قلت لأهلي اني اشتقت لهم وجيت ..



وطبعاً الوالده حاولت كم مره تقنعني بأبوسعد ,وان الزواج احسن من الغربه لكني رفضت ..


بديت افكر افكار مدري منين طلعت ..بالإستقرار,بالأطفال,بالحب ..بأمور كثيره..



وقررت بالأخير اتزوج تركي ..


كان قرار صعب ..



للأسف مااقدر اكمل حياتي بدون زواج ..



كلمت اهلي ووافقو على طول ..



تركي بالنسبه لي آخر فرصه ممكن اتزوج فيها ..



رجعت نيوورك ..



فتحت جوالي الثاني وكان مليان مسجات وينك ؟وليه ماتردين؟



دقيت على تركي ورد..



انا: هلا استاذ..

ـ هلافيك يازهره ..

ـ تقدر تكلم اهلي اللحين..

ـ وش اكلمهم فيه ؟




كان موقف محرج جداً بالنسبه لي وله بعد ..



واضح انه ماكان بوعيه وقتها ..



حاولت انسى الموضوع واشيله من راسي مره ثانيه ..





بعد خمس شهوروصلني خبر ان تركي أخذ الدكتوراه ورجع للرياض ..





خلصت دراسة الماستر وماباقي الا الرساله ..



فكرت اعدل على رسالتي واسلمها بس تمنيت تكون رسالتي حديث الموسم ..



وبديت اشتغل ليل مع نهار على وحده جديده بمستوى الكليه اللي انا فيها ..



بفترة كتابة الرساله


كنت اشتغل ليل ونهار..لأني خفت تكون اقل من المستوى واتفشل قدام اساتذتي واطلع بالمناقشه مااسوى ..


سيطرت علي الكوابيس والأحلام..


مرات اشوف لابتوبي ينسرق ويضيع كل تعبي وشغلي,, ومرات اشوف ناس تقطعني بسكاكين ..



لدرجة اني من قوو الوسوسه صرت أي شي اكتبه انسخه على سي دي واطبعه واصوره ثلاث نسخ..


وقتها ماكان عندي مكتب ..كنت اشتغل على الأرض ..



احط اوراقي على الأرض واتسند على الكنبه الوحيده عندي ..



تعبت نفسيا وجسديا ..


كتفي من كثر الجلسه ماعد اقدر احركه..


من اصحى الصبح آخذ لابتوبي واروح مركز التأهيل ومن المركز للمكتبه ومن المكتبه ارجع البيت واكمل شغل ..


كان ودي اشتريلي مكتب وكرسي عشان اريح نفسي بس وين احطه ؟,,هذا السؤال..


غرفتي مره صغيره وماتكفي وتقريبا مساحتها نصف مساحة غرفتي في بيتنا..



كانو البنات دايم يحاولون يقنعوني اسكن معهم بنفس العماره ..طبعاً العماره اغلب سكانها جنسيات عربيه ..



اللي معها ابوها واللي اخوها واللي زوجها ..
بس كان السكن فيها غالي شوي..



كلمت اهلي ورتبت معهم وحولو لي مبلغ حليو..



كان اقل من اللي توقعته بس شي احسن من لاشي ..

سكنت بشقه لحالي لأني من جد تعبت من الغرفه الضيقه اللي كنت فيها وبعد ابي آخذ راحتي بشكل عام..


ابي اتروش بكيفي موب احد يجي يشرط علي عدد دقايق معين ..


ابي ارفع صوت التلفزيون براحتي..ابي اعزم زميلاتي ..ابي ارتاح ..




وادمنت الوجبات السريعه وقتها..


طبعاً ماعندي وقت اطبخ ,,وكل شوي اطلب بيتزا لأن محلها كان بنفس العماره تحت ..


وزاد وزني الضعف..


خلصت الرساله اللي مابغت تخلص ..



بعد ماحطيت فيها اكثر من مجهودي ..ومع كذا كنت خايفه افشل بالمناقشه ..


يومياً ادعي واستغفر ..



كنت اتمنى مقبول بس مااتفشل ويطيح وجهي ..



من كثر الخوف والهم طبعتها وصورتها اكثر من نسخه..ووبديت اوزعها ..



نسخه ارسلتها بالبريد لأخوي,ونسخه حطيتها عند الهام..


