول ما شاء الله حتى لو ما تكتبها ..
نبدأ بسم الله الرحمن الرحيم
هاي عزومة رمضانية لحوالي 8 أشخاص ..
green
الأطباق هي: قدرة باللحمة ، لازانيا، أجنحة دجاج، سمبوسك وسبرينغ رول، سلطة خيار باللبن، سلطة خس وسلطة جرجير
القدرة
أكلة فلسطينية من مدينة الخليل – هي رز مع حمص وتوم وممكن تنعمل مع اللحمة أو الدجاج – بس اللي بيميزها انها بتنطبخ في قدر فخاري في الفرن. طبعا انا ما عندي هالقدرة فبعملها بالطنجرة العادية وبتطلع طيبة بس أكيد مو أصليّة
qidreh
وهاي طريقة القدرة بالتفصيل:
بتحتاجي كمية من الحمص المسلوق او علبتين لو كان معلب ..
راس توم كامل مقشر ومقسم فصوص كاملة (مش مفرومة أو اذا كانت كبيرة كتير بنقسمها نصفين بس)
رز بسمتي ، لحم خروف بعظم ، بهار حب (هيل، فلفل أسود، بهار حلو، قرفة) و مكعبات ماجي
بهارات القدرة ممكن تلاقيها عند محلات البهار والعطارة ، واذا ما لقيت بينفع بهار مشكل مع زيادة الكمون
بهار السمن كمية قليييلة ..
الطريقة
- نسلق اللحمة مع بصل وورق غار ونكب ميتها بعد خروج الزفرة وبعدين نغسلها ونسلقها كمان مرة مع بصل والبهارات الحب والماجي
- ننقع الرز اقل شي نص ساعة، وبعد ما نصفيه نخلط معه البهارات المطحونه والملح والحمص والتوم
- في الطنجرة بنقلب شوية بهار حب وبعدين نحط الرز ونقلبه بزيت الزيتون و بعدها نغمره بمرق اللحم وهو ساخن بعد ما تستوي اللحمة
طبعا الرز معه الحمص والتوم ..
بعد استواء الرز نسكبه في الطبق وفوقه قطع اللحم ونزينه حسب الرغبة
الطبق التاني لازانيا باللحم المفروم والباشميل
بتعملي حشوة اللحمة المفرومة مع بصل ومشروم وبهارات وبس تستوي بتزيدي عليها صلصة بندورة مع مية و خليها تتسبك بس تكون مرقة يعني سائلة شوي
بتعملي باشميل: بالخلاط بتحطي معلقتين طحين مع 3 حليب بودرة ومعلقتين زبدة و ملح وفلفل أسود وحبتين جبنة او معلقتين جبنة سائلة .. وكاسة مية و بتحطيهم على النار مع التحريك لحد ما يصير كثيف
هلا بتدهني الصينية او البايركس زبدة وبتصفي شرايح اللازانيا اول طبقة وبتغطيها منيح بالحشوة والصلصة و اذا بتحبي شوووييية باشميل ..
كرري الطبقات هيك و غرقيهم منيح بالصلصة - لانه اللازانيا مو مسلوقة
وبعدين اخر طبقة حطي عليها بس باشميل و يكون كل شي سخن لما ترتبي الطبقات
وحطيها بالفرن على 180
يعني تقريبا 350 فهرنهايت
لمدة 25 - 30 دقيقة بتكون تمام
بعدها بتحطي على الوش جبنة موزاريلا مبروشة وبتحمريها تحت الشواية
جوانح الدجاج بالعسل وصلصة الصويا
chicken_wings
نضفي الجوانح وانقعيهم من قبل بيوم أو بالصبح بخلطة عسل + صلصة صويا + شطة + بصل أخضر + ليمون + زيت زيتون + كاتشب+ ملح وبهارات .. ووقت الطبخ بطني صينية بالقصدير (لانه العسل بينحرق و بيلزق) و حطي الجوانح فوقها مع مية ومكعب ماجي (اختياري) واتركيها حوالي ساعة من غير ما تغطيها في الفرن على حرارة 180 تقريبا .. ممكن اضافة الفلفل الحلو للتتبيلة
مرة ما كان عندي عسل و جربت احط ظرف الكراميل اللي بيجي في علبة الكريم كراميل مع البودرة، وكان الطعم رائع جدا
الصوص اللي بالوسط جاهز – باربكيو صوص ، وفي طبعا انواع خاصة بجوانح الدجاج حارة وعادية
girls
girls_2
الأطباق: مقلوبة باتنجان باللحمة، لازانيا، أصابع موزاريلا مقلية، شيش طاووق، سمبوسة وسبرينغ رول، خبز بالزعتر والثوم، بطاطس مهروسة (ماشد بوتيتو)
المقلوبة طبعا اكلة تقليدية معروفة عنا ممكن تكون بالزهرة (القرنبيط) أو الباتنجان وممكن تنعمل بالنوعين بنفس الوقت – وممكن تكون بدجاج او لحمة حسب الرغبة - هاي طريقة اللي باللحم ..
