على السريع الزيوت اللي تطول الشعر واللي تدمر

بنات الله يسعدكم كلنا نحب الزين ونبي شعورنا حلوووه
حتى اللي شعرها حلوو تبي زيادة حلاه
واليوم على السريع والله اني ناصحه لكم ..بس هاه هذي تجاربي وتجارب ألي حولي يعني امي خواتي وكذا
يعني شفت بعيوني ماهو نقل..وترى كل شعر يختلف عن الثاني..
كنت استخدم خلطة زيوت قريتها بجريده
زيت زيتون..خروع..لوز حلو..زيت لوز مر..زيت زيزفون..زيت جرجير..وتخلطين مقادير متساويه منهم كنت أخلط بياله إلا ربع وتطحنين شوية زيزفون وتحطينه مع الزيوت وترجين العلبه وتبدين بالإستخدام
وربي شعري يجنن كثير مره وصحي وطويل استمريت عليها يمكن 12سنه من كنت ادرس بس طول شعري لين اخر الظهر..
بعدها حطيت حلبه مطحونه بزيت عافيه
سبح شعري يعني طال مره عليها تعدى اخر الظهر بشبر وكان كثير حتى الكوافيره والله بالمناسبات تستشورني وتقول تستخدمي حلبه صح اشم ريحتها واذكر كل مارحت للمشغل إذا عندنا زواج الحريم يمسكون خواتي الصغار يقولون وش تستخدم اختك زيت لشعرها ..شعر هنديات بدون مبالغه
قمت قريت بالنت ان المايونيز ينعم مع بعض المقادير
ياحبي للخرابيط حطيتها بس مره وحده ومات شعري
تعرفون وش معنى مات ..ذبل خرب تكسر تساقط شعرته صارت ضعيفه بعد ماكانت الشعره قويه..الحين استحاله اجرب المايونيز مهما شفت مدح عليه
رجعت لزيوتي القديمه وبدت ترجع الحيويه وطال شعري وبدا يصحصح وانخطبت وكان شعري لآخر الظهر وشفت مدح على زيت آرت بالفيتامينات واروح اشريه والمفاجأه ان لونه نفس لون زيوتي اللي اخلطها بالضبط وحتى ريحة الزيزفون اللي اطحنها موجوده فيه ترى الريحه موشينه المهم واستخدمه من اول رمضان إلين نص شهر عشره زواجي..طبعا اللي لاحظته من اول شي النعووومه واللمعه والله إذا غسلت شعري عقب الزيت واستشورته استشوار خفيف شعري ناااعم وفيه لمعه
والمفاجأه بنص شهر عشره شعري متعدي اخر الظهر زياده شبر يعني إذا جلست احطه بحضني وياالله اول ايام زواجي استشوره وافكه والله منهبله عليه بس اذكر الله شكله حلووو وطويل..وطبعا تركت الزيت اول زواجي نادرا احط وبعدين رجعت له والله زوجي موديني عطار البحرين شاري علبتين كبار يقول مابي شعرك يخرب
بعد سبع شهور حملت واهملت شعري ياالله اتسبح مستحيل احط زيت وذبل شعري وصار جاف خاصة انه كان مصبوغ ترى من قبل زواجي اصبغ شعري المهم
قصيت اطرافه كل اللي تحت لأنه تساقط وصار خفيف
بعد الأربعين رجعت استخدم آرت مع ان يدي تحكني احب اخلط وبدت ترجع الحيويه لشعري..طبعا التساقط اللي مر علي بالحمل عادي ماسميه تساقط..أي تساقط مر على شعري ماسميه تساقط يعني كم شعره وخلاص
قمت حطيت ثوم في الزيت
الثوم إذا حطيتيه بالزيت>>>من كثر المدح قمت سويته ودمر شعري تساقط فظيع اقسم بالله أول كنت اسمع بالتساقط وماعرفه وبعد الثوم عرفته معنى التساقط
الحمام يتعبى شعر طووويل الشعره تطيح من الجذور
وملابسي وبيتي كل شي شعر حتى بنتي عمرها شهور ملابسها كلها شعر من شعري مع اني تركته بس مرتين او ثلاث حطيته والله صلعت من قدام
وكلن لاحظ الفراغات وبس اتبكبك عند زوجي من حالتي
وجربت خلطة سعودية عز حقت السدر وماشاءالله وقف التساقط من اول مره ومن اول مره نبت شعر خفيف
ورحت لأهلي اقسم بالله يقولون الحمدلله نبت شعر كانت فيه فراغات براسك
فيه زيت الثوم مكتوب عليه زيت الثوم ومكتوب مصانع الكريشان وعلبته قزاز شفافه وعليه صورة رسمة وجه وشعر يعني ملامح الوجه ماهي مرسومه
هذا طوووول شعور بنات خالتي كلهم وشرته اختي الصغيره وطال شعرها عليه بس انا جتني عقده من شي اسمه ثوووم وإلا والله بنت خالتي كان قصير لين تحت الكتف بشوفي وجلست عليه شهرين مدري ثلاثه إلا شعرها لين اخر الظهر واختي كذلك صاروا البنات في المدرسه يسألونها وش مسويه بشعرها
محلول الثوم من الصيدليه كرتونه احمر والعلبه لونها اسود مثل المويه إذا صبيتيه ماهوزيتي أبد..وحده شعرها يجنن كثيييير مره وطويل وصحي قالت لي عليك بمحلول الثوم حطيه بعد الإستحمام..ومع اني كرهت شي اسمه ثوم بس شريته شجعتني وفعلا ريحته تجنن وإذا صبيتيه كأنه عطر وإذا حطيتيه ماكأنك حاطه شي..توني باديه فيه
اكمل لكم..شفت هنا زيت النارجيل ابوخمس ريال تحطين معه ساق الحمام والماسكه والسابله..رحت لعطار البحرين قلت عطني ساق الحمام وسابله>>>بالتقسيط
قال تبين ساق الحمام وسابله وماسكه
قلت إي...واستغربت عرفها شكل الحريم طالبينها قبلي كثير وعطاني كيس جاهزه عنده بس مطحون الكيس فيها ثلاث اكياس الأشياء اللي طلبتها ومجهز اكياس كثيره
وحطيتها بقدر من كل نوع فنجال إلا ربع وصبيت الزيت عليهم وسخنته شوي وخليته لين برد ورجعته
ويوم احطه ويوم لا..يمكن استخدمته اربع مرات وإذا جففت شعري احط محلول الثوم..وماشاءالله تبارك الله وقف التساقط وصار شعري حلوووو وناعم ومرتاحه على ذا الزيت وناويه ارجع لخلطة سعودية عز حقت السدر 
إذا تذكرت شي برجع اقوله
دعواتكم