عقم مجهول الأسباب، هجران الزوج.. حياتي متدمرة

السلام عليكم ورحمة الله وبركاتة


حبيباتي جيت للمنتدى ابي اشتكي حالي لاني احس محتاجة افضفض ومحتاجة نصائح. رب العالمين خلقنا وخلقنا بغريزة الأمومة الي ما نقدر نتحكم فيها .. فبداية زواجي عانيت من تاخر الحمل وما انتظرت على نفسي على طول بديت مع دكاترة النساء والولادة من تحفيز تبويض لفحوصات لتلقيح صناعي لين اطفال انابيب، وكلها بائة بالفشل لين ما الله أراد سبحانه وتعالى اني احمل طبيعي .. ما أخفيكم ان فالفترة الي حملت فيها كانت يمكن الفترة الوحيدة الي زوجي كان يجامعني فيها بشكل طبيعي .. قبل كذا كان كثير مقصر وكان في مشاكل ثانيه ما أحب اتطرق لها..
الحمد لله ربي رزقني بابني واعتقدت ان موضوع العقم انتهى.. بس زوجي من بعد الولادة هجرني ٥ سنين اتطلقنا خلالها مرتين وكل مره يوعدني بان حاله يعتدل وما يعتدل.. هو مدمن أفلام اباحية وأثرت عليه خلته ما يقدر يمارس جماع طبيعي وما تركنا دكتور ما رحناله ولا دواء ما جربناه بس مافي فايده.. والي تبي تقراء اكثر عن تأثير الأفلام الاباحية على العقل عندها الانترنت بكبرة ممكن تبحث فيه علشان تعرف كيف يصير الموضوع مرض وهوس يدمر العلاقة الطبيعيه.... خلال هالخمس سنين جربنا اطفال الانابيب ٣ مرات و الرابعة كانت ترجيع أجنة مجمدة وكلها بدون اي نجاح ولله الحمد... كل الدكاترة اجمعو انه مافي اي سبب لعدم الناجحة ومن اساسه مافي اي مشكله معروفه تسبب العقم وفوق هذا جربنا كل العلاجات الي ممكن تساعد على النجاح مثل تحفيز بطانة الرحم ومنظار للرحم ومحلول الانتراليبد وأبر الهيبارين وحبوب الكورتيزون وفحص الكروموسومات والدي ان اي.. وكل الفحوصات طبيعيه وكل شي سليم.. بس مافي شي فاد معانا.. والدكاترة يقولون لنا جربو طبيعي يمكن تنجح مره ثانيه بس زوجي متحجج ان السبب مني انا وإني انا ما احمل وانه مافي اي امل من انه نجرب طبيعي.. طبعا انا قلبي متقطع على الضنا والعمر يمضي اليوم صار عمري ٣٤ واخاف اوصل لل٤٠.. حياتي صارت مدمره احس مالها اي طعم لان تفكيري ٢٤ ساعه فموضوع الحمل والخلفة وأحس زوجي هو الي حارمني وفنفس الوقت زوجي يتهمني انا ان العله فيني .. دعيت ربي كثير انه يرزقني ويصلح حال زوجي وأملي بالله كبير بس بعد استخرت ربي لو أظل بهالزواجة او اطلب الطلاق.. ولين اليوم احس اني محتارة ... طلبت من زوجي نروح العمرة تحجج انه ماديته ما تسمح قلت له انا بدفع كل شي وما ابي منه فلس قالي مب الحين وقته وان الجو حار جدا واني اول وحده بتأفف من الحر وما بستحمل... وان العمره نروحها ان شاء الله شهر ١١... احس اني ما قادره استحمل انتظر لشهر ١١
ساعات اقول خلاص افضلي فعلا اني اطلب الطلاق بس يا بنات خلونا نكون واقعيين احنا بمجتمع ينظر للمطلقة ان العيب والخلل فيها وهذا انا اشوف امثله كثيره حوالي سواء من العيله او صديقات لبنات تطلقو وبيموتون علشان يتزوجون مره ثانيه وما جاهم نصيب.. ادري انها أرزاق بس الوحدة تعقلها وتتوكل.. وانا بالعمر ما عدت صغيره.. وارجع اتراجع وأقول معليه خليني صابره وأحاول بزوجي... هو بسبب مشاكله ما يقدر يجامعني بشكل طبيعي ولا نقدر نحاول الحمل بشكل طبيعي ويقولي معليه نجرب اطفال انابيب وانا لين الحين صار لي مسويه ٨ محاولات وخلاص تعبت ما ابي أخوض التجربه اكثر واكثر.. يا بنات شورو علي؟؟ ايش اسوي تعبت وابي ضنى وابني يسال دايما ليش ما عنده اخ او اخت، والي يزيد الطين بله ان ولدي محتاج زراعة نخاع ما ممكن اتم الا من شقيق متطابق ... وجربنا كثير بس ما صار... تكفون على الاقل دعوه صادقة!