بيوم المناقشه كنت مرتبكه بالمره وطلعت بدري..


بالطريق دخت ومدري وش صار لي ووقفت على جمب..


صرت اشوف الدنيا سودا..


صحيت ولقيت قدامي رجل امن ,وطبيب مسعف..


قالو ان صابني انخفاض بالضغط..ونصحني الطبيب اروح المستشفى آخذ ادوية ..ضغط ..



انا مصابه بالضغط بهالعمر .. اجل على الخمسين وش ممكن يصيبني ؟؟



حمدت الله على قضاءه وقدره..



وكملت طريقي..



كانت المناقشه اصعب مما تخيلت ..



بكيت,انفعلت ..وكان من الغباء ان هالأمور تصير..



المفروض كنت اضبط نفسي اكثر..



توقعت اجتاز المناقشه.. بمقبول او جيد على الأكثر..وجبت جيد جداً..



كانت فرحة ابوفهد ماتوصف وكأني واحد من عياله موب اخته...



الحقيقه كنت فرحانه مررره بس ماحبيت يكون هذا آخر شي ممكن اسويه بحياتي وسجلت عشان ادرس دكتوراه ..




وانتظرت الموافقه..



بهاذي الأثناء جاني اتصال من الجامعه في الرياض..



وصلهم الخبر اني خلصت الماستر ..وطلبوني ارجع ادرس في الكليه كأستاذ محاضر..لأن عندهم عجز كبير في اعضاء هيئة التدريس..




كان عرض مغري من جد لكني رفضته..



لغرض في نفسي ..وهو اني مستحيل ارجع الكليه وتصير نشوى احسن مني ..




وعاهدت نفسي ماارجع الا بعد الدكتوراه ..



ادري انها صعبه وموب بس صعبه الا شبه مستحيله ..بس كله يهون عند الإحساس بالعظمه..



احلى شعور بالدنيا .. انك تكون محل اهتمام الناس وتحس انك مهم عندهم ومايقدرون يستغنون عنك..




هذا كان ردي على أي شخص يقول ارجعي ودرسي بالكليه ..

بيوم من الإيام كنت سهرانه عند الهام وجت اختها من سوريا واخذتنا السوالف وتأخرت لحد نص الليل..



رجعت البيت والا باب شقتي مفتوح..



دايماً كان عندي شك اني ممكن انسرق ..عشان كذا ماقد حطيت شي مهم وخليته..



التلفزيون والرسيفر بس اللي فقدتهم..



ماحبيت اسوي شوشره وقصه مالها سنع وطنشت الموضوع ..



بعد اسبوع جاني خبر انهم رفضوا اكمل الدكتوراه على حساب الدوله ..



طفشت وضاق صدري وبلغت ابو فهد..


وكان رده لي غير متوقع ابداً..



قالي بالحرف الواحد:



تجين وش تسوين؟ خليك على دراستك احسن واذا على المصاريف انا متكفل فيها كلها..بالمكان اللي تختارين..



استغربت رده ..
ليه مايبيني اجي؟ معقول سامعين شي ؟




مالكم بالطويله ..




بديت اراسل جامعات مختلفه بجميع انحاء العالم ..عشان ادرس..
واكثرهم وافقو ..




بس الأقصاد كانت كبيره ..ومااعتقد اني بقدر اسددها كامله لأبو فهد حتى بعد مااتوظف..



وقررت أخيراً اكمل دراسة الدكتوراه في بريطانيا..




كانت جامعه راقيه ..




ردوو علي بنفس اليوم ..



وبلغت ابو فهد..






كان في نيتي ارجع للرياض واشوف اهلي لأني مشتاقه لهم مره وفرصه اشوفهم قبل انشغل ومااضمن اقدر بعدين اجي والا لا ..




جيت والحرب مشتعله بين ابوفهد وزوجته وعياله ..



اول يوم ماحاولت اتدخل ..



ثاني يوم وكان جمعه ..



صحيت الصبح وكان اخوي يهاوش ولده ..



ـ انت مانت بنافع بشي لادين ولادنيا..قم صل يارب اصلي عليك وافتك..



ادري انه ماقالها الا لأنه معصب ..



اخوي واعرفه زين يثور, يثور, وهو مافيه اطيب من قلبه..



على الغدا..



فقدت فهد ورحت ادوره..ولقيته بالصاله يطالع التلفزيون..




ـ وشفيك مزعل ابوك؟ كنك بزر,,,, اللي بعمرك يريح ابوه في البيت ويشتغل مكانه..


ـ والله مهوب مني هو من نفسه زعلان على النسبه ,وشفيها 87%؟؟ والله اعرف ناس جايبين اقل ومبسوطين..


ـ بس؟ هذا اللي قدرت عليه..الله لايلومه ابوك انا لو منه ذبحتك..اجل يانذل بعد اقصاد المدرسه الغاليه وبس 80؟


ـ وش اسوي؟ دراسه. درست ..تعب. تعبت .. حل. حليت,, بس مدري عن مدرستكم هاذي ليش نسبتي قليله..


ـ ياويل قلبي بس لايصير لأبوك شي..من كل عمره نفسه يدخلك هندسه ويفرح فيك ....بهالثمانين ولا جغرافيا تقبلك ..آه يالقهر ..




فكرت بفكره ونويت اقولها لأبو فهد اول مايهدا ..

العصر طلعت مع الوالد والوالده للبر وجلسنا نسولف..



كانو مشتاقين لي مره وهالشي شفته بعيونهم ..




الوالد:والله يابنيتي صحتك احسن من اول الحمدلله ..



الوالده: حتى وجهها صاير زين معاد هي عصاقيل مثل اول..



كنت مرتاحه ومبسوطه لأنهم فخورين فيني ..وأخذتنا السوالف ..



انتهت الرحله وانا طايره من الوناسه ..



موضوع العرس والغربه مااحد جاب طاريه.. وكأنهم ولله الحمد تعودوا على وضعي وارتاحوا عليه..



رجعنا على المغرب


فتحت الباب وكان ابو فهد ينتظرني ..



ـ زهره تعالي ابيك..


ـ سم ياابو فهد..


ـ ابيك تشوفين جامعه لهالفاشل ,برسله معك يدرس كود يفلح ..


ـ تصدق عاد..كنت انتظرك تهدا شوي واقولك ..


ـ ابيه مايلقى وقت للشلل,24ساعه دراسه ..مابيه يجلس عندي هنا لاجامعه ولا وظيفه ويدل الإستراحات والخراب..بسرعه راسلي أي جامعه وانا مستعد ادفع أي مبلغ المهم يدرس ويصير تحت عينك ..


ـ طيب قوله اول ..


ـ وش اقوله..يسافر يدرس غصبن عليه ..موب كيفه ..اجل يجلس عندي ؟


ـ طيب على الأقل عشان تسأله وش التخصص اللي يبيه..


ـ هندسه..بسجله هندسه ..


ـ ابشر ياابو فهد ماطلبت شي والله ..





..
انا ادري ان مافيه شي بالغصب ,,عشان كذا كنت ناويه اخبر فهد قبل اخطي أي خطوه تخصه..




وثاني يوم الصبح جلست اتناقش معه بخصوص مستقبله..



فهد عكس ابوه تماماً..شخص سلبي ,وبليد ,وكسول ..



يبي كل شي يجيه مكانه وهو مرتاح..


في نهاية النقاش وبعد مااحتد..


ـ ياعمه وش اسويلك ,انا غبي ماافهم ..اقطع نفسي عشان ترتاحون ..


ابي شي سهل مافيه تعقيد ..ماطلبت مستحيل..



ـ وش اللي سهل؟ لعلمك ترى مافيه شي سهل ..


كل شي يبيله كرف ..



فهد شوف ياامي ..



اذا كنت واحد ناوي تلعب وماعندك نية دراسه قول من اللحين قبل يتخسر ابوك على الفاضي..




جت امه من المطبخ وشوي وتطقه..




ـ اسمع يالنذل ,دراسه بتدرس غصبن عليك ,اختارلك كلية زينه لاتدرس خرابيط ..

واحمد ربك ان عمتك قالت لك والا ترى ابوك ناوي يدرسك هندسه ..



ـ هندسه..اكيد بفشل فيها ..هاذي يبيلها دوافير موب مثلي على قدهم..



ـ ان مادرست لاانت ولدي ولااعرفك ..ربي يعوضني في عبد العزيز عنك يالفاشل..




كنت معترضه على اسلوب اخوي وزوجته ..



ماعندهم الا التهديد والوعيد ..



كان في نيتي اصلح هذا الإنسان واعطيه فرصه وامل بالحياه يفتح صفحه جديده مع نفسه ..

قلت: فهد البس ثوبك بنطلع ..



ـ وين؟



ـ انت بس البس بنروح اوريك شي ..




طلعنا ..



الحقيقه كنت ابي ابعده عن امه وابوه واقنعه بأسلوب آخر مختلف تماماً..





طول الطريق وانا اعطيه امل واسولف عليه ..كان ساكت مايتكلم ..



فهد مثل شبابنا اليوم ..




محتاجين احد يعطيهم امل بالحياه, وشوية تشجيع..



حكيت له قصة تركي المريض نفسياً ويجمع العلب كيف أخذ الدكتوراه وصار يدرس في الجامعه ,وحكيت له قصة ابوه وكيف كافح ودرس على قل امكانياتنا ذاك الوقت ..وحكيت له قصتي وكيف الناس قامت تتكلم عني وطنشتهم ودرست وأخذت الماستر..




بطريقنا شفنا وحده من اكبر شركات الرياض..كانت توها فاتحه والعم توه مداوم الساعه 10 الصبح, والسكيرتي يفتح له باب السياره ..




طالعت فيه وقلت:



فهد شوف.. انت اللي بتقرر اللحين ,تكون مثل العم اللي يدوام الساعه 10 والا مثل السكيرتي اللي يفتح له الباب..




طالع فيني وكأنه بدا يستوعب الوضع اللي هو فيه ..




فهمته على طول وبديت اتكلم ..



ـ ترا والله سهله ,بس اجتهد ..وانت اذا حبيت التخصص بتبدع فيه ..



ايهم احسن تتعب شوي كم هي 7سنوات ,وترتاح باقي العمر ؟ والا تكسل في شبابك وتتعب بعدين؟؟



فهد بالله ماطفشت وانت كل يوم مثل اللي قبله ؟ ماودك تجرب شي جديد ؟




عالم تشجعك على الدراسه وتخليك تحبها ..هدوء وراحه نفسيه ..



ماانت مضطر تجامل ..ماانت مضطر تتقيد بتقاليد وعادات انقرضت من سنة جدي..




مرت ساعة صمت وكأنه يفكر بالموضوع..



وقطعه..




ـ عمه, برايك وش اتخصص؟




كانت سعادتي ماتوصف لأني قدرت اقنعه..




وبعد مشاورات قرر يدرس قانون ...وسافرنا..


كان البحث عن سكن لي ولولد اخوي صعب جداً لأننا مانعرف أي احد في بريطانيا ولاقد زرناها ابداً..



واستقرينا بسكن الجامعه..




كان السكن اشبه بفندق خمس نجوم ..




حسيت بالذنب عشان اخوي..لأن السكن مره غالي ..




وجلسنا ندور شقه على قدنا..




الحياه في بريطانيا صعبه مره واصعب من امريكا نفسها ..كذا كنت احس..




كان فهد كسول ..مايدرس الا بعد تعب وجهد كبير مني في اقناعه ..





بس مااقدر انكر انه تطور وصار يحب الدراسه ..بعد ماشافني قد ايش مهتمه ..





نجح بممتاز اول مستوى وكانت فرحة ابوه وامه كبيره مره ..





وشايفين اني مسويه فيهم جميل ومعروف ماينسونه لي ..





المهم




انتشر الخبرعند اقاربنا ان ولد اخوي نجح بممتاز بواسطه مني ..



والحقيقه ان هالعالم الجاهله يحسبون ان الواسطه بكل مكان..




وجتني مكالمه غير متوقعه ابداَ ومن شخص غير متوقع..




كان عمي يطلب مني اتوسط لولده يدرس مع ولد اخوي لأنه تقريباً بعمره ونسبته 60%..



انسان جاهل يحسب كل شي بالواسطه ..



الحقيقه كانت فرصتي افشله واقول لا ..



بس ماقدرت ..يمكن على قولتهم الدم يحن ..



ارسلولي اوراق الولد وسجلته ..



بعد المقابله رفضت الجامعه قبوله لأسباب لحد اليوم ماادري عنها ولاابي اعرف ..البيوت اسرار ..



اتوقع ان عنده مشكله عقليه ..الله يشفيه...