ma2loubeh
المكونات (وكميتها حسب الرغبة ما في مقادير) لحمة بعظم ، رز بسمتي، باذنجان ، بندورة ، ثوم ، بهارات حب، وبهار مشكل مطحون ، شعيرية، لوز وصنوبر للتزيين
اول شي بتغسلي اللحم منيح وبنغليه في طنجرة مع بصل وورق غار لحد ما تطلع كل الزفرة اللي فيه ... وبعدها بنكب المية وبنغسل اللحمة وبنحطها في طنجرة نضيفة (انا بسلقها في طنجرة الضغط) .. مع بهار حب وبصلة مفرومة وورق غار وروزماري (حصى البان) لحد ما تستوي .. ما بحط معها أي بهار مطحون وممكن نحط ماجي معها ..
في اثناء ما تستوي اللحمة اول شي ننقع الرز حسب الكمية اللي لازمتك .. انا بعملها بالرز البسمتي الطويل.. و بنكون من قبل بفترة قطعنا الباتنجان وقشرناه و بنحطه في مصفاية مع كمية ملح حتى تنزل المية اللي فيه وبالتالي ما بيشرب زيت لما ينقلي ..
اقلي الباتنجان في الزيت وبعد ما تخلصي اقلي حبة بندورة او حبتين مقطعين ارباع او أصغر شوي في نفس الزيت ، وبعدها اقلي ثوم مش مفروم يعني يكون فصوص كاملة او مقطوعة من نصفها فقط، وارفعي البندورة والثوم من الزيت واخر شي اقلي شعيرية في نفس الزيت .. بس انتبهي لانها رح تتحمر بسرعة عشان الزيت سخن مستخدم من فترة..
هلا نصفي الرز اللي نقعناه اقل شي نص ساعة، و بعدها نبهر الرز بالبهار المشكل المطحون وشوية ملح و أي بهارات بتحبي تكون نكهتها ظاهرة في المقلوبة . .. و بعدها بنضيف عليه الشعيرية ونقلبهم منيح..
لما تستوي اللحمة بنصفي المرقة و بنشيل اللحم على جنب ونبدا نرتب طنجرة المقلوبة .. اول شي بنرص الباتنجان المقلي في القاع وعلى جوانب الطنجرة ومعه الزهرة (القرنبيط) لو كانت المقلوبة مشكلة .. و بعدين بنرتب قطع اللحمة (او الدجاج اذا كانت مقلوبة دجاج) و بعدها نحط الرز والثوم والبندورة و بنغمر الرز بمرق اللحم الساخن و بنحطها على نار عالية حتى تبدا بالغليان
في هالمرحلة ممكن نذوق الملح من المرقة ونعدل الطعم بالبهار او الملح ان لزم، و نوطي النار على اقل مستوى و نغطي الطنجرة لحد ما تنشف ميتها ويستوي الرز
نقلبها في صينية حجمها مناسب و نزينها باللوز او الصنوبر المقلي او حسب الرغبة ..
أصابع الموزاريلا
mozzarilla_sticks
بدك تشتري اصابع الموزاريلا Mozzarella strings / sticks من السوبرماركت تلاقيها عند الاجبان
جهزي بيضة مخفوقة وخليط بقسماط و خليط طحين مع شوية ملح وفلفل .. واقسمي كل اصبع جبنة لقسمين و اغمسي كل واحد منهم في البيض ثم الطحين ثم البيض كمان مرة ثم البقسماط ... اهم شي في هالعملية ما يبقى اي جزء ظاهر من الجبنة عشان وقت القلي ما تسيح في الزيت وتبهدل الدنيا .. و كرري العملية مع كل الجبنة وبعدين حطيها في التلاجة لحد وقت القلي
اقليها في زيت حامي وغزير حتى تتحمر ..
الصوص اللي معها كاتشب مع مايونيز وفلفل أبيض
سبرينغ رولز بحشوة صينية
spring_rolls
الحشوة جزر وفلفل حلو وبصل كلهم مقطعين أعواد رفيعة ومطبوخين مع صويا صوص والبهار اللي تحبيه بس خفيف طبعا – الصوص جاهز اسمه Sweet & Sour Chili موجود في كارفور ومحلات السوبرماركت
اللازانيا
lasgna
طريقتها بالرد اللي قبل