عطوني تجاربكم وأفكاركم بالتوفير بكل شي .

السلام عليكم ورحمة الله وبركاته ...
بصراحه طرى عبالي فكرة إننا نستفيد من بعض وهالموضوع للسوالف والأفكار الحلوه وأكيد للفايده أبغ كل وحده تقول لنا طريقتها بالتوفير بكل شي سواء أغراضها الشخصيه أو مقاضي البيت أو لبس عيالها وأنا ببدأ وأكون أولكم
أنا ياحبيباتي بالنسبه لملابس عيالي طبعا عندي 3 أولاد ماشاء الله الله يصلحهم ويرزقني برهم يارب وماعندي بنات فطريقتي بلبسهم أشتري بناطيل جنز أزرق وجنز أسود و4 قمصان لكل واحد منهم هذي ملابس للطلعه والخرجات مثلا سوق مستشفى أي شي و4 بجايم للبيت و4 ملابس داخليه تكفيهم ثلاثه شهور أو أربعه ماشاء الله وبعدها أرجع أشتري يعني مو كل شهر أشتري ملابس واذا صارت مناسبه كبيره أو عيد أو عزيمه أنزل السوق أشتري لكل واحد طقم للحفله وبس والحمد لله أحس اني ارتحت ولبس عيالي حلو ومرتب
ولي أنا أشتري الكلوتات بالدرزن وتجلس معي 3شهور تقريبا والسنتيان نفس الشي وقصان روز 3 وللبيت بجايم قطن 4 وشباصات وبنس وخرابيط واذا فيه مناسبه أنزل أشتري للمناسبه سواء عيد أو زواج أو غيره
طبعا أنا أنزل السوق كل 4 شهور تقريبا فأشتري الي يكفيني 4 شهور قدام عشان أوفر وبنفس الوقت ماأكون حرمت نفسي ولا عيالي من شي ومابالغت اشتريت بالمعقول ومن فتره لفتره أكون جددت وغيرت بلبسي فالتغيير حلو أكيد بس بدون اسراف
وبالنسبه للمطبخ نشتري بالكرتون أول الشهر لأني لاحظت إن الي بالحبه تاكل الميزانيه وأخلي الكرتون يكفي شهر مثلا اشتريت كرتون جبنة مثلثات طيب غصب أخليها تكفي شهر يعني أحاول اني ماأخلص الكرتون قبل شهر والعدس ماأشتري الاكياس الصغيره أبو خمسه ريال الي فيها مايجي كوب لا أشتري خيشه نوعيه كويسه حتى لو غاليه وتجلس معي شهرين والطحين الاسمر خيشه بعد والدقيق الابيض ماأستغني عن الكويتي فأشتريه وأخليه بس للفطاير والبيتزا وأشتري دقيق أبيض خيشه للخبز والمرقوق والبشاميل وووش بعد القشطه أشتري ساده وفراوله كرتون كرتون وأخليها تجلس شهر بعد وكل شي بنفس الطريقه
والتسالي أشتري بطاطسات 3 أكياس كبيره عشان عيالي 3 أنواع مختلفه وكرتونين كيك وكرتون حليب سعوديه وكرتون عصير برتقال وكرتون حليب فراوله هذي أحطها بغرفتي وأنا أطلع لهم منها
ونظامي فطور وغدا وعشى طبخ طبعا ماعدا الفطور أحيانا نواشف بس الفطور مثلا أطلع علبه قشطه فراوله وعلبه ساده وجبنه وأصلح بيض وفول وعدس مثلا وبس ماغيرها يعني مو على كيفهم عيالي كل مابغى أحد فك علبة قشطه يعني أحيانا يصحى مايبغ الغدى فيروح للقشطه بطلت هالنظام والفطور مره وحده يعني باليوم أفتح علبة قشطه وحده والي يفطر يفطر والي يتدلع مافيه
وبعد الفطور أصلح الغدى سواء لحم أو دجاج ومعه سلطه ومره ايدام ومره ملوخيه ومره زبادي أشوف زوجي وش يبغ على الغدى وأسوي
بعد العصر قهوه وتمر لي انا وأبو عيالي أو حلى وشاهي ومكسرات أو فشار وعيالي أعطيهم من التسالي الي مخبيتها لهم كل واحد أعطيه بطاطس وكيكه وعصير وبس
وبالليل العشى خفيف وزبادي لعيالي والحمد لله مرتاحه صارت المقاضي تجلس لاخر الشهر والا زمان معاناه نشتري وتخلص قبل نهاية الشهر ونتورط ليش لأني كنت حاطه المقاضي كلها بالمطبخ وكل واحد يفك على كيفه يعني أحيانا ألاقي علبتين قشطه مفتوحه ومتروكه وخربانه فليش حرام واسراف ومن حطيت نظام أمشي عليه ارتحت الحمد لله
والمنظفات أشتري بالجالون مثل ملمع الزجاج أشتري جالون ويكفي شهر والكلوركس زيه وصابون اليدين برضوه جالون وأعبي
ويابنات فيه ناس لم نقول وفرو قالو بلا بخل يربطون التوفير بالبخل وبصراحه احنا ذوات الدخل المتوسط لازم نوفر والا طفرنا أخر الشهر ولا بقى معنا ريال
انتو وش رايكم أتمنى من الجميع المشاركه سواء كنتي موظفه أو لا نبغ نستفيد من بعض أكيد كل وحده عندها أفكار أحلى من الثانيه المايك لكم حبايبي ........