؟؟؟؟علمت العلم مي فقهت العلم مايده ليت مي ماجابتها الوالده؟؟؟؟

السلام عليسن يالربايع وش لونس ادري لوني افتح من لونسسن بس

هذا حال الدنياا دنياا قشره ايه والله

أيـــــــــــــــــــــــــــــــــــــــــــــــه يا حزم الضامي

المهم ....

في سالفتن تدوور في خاطري وتفحص وتمحص وتقحص بنت

الحلال عيت لا تركد السالفه تقول


مب انا اقوول لا شوفن السالفه تقول

مو بكره تجيني وحيدتن من البناات تقولي انتي يا شقيح قلتي

من اللحين ابري ذمتي واقول ....

تقول السالفه .....

المهم ماعليناا

السالفه تقول

ذاك اليوم وانا جالستن بالحوش (انا شقحه ) وانا اخيط ثوبي الخضر بمكره
حمره لان ماعندي الا هي
وازر زرارهاا الضايع بزرار قميص مشعل اخوي الاسود

وانا بأثنااء خياطتي لثوبي الخضر الا تدخل علي ذيك العجووز على مركازها

وانا افز بشوف من ولا اعرفهاا الا هي جدتي المااصون حفظها الله ورعاهاا
من كل شرر

كان اخذهاا واجلسهاا بجنبي وانا اقصد عليهاا من ذاك القصيد اللي يحبه قلبك
اللي هو ..

بباي رجل البحار عاد بعد طول انتظاار

وجدتي ترد علي هلله هلله وتكمل على القصيده .. عاد معه زيتونه وبلوتو المكار

وانا اردد عليهاا . باباي رجل البحار .. بيب بيب

صارت قلطت محاوره

المهم وانا مع السوالف والضحك والقصيد
قالت لي جويدتي

سالفتن عجبتني بالحيل عاد والله مدري تعجبكم الوكاد انهاا عجبتني

تقول جدتي..
شقحه؟؟؟؟
تعرفين وش قصت المثل علمت العلم مي فقهت العلم مايده ليت مي ماجبتها الوالده

قلت: لالا والله يا جدتي ماعرفهاا قولي لي يا بعد حيي خليني اتفقه يالغلاا

قالت: ايه اسمعي بس بالول صبي لي فنجال للكيف

قلت: ابشري ياجده واقوم على حيلي

واصب لها الفنجال واقول قولي يا جده

وتقول ...

ذاك على ايام البر ايام الشديد والترحال كان في بنيه امهاا متوفيتن
عنهاا وعايشتن
عند ابوهاا وحرمت ابوهاا ولهاا اخت من ابوهاا

قلت: جده ذي سيندرلا

قالت: وشووو .. وتهفني بفنجالها .وترد .... وتقول ...

اقطع رقبة الرجال ولا تقطع سالفته .انا بنت مناحي

قلت: التوبه خلاص اهرجي ماني بمتكلمه ابد

قالت: وترد لهرجتهاا

وتقول ذي المره اللي هي صمهوده ما تحب مايده بنت رجلهاا
وتباهاا تطلع رفله ماتعرف شي تبي نصيبهاا يطيح

وتقول وكبرن البناات وصارن اللحين بسن العرس وكلن من البنات
جاهاا نصيبهاا

صمهوده تباا تنصح بنيتهاا مي من غير لا تسمعهاا مايده < شف نجاست الحريم <
وقالت ماكو الا اهرج بالاشاره كود مي تفهمهاا مع ان مي يقولون بيهيمه

وتقعد تهرج لبنتهاا مي وتنصحهاا ومايده تسمعهاا

صمهوده:

اسمعي يابنتي مي بكره لا عرستي انشالله خمتك وانا امك ارخي مراكيبها ولا تمسينها
عشان الهواا ما يطيرهاا
وزقيقتك وانا امك لا تقطينهاا اجمعيهاا بالصميل
ايه وانا امك وخلي الطيب عطيرك

وقامت تنصح بنتهاا بلغه تخلي مايده ما تفهمهاا هي قصدهاا ان كل اللي قلته
اعكسيه

مي قالت : انشالله يماا
مايده . فهمة وش وقالت مرت ابوهاا

وراحت كلن منهن لبيت رجالهاا

وحال عليهم الحول اي مر عليهن سنه من عرسهن

وقالت صمهوده يالله بروح اشوف البنات وش صار عليهن

وهي تمشي لهم وقالت بنفسهاا بروح ازوور مايده بالول

ويوم انهاا رايحه لمايده الا تشوف الشي
السنع

الخياام مراكيبهاا ممسوسه والصميل مليان بالزبد ( كانت تقصد بالزقيقك .. هو

الزبد اللي يطلع باللبن مال البعير )

والشغل السنع وبيتهاا كله ريحة رشود وهدمتهاا نظيفه والقش ماشالله عليهاا

فرحت صمهوده يوم شافتهاا واستأذنتهاا انهاا تروح لبنتهاا مي

وهي رايحه بطريقهااالا تشوف خيمه بتطير من الهواا
قربت منهاا

الا خيمة بنتهاا مي وقامت صمهوده تصايح ولا الريحه العفنه اللي تجي من
الصميل والخيمه مراكيبها مرخيه

والحاله الكسيفه وبنتهاا ما تسبح مخليه العطر طيبها

ومجمعهاا زقيقه بالصميل اي البعر بنت الحلال فهمت غلط (بهيمه )

عااد امهاا قامت تصايح ... وتقول .. علمت العلم مي فقهت العلم مايده ليت مي ماجابتهاا الوالده

وتنتهي القصه

انا .. وعيوني كلهاا بكااء وصيااح من الفرحه لان كسرة خاطري مايده مع انها جيده

جدتي : شقيح وس فيس وانا امس

انا : وبين بكيي < مدري وش فيني صايرتن مغير اتبكبك وقلبي سخيف >

جده تهي تهي لا عاد تقولين قصص تبكي كذا وامش خشمي بثوبي الخضر

المهم

وتزيد علي البكاا اختنا في الله نوره وتقص علينا قصتن بعد حلوه ما بيهاا بكاا

تقول نوره ..

هذي بعد في بنت امهاا متوفيه وعايشه عند مرة ابوهاا وعندهاا اخوان من
ابوهاا

وعندهاا بنت كبرهاا من خواتهاا

المهم مرت ابوهاا نجسه تبي البنت تطلع رفله وبنتهاا جيده

بنتهاا من صغرهاا وتعلمهاا وتكرفهاا وتطقهاا وتعلمهاا بالعلووم
وبنت زوجهاا

ماتعرف شي ماتعلمهاا حتى كاست الماي تجيبهاا من كثر رفالتهاا

بنات الحلال كبرن وتزوجن وكلن منهاا راحت بيت زوجهاا

البنت المكروفه : تزوجت واحدن لهاا بالجبش لاعن ابو جدفهاا هالذبايح والعشياات
والطق والطقيق ... تكسر الخاطر يا عيشتن قشره

والبنت الرفله: خذت لهاا واحدن اد الدنياا مدلعهاا دلع مب طبيعي
حتى خشمهاا ما تمسحه من كثر ماهي مدلعهاا


انا ... قعدت اللطم قلت مني ورايح بصير رفله ماعرف بالحيااة
شي

عشان اخذن لي واحدن يدلعني ..نيهااهااهااي

اول ماخلصناا السوالف رحت سويت عشاا لناا

عاد قلت: وين اصير رفله دام هذولا اهلي خوفي اصير نفس مصير
البنت المكرووفه :icon33: :icon33:


واتحفوناا بسوالفكم اللي تجي نجااسه فيهاا نيهااهاااااااااااااهاااااي

ودمتم سالمــــــــــــــــــــــــــــــــــــــــــــــــــين

:angry: هذي انا رفله