--وزعي بكل الغرف سلال نفايات صغيره وعودي عيالك يرمو فيها اول باول
--تحت سريرك حطي ثلاث صناديق متوسطه الحجم ومو شرط فخمه اوتتكلفي خليها كرتون عاديه وغلفيها بتجليد حلو الاول حطي فيه ملابس البيبي حقت الاستقبال والكشخه مع الكوافل وغطا الراس الثاني حطي فيه غيارات النونو اليوميه مع كريماته وحفايضه النظيفه ولزوم غياراته من كلونيا ومناديل مطهره ومسحات طبيه وشراريبه وكل مايلزمك لغيار النونو وملابسه عشان ماتقعدي رايحه جايه
الصندوق الثالث هذا ياستي لكي حطي فيه كريماتك المرطبه والفازلين والجلسوليد واللهوم اللي بتاكلينه مع العسل وحطي فيه شراريبك وكم ايشارب حلو عشان ماتتحركي كثير ومرايه صغيره وغلوس شفايف وكحل ولبان وعلبة مناديل وفرشة شعر ومسواك
هذي الصناديق الثلاثه خليها متساوية الحجم عشان الشكل يطلع حلو لو احتجتي منها شي وعندك احد من الضيوف وتجليدها خليه نفس لون اللحاف حق السرير واكيد بيغطيه شرشف السرير لانها بتكون مدسوسه تحت السرير
--الحمامات الله يكرمك خلي زوجك يجيب هندي يغسلها في الاسبوع مرتين
--قسمي من الان اللحمه والدجاج مقطع ونظيف في اكياس واحفظيها في الفريزر وقت النفاس اسلقي في قدر الضغط تصير مرقه يعني بلحم او دجاج ومع العيش البر ياسلام ولا احلى من كذا للنفاس اذا ماعندك احد يطبخ لك والفواكه جنبك قطعي وكلي بالعافيه ولاولادك
--خصصي لك روبين حلوه للاستقبال خاصه بالنفاس واذا راحو الضيوف علقيها بس تتهوى ببتكون نظيفه
--خصصي لكي رف في الدولاب خاص بالارواب اللي بتلبسينها لحياتك العاديه خلال النفاس والمشد خليه بسيط بس يشد بلا اندونوسي بلا حوسه بسطي حياتك
--في الحمام الله يكرمك خصصي لك علبه بلاستيك حلوه فيها مطهراتك الشخصيه من بيتداين ومرهم الجروح وانتهينا لاتحوسين بعد اسبوعين من النفاس حوسي بهالاعشاب والغسولات والبخور زي ماتبغين انا صراحه ماأؤؤمن فيها والحمدلله كل شي تمام
اهم شي الغذا الزين والتدفيه من البرد والمشروبات الدافيه والقشر والحلبه كمغلي في النصف الاول من النفاس
اممممم لي عوده اذا تذكرت شي بس يلا شدي الهمه وقومي جهزي اللي قلتلك عليها وادعيلي ولولدي ولبنتي ولزوجي اذا استفدتي مني ادعيلي وقت الولاده وبعدين بشريني اذا ولدتي ووش صار معك في النفاس لاتنسيني لاني حابه والله افيدك لاني مرتين جاني اكتئاب النفاس وتمنيت احد يكون معي ا(معنويا )ويشد من ازري بس الحمدلله ع كل حال كان معي زوجي الله يخليه لي يفهمني والوالده ماقصرت بس انا كنت حاسه اني محتاجه لاحد يهون علي ويبسط لي حياتي موفقه حبيبتي ولاتنسي ذكر الله الدائم والتفاؤل
ان شاء الله تكون فقست بالسلامة يا ام فجر ... كان الله في عونك الله يجعلة نفاس هين وسريع ويطوي عنك بعده ويسخر لك زوجك وعيالك آمين يارب العالمين .. نصيحتي خذي الامور ببساطه وببساطة جدا جدا الناس الي جايينك اكيد بيقدرون ان بيتك صغير وماعندك خدامة ومابيطولون الزياره ... وعادي النظام الغذائي ترا بس عندنا في منطقة الخليج اما اوربا والدول المتقدمة ينبهووون على الاكل الصحي الي يناسب النفاس وغيرها اهم شي لاتجوعين يالغلا خلي عندك شابورة وخبز بر كل يوم بيومه واشربي حليب الصباح ولاتنسين الاذكار وخليك فاتحة اذاعة القران 24 ساعة ببيتك والذكر داومي عليه في كل وقتك ووصي صديقاتك يزورونك الي تمونين مررررره عليهم لاصرتي اتمونين على اخواتك مثلا فرب اخ لم تلدة امك وخذي لك رقم ووحدة من الحريم الي يطبخون اكلات شعبية واطلبي منها حافظة في محلا وقرصان وغرفيها في بلاستيكات ووفي الفريز حطيهن ووقت الحاجة سخني بالمكرووويف وبالهنا والعافيه ... الله يهون عليك قلوبنا معك امانه طمنينا عنك وعن نفاسك وربي قلوبنا معك >> مجربين النفاس ووحدته وهمه
الصفحة الأخيرة
دورة المياه خبري بنتك اذا احتاست ترطرش عليها شوية مويه وتمسحها
والظيوف بالعاده متى يجوون ؟ العصر عشان كذا خلي زوجك ولا بنتك ترتب لك صينية الكاسات والفناجيل وحطيهم