في الكليه طلب مني واحد من الدكاتره ازور مستشفى لأنهم يحتاجون احد يفهم في التعليم الخاص ويعرف عربي..




استغربت من الطلب شوي لأنه جاني بصفه غير رسميه ..



مثل اللي يقولون اذا ماودك بكيفك..



رحت اشوف وش عندهم ..



كان في استقبالي دكتوره مشهوره ..كنت ادرس في الكتب اللي تألفها يوم كنت ادرس ماستر وفي نفسي من زمان اقابلها ..




قالت: ان فيه رجل اعمال مشهور ,عنده طفله عمرها 8سنوات تعاني من صمم كامل وتم علاجها ..




بعد عمليه متطوره جداً..وصارت تسمع بشكل بسيط ..ويبون احد يأسسها بالعربي لأنها ماعندها لغه ..ولاتعرف تتكلم ابداً..




اعترف ان الموضوع صعب علي ..




غير انها بنت صغيره وتوها طالعه من عمليه ..انا مااحس اني جاهزه ولا واثقه اني ممكن اقدم لها المساعده اللي تحتاجها ..




شجعتني الدكتوره ..وطلبت منها اني اقابل اهل الطفله..



كان شاب سعودي في الثلاثينات تقريباً..و وسيم جداً..



فهمته اني موب واثقه اني اقدر اسوي للطفله شي لأن هي اساساً كانت حاله ميؤوس منها ..



وواعدته اني بحاول أأسسها بللي اقدر عليه..



كتب لي شيك بمبلغ كبير كمقدم ورفضت ..




قلت له لاتدفع شي,, انا لو سويت شي, بسويه عشان اعطي بنتك فرصه تعيش مرتاحه موب عشان الفلوس..



كانت بنته من ام بريطانيه..وطول عمرها مع امها ..وتقريباً ابوها وجه جديد عليها..



كان راي ابو فهد محبط لي هالمره ..قال لي مالك شغل بالناس ..ولاتسوين لهم شي ..



بس اني كنت مصره ..



انا مادرست ولاتعبت الا عشان اخدم هالفئه بكل شي اقدر عليه ..





وقلت لأبو فهد لو ماتنطق الا اسمها هذا انا اعده انجاز بالنسبه لي..


مع الوقت بدت البنت تتحسن واتقنت خمس كلمات في اسبوع واحد واعتبر هالشي تقدم كبير في حالتها وفي مستواي انا بعد..



الدكاتره في الكليه موب مصدقين المستوى اللي وصلت له,, واسر لي واحد منهم انه يتوقع اجتاز الدكتوراه بإمتياز ..



مرت الأيام سريعه وبيوم صليت الفجر ونمت ..



دق جوالي وارتعت وقمت مفزوعه ,,مكالمه دوليه من الرياض ..



الله يستر لا يكون اهلي فيهم شي ..



رديت


على الطرف الثاني كانت وحده مبين انها كبيره بالسن ..



ـ الله يجزاك خير يابنيتي ماقصرتي ..والله انك فرحتي قلبي ..



ـ هلافيك من معي..



ـ انا ام ناصر جدة البنيه اللي تعالجينها والله مااعرف اقول اسمها ..



ـ هلا فيك ياخاله ..ههههههههههه والله بيني وبينك حتى انا مااعرف انطقه ..



ـ قلت لأبوها يغيره بس قال بعدين بيغير الجواز والإسم..



انتي نايمه ,الا شكلك نايمه ,اسفه يابنيتي بس ابي اشكرك ,,توها البنيه كلمتني بالتلفون تقول (الله)......




ـ لايهمك ياخاله انا ماسويت الا الواجب ومابي منك الا الدعاء ..




انتهت المكالمه وانا في احسن حالاتي ..




من مميزات تخصصنا ان أي شي نقدمه لهالفئه مستحيل ينسونه ..يعني انا ممكن انسى الشي البسيط السهل اللي ماكلفني اكثر من ساعه ..



بس بعد شهور طويله او حتى سنين يصادف انك تقابل نفس الشخص ومازال يذكر اللي سويته ويشكرك عليه ويدعي لك بعد >>>>واقع ..




الشي المهم اللي حرصت عليه في تأسيس الطفله.. الجانب الروحي ..





هي مجرد طفله تعاني من صمم ..وماعندها أي عقيده عشان كذا كان اهم شي عندي تتقنه عقيدتها والشهاده(لااله الا الله)..




يمكن اكثركم يظن اني مكبره السالفه وانها لاحقه على التعليم ..



بس اني اشوف اهم شي نبدا نأسس العقيده عند الطفل ..



لأن الإنسان بدون عقيده مايسوى وانا اشوفه مجرد حيوان مع احترامي..


وقفت معها على 26كلمه واقترحت على اهلها انها خلاص موب حاجتي ..ماشاء الله ..فهمها سريع وتقدر تمشي في أي مركز ..


ورفضت أي مبلغ مع انهم اصروا..



انتهت السنه وكان فهد يبي يرجع للرياض فترة الصيف ..



الحقيقه ماكان عندي رغبه ارجع وكنت ناويه ابدا اشتغل على الرساله بس قلت موب مشكله شهر بالكثير مارح يضر..





في المطار وحنى راجعين دق جوالي ..كانت ام ناصر..




مليت منها الله يصلحها كل يوم تدق ..



مشكلتها تحسبني طبيبه ماتدري اني مجرد استاذه وبعد موب شغلتي اللي اسويه معهم..



ودايم تسألني عن حالة حفيدتها اسئله ماادري كيف اجاوب عليها ..




رديت عليها وكان في نيتي تكون آخر مره ..




خبرتني انهم سمو البنت على اسمي ..وشكرتني كثير ..وطلبت مني تتعرف على امي ..وقالت ان لها زياره قريبه لنا ..



ماجا على بالي ابداً انها ممكن تفكر فيني كزوجة ابن ..



توقعت انها بتحاول ترد الجميل بمبلغ او شي لي ممكن استفيد منه ..مثل تقول انها بتسدد عني اقصاد السنه للجامعه..




رجعنا ..



خبروني اهلي ان فيه وحده دايم تتصل تسأل عني ..ظنيت انها من زميلات الجامعه ايام ماكنت في الرياض وطنشت الموضوع..



وفي مره كنت عند التلفون ..



دق ورديت ..


بعد السلام ..


ـ معقول ماعرفتيني..

انا:لا والله من معي ..ترا والله الذاكره لك عليها ..يمكن بديت اعجز ههههههه

ـ انا ام وليد ..

ـ سلمى.. مااصدق..

ـ ايه سلمى..معقول نسيتي؟




طبعاً انا من اكثر الناس كرهاً للماضي مهما كان حلو مااحب اذكره ..




حاولت انهي المكالمه بأقصى سرعه مابي اذكرها ولاابي اذكر موقف تركي معي ..



مالكم بالطويله ..



جت ام ناصر وتعرفت على الوالده وطلعت تعرفها من زمان ..




طنشت الموضوع لأسباب كثيره من اهمها ..



ماكنت ابي اتمنى شي وافكر فيه وهو مستحيل ,ويصير لي نفس الموقف واحرج نفسي ..




وبنفس اليوم جت الوالده وكلمتني بالموضوع ..وقالت انها حاسه ان ام ناصر تفكر فيني وبتخطبني قريب ..




وذكرت الوالده ان هالموضوع خلاص انتهى وماله داعي نفتحه من جديد ..




سكتت وطنشت هي بعد..




بيوم السفر كلمت ام ناصر الوالده بالموضوع وجت تخبرني ..




قلت لها اني احسه شخص غير جاد ..وانه مافكر فيني بس مبين ان امه معجبه بللي سويته وتحمست زياده ..



زعلت مني الوالده وقالت لي: لمتى بشيل همك ؟تزوجي وفكيني ..

تأثرت بكلمتها وطلبت مهله افكر لحد اجازة العيد تقريبا شهرين ..وسافرت ودمعتي على خدي ..



بجد مدري متى بيتطور مجتمعنا؟ للساعه اللي اكتب لكم فيها وهم بنفس التفكير..



البنت اللي ماتزوجت ناقصه..



ياكثر الدكتورات اللي اعرفهم وماتزوجو ..وعايشين عيشة ملكات..



لاهم ولاغثى..



مالكم بالطويله ..



مرت علي ايام سودا وانا اشتغل على الرساله ..



كنت احس بأعراض غريبه ..بديت امرض..




اعترف لكم اني مع الوقت بديت افقد الحماس لفكرة الزواج ..




تقريباً عمري 35سنه ببدا من جديد؟




اغير نظامي اللي تعودت عليه سنين طويله ويجي شخص يصير مسؤول عني ويتحكم فيني ؟




بجد نظرة اهلنا زمان صح ..الزواج المبكر احسن..




تكون فيه البنت توها صغيره ومستعده تتقبل أي شي ..




زوج



اطفال



مسؤوليات




اما انا مااحس اني قدها ابدا ..



وحتى لو رضيت بالأمر الواقع وتزوجت مارح اكون مرتاحه ..




شي تعودت عليه سنين طويله مااقدر اغيره كذا مره وحده ..



واتخذت قراري ونويت اخبرالوالده قريب ..




خفت الوالده تصر علي واغير قراري ,,وحجزت لفهد بلحاله يروح يتعيد وانا جلست ..





كلمت الوالده وبلغتها برفضي وانتهى الموضوع..



مرت الأيام بطيئه وممله وكريهه وأخذت الدكتوراه بإمتياز ..




كان في نفسي استقرر في بريطانيا وادرس في الجامعه بس رفضو ..




رجعت للسعوديه..




اعتمرت مع الوالد والوالده ..ودعيت بالحرم اكثر من ساعه ربي يرزقني بالوظيفه الحلم بالنسبه لي..




جلست في البيت ثلاث شهور اصبت بإكتئاب ..




لأني متعوده على الشغل والروحه والجيه, وفجأه فضيت شي طبيعي اللي يصير ..




بيوم اتصلو فيني الجامعه وطلبو مني ادرس بالكليه وموب بس ادرس ..





قالوا ان الوكيله(نشوى) خلص عقدها ورجعت بلدها ولازم احد يمسك مكانها ومافيه شخص أكفأ مني لهالمنصب..




ووافقت




ومع اول يوم عمل دخلت علي بنت تصيح ..




انا: وشفيك يابنتي ..عسى ماشر؟

ـ ابي اغير هاذي الشعبه ,ورفضو ..تكفين يادكتوره ساعديني ..

ـ ليه يابنتي ..وشفيه؟




قصرت صوتها وكأنها خايفه من شي ..

ـ يقولون الدكتور اللي يدرسها مجنون ,والمستوى الماضي رسب كل الشعبه ومانجح الا ثلاث بنات..

مسكت الملف بشوف من هالدكتور اللي مرسب خلق الله على غير سنع.. وسألتها:وش اسمه؟



ـ اسمه د/تركي..



ـ هاتي نموذج تغيير الشعبه وتعالي اوقعه لك..

انتهت الرواية... :09: واتمنى انهااعجبتكم...منقوووووولة
لاتنسوني من دعواتكم ..الله يسهل حملي وولادتي ويرزقني المولود السليم المعافى..وكل محروم..ويطوي غربتي بسرررررعة وعلى خير...
عسى ربي يعجل رجعتي للسعودية....:icon35:

مشكوره على القصه وكنت اتمنى ان لها تكمله
الله يتمم لك حملك ويسهل عليك ولادتك ويفرح قلبك بشوفت جنينك ويردكم لوطنكم باعلى الشهادات

مشكوره حبيبتي تسلم
والله يسهلك ولادتك
وتقوميين بالسلامه ان شاء الله