السلام عليكم يابنات...
كيفكم اخباركم شنو...؟؟؟؟
وطنى السودان امبارح الحمدلله مشيت حجزت الكوشة للدخلة و العقد من امل رضوان خلاص و حجزت فيديو سلطان للدخلة و العقد لكن مالقيت عندهم بنات بيصوروا للرقيص.
طبعا الكوش بتاعة امل فعلا حلوة و مميزة و هى ذاتها ذوق شديد و حبوبة...
اما ناس فيديو سلطان الا تودى ليهم الزفة بتاعتك سمعونى زفات ماعجبتنى قلت ليهم انا باجيب ليكم السىدى فيهو كل شى.
مشيت لمدام خلود قالوا بتجى الليلة من السفر..حامشى ليها علشان تكمل لى بدلات الرقيص و فستان الزفاف ان شاء الله....
بخصوص العقد لغيت السارى لقيت امبارح فستان لذيذ و ناعم قلت خلاص ابقى عليهو يلا انا اسى محتارة فى المكياج اى زول بيقول لى غادة شرفى بلاش منها مع انو جد انا مقتنعة ليها سو قلت الليلة امشى اشوف انتصار جحا و هند حمدتو لكن هند حافظ دى اول مرة اسمع بيها...بتشتغل وين دى؟؟؟و ادينى رقم تيلفونها او عنوان بيتها على الخاص علشان امشى ليها الليلة ان شاء الله.
اول ماتستلمى بوكيه الورد ورينى طلع كيف مكسب و لو عندك كاميرا صوريه لينا نشوفو...
امل رضوان برضو بتعمل ورود لكن ياستى ممكن برضو اوصى خالتى تجيب لى معاها واحد دهبى .
امبارح شفت صور عروسات عند امل رضوان و دخلت فى بالى شديد فكرة الشباين الاطفال حلوة جد لكن اجيب اطفال من وين ماعندى غير بت خالتى واحدة بس صغيرة الباقيين كلهم كبار.

بخصوص الدهب مع الخليجى بيكون حلو اكيد ان شاء الله...حتتصورى يوم الحنة و لا لأ ؟؟؟

:27: :27: :27:

ياجماعة رنده و هدوية مختفيين كده ليه؟؟جد قلقنا عليهم...ان شاء الله خير..

فليم ازيك

والله غالبا يوم الحنة ما حمشي الاستويو
صور في البيت بس
لكن احتمال كبير اجيب ناس الفيديو

فكرة الفستان للعقد ظريفة
وخصوصا اذا كان بسيط وناعم

انا غايتو ما بانصحك بانتصار لانه مكياجها مكرر
غادة مكياجها حلو في الصور لكن دايما في الطبيعة ما حلو

هند اللي عملت لي مكياجها ناعم .. وهي لسة جديدة
هي مديرة قاعة تاج الملوك في منتزه الرياض
بس نمرتها ماعندي هنا
الا امشي السودان اشوفها ليكي

البوكية حقي طلع ظريف الحمدلله
واشتريت بوكية صغير للشبينة
طبعا انا شبايني
بت وولد بس
اعمارهم حوالي 10 سنين
فكرت يجوا داخلين قدامنا بمسافة عريس وعروسة صغار يعني خخخ

الكوشة و ديكور الصبحية انشالله بقيت على امل رضوان لانها زولة عسل شديد زي ما قلتي

بالنسبة لاكسسوار الرقيص
الحمدلله خلاص انتهيت منه
وامبارح مشيت بروفة اللبسة الاولي
الفستان طلع ظريف

انتي مدام خلود بتعمل ليكي اكسسوار الفساتين ولا لأ
لانه دي والله اصعب حاجة

دايرة ازكرك
ما تنسي تتفقي لزينة العربية
ممكن ناس فرش فلورز
زينتهم حلوة عملوا لي زينة العربية في العقد
طلعت دمها خفيف

وبالنسبة للزفة بقيتي على شنو
انا لسة محتارة
لكن غالبا حاختار حاجة كلاسيك
ما دايرة مصري او خليجي

يلا سلام

صباح الخير يابنات.....
وطنى السودان كيفك حبيبتى....
الحمدلله انو البوكيه طلع كويس....و فكرة شبينة و احدة بس جد لذيذة....ممكن افكر فيها لى بت خالتى...
بخصوص زينة العربية ناس فريش فلورز بيعملوها بورود طبيعية مش؟؟؟انا ممكن امشى ليهم و بالذات مديرة المحل صاحبة ماما حتعمل لى تخفيض حلو ان شا ءالله.
غايتو فساتين الرقيص جننتنى..امبارح خالتى رسلت لى توب جديد و حلو و قلت لازم ارقص بيه برضو ان شاء الله...سو بقيت محتارة الغى ياتو واحد كلهم عاجبينى...

مدام خلود حتعمل لى اكسسورات فستان واحد و ممكن تعمل لى كمان الباقيين انا بس دايرة اشوف الاول ده حيطلع كيف...
الزفة قلت ادخل على اغنية مين اللى جوه فى قلبى بتاعة هشام عباس..و بعديها ال سلو على اغنية عمرو دياب صدقنى خلاص...لكن لسه الفكرة قابلة للتغيير و لا يزال البحث جاريا...
بخصوص شهر العسل حتحجزوا الفنادق من هنا و لا لما تسافروا؟؟؟
انا خطيبى داير يحجز اى شى من الدوحة لكن قلت ليه استنى نسافر و نشوف ما بحب التقييد...و الله يابنات لسه نفسى فى اسبانيا لكن شكلها كده حتكون باردة شهر واحد و اتنين..امبارح مشيت الخطوط لقيت اليوم الدايرهو ماف حجز سو عملت انتظار و حجزت مؤكد فى البعديه...
و برضو مشيت محل للكروت اسمو الرهوانجى جد كروت خطيرة خطيرة....اخترت 15 شكل و قلت امشى مع ماما و بابا تانى نختار الكروت النهائية..عندهم حاجات لذيذة للصبحية كمان و اشكالها حلوة...

الليلة ان شاء الله امشى لصالة تاج الملوك اشوف هند حافظ دى..و انا كمان ما مرتاحة لانتصار جحا ما عارفة لى..مع انو امل رضوان قالت لى انتصار مكسب و حاوصيها عليك..لكن برضو ما مرتاحة.

دايرة اساللك انت اتدخنتى و لا بتعملى خلطات بس...و لو بتعملى اى شى ورينى اختك محتارة ماعارفة تسوى شنو..الخالة المتفقة معاها للخلطات شالت العربون و عملت نايمة..وبينى و بينك طلباتها كتير.....و كل ماتجينى دايرةو دايرة و دايرة...قررت افتح ليها و اشوف واحدة تانية او امشى اتابع مع كوافير.

فليم صباح الخير

حسي ما باعمل الا كريم فيد اوت للاكواع والركب
والصنفرة حقت الليمون والسكر وزيت الزيتون
لكن ناوية اعمل حمام مغربي مرتين تلاتة قبل ما امشي السودان انشالله
وفي السودان اتفقت مع واحدة للدلكة ... لمدة اسبوعين

وريني قابلتي هند حافظ ولا لأ؟؟

بالنسبة لشهر العسل
غالبا حنحجز الهوتيلات قبل ما نسافر للضمان
لكن هناك ممكن نغير راينا
لانه احنا عرسنا مع راس السنة ومعظم الهوتيلات بنكون زحمة

بالنسبة لزينة العربية
انا بانصحك بفرش فلورز ممتازين

فساتين الرقيص فعلا بتحير
اهم حاجة تلبسي التياب العاجباكي شديد
لكن اهم حاجة تكون الالوان مختلفة من بعض شديد
عشان تفرقي كل مرة
على فكرة انتي الوانك شنو؟؟ خخخ