ريحانة و الله دى تانى مرة اكتب ليك فيها رد و يتمسح....زعلت جد من الموقع...ماعلينا ياسكرة اكتب ليك تانى و تالت بس علشان تعرفى انك دلوعتنا و اختنا السغنتوتة السكرة.....شماراتك لذيذة و رجعتينى لاحلى ايام..ايام الثانوى الرائعة...وكويس انو معاك سودانيات كتير انا زى جيلا كان معايا سودانية واحدة بس لكن باقى البنات كانوا حبوبات برضو ياحليلهم جد كلهم ياربى اخبارهم شنو اسى و هم وين....:39: يلا نرجع لموضوعنا البنات السغيلات ماتشتغلى بيهم اصلوا اى مدرسة لازم يكون فيها شلة سغيلة سو بس طنشى و عيشى حياتك و اتفوقى لينا و فرحينا....:27:
ضحكتينى بقصة المدرسات البيقعوا ..كبكبة شديدة مع اول يوم:D ....طبعا اختك كانت مشاغبة كبيرة و مواقف زى دى بتعجبها موت و مابتفوتها بالذات لو المس ماكانت عاجبنى و لكن يلا كبرنا و عقلنا الحمدلله...بليز حبيبتى ورينا شماراتك اول بى اول و تعالى لينا لانو جد بتوحشينا....:26:

رندة ياعسل مليون حبابك بين اخواتك و فى بيتك و ياجماعة والله بفرح كل ماتجينا بنوتة جديدة.....يلا يارب يكون وشنا حلو عليك حبيبتى و الف الف مبروك العرس و نحنا حاضرين لى اى شى ياغالية.....:26:

بخصوص الشيلة....بتختلف حسب حاجات كتير..باديك الخطوط العريضة و بعدين ندخل فى التفاصيل ..اتفقنا...
الشيلة لازم يكون فيها الاتى:
هدوم النوم(قمصان حرير او ستان و بيجامات قطن ناعمة واى شى بيعجبك)
هدوم البيت الخاصة(هدوم تقعدى بيها مع راجلك بس(شورتات اسكيرتات قصيرة بدهيات و بلوزات فيها حركة و فساتين ناعمة)
هدوم البيت العامة(دى البتلبسيها لو جاينك صاحباتك او ناس زيارة و غالبا بتكون الجلابيات السورية او الهندية او الخلجية الفيها شغل بسيط دى او ممكن اسكيرتات و بناطلين حسب ماتحبى)
هدوم الطلعة(زى ماتحبى و حسب استايلك لكن عموما كده البت لبسها قبل العرس بيختلف عن بعد العرس....انا عن نفسى جبت بناطلين مع بلوزات طويلة و اسكيرتات بنوتية مع بلوزات ناعمة)
التياب و هدوم التياب(التياب بتكون حرير طبيعى و توتال و شيفون و برضو حسب ما انت دايرة..انا جبت 7 حرير طبيعى 4 منهم للرقيص و الجرتق حاجات سهرات و التلاتة التانين هاديين يعنى للطلعات و كده و ماجبت توتال )هدوم التياب بتكون اسكيرتات و بلوزات و الموديل زى ماتحبى برضو.
الملابس الداخلية
طقم الحمام(بيكون فيهوالروب او المنشفة البتتلف على الجسم و الشبشب و البندانة بتاعة الشعر و المناشف التانية)
الاكسسورات(حاجات تلبسيها فى البيت وتعملى بيها تغيير زى الخلاخيل و خواتم الرجلين و ماتنسى توك الشعر و السلاسل و العقود ةالحاجات البتطقمى بيها هدوم الطلعة و التياب)
المكياج
الصنادل و الشنط و الجزم و شباشب البيت(حسب الوان الهدوم و التياب)
الاستشوار و مكنة نزع الشعر والرولات و اى شى تانى بيلزمك كعروسة...
يلا لو اتذكرت شى تانى باقول ليك اتفقنا و لو عندك اى سؤال انا موجودة حبيبتى :26:

بخصوص الدلكة دى دلكة البرتقالة العارفاها انو بيجيبوا قشر البرتقال و تخليهو ينشف و تسحنيه و تخلطيه مع الترمس و لب العيش او العجين..والله اعلم غايتو احتمال جلجل يكون عندها فكرة..
يابنات دلونى على حاجة اعملها لى اظافرينى الدخان بهدلها لى بهدلة لونها بقى غريب و خايفاهو مايروح.....
و جد هدوية وين..انا قلقت عليها شديد..ان شاء الله تكون كويسة بس...و يديك الف عافية ياجيلا لانك بتقلقى علينا كده لو طولنا....يلا اقولكم تصبحوا على خير و اشوفكم بكرة ان شاء الله حبيباتى..:26:

حبيباتى شكرا ليكم على المعلومات.... و الله عجبتونى شديد و اتمنى انو التواصل بينا يزيد... و شكرا على الترحيب يا جيلا ( عقبالك يا عسل )و فليم( ربنا يتم ليك على خير) و ما قصرتوا معاى... انا لحد هسع اشترية 3 ثياب حراير و شيفون 2 فيهم شك و واحد من غير شك عشان مرقات العصرية و المرقات الخفيفة و بس لحد هسع بفتش على ثياب حلوه بس ما لقية هنتظر لحد اول رمضان و انزل السوق تانى و ما هشترى تواتل... اتخيلوا غبائى كان رايحة منى فكرة هدوم البيت من اسكيرتات قصيرة و بديهات كنت هشترى جلاليب هندية و مغربية بس .... و تانى مرة شكرا ليكم شديد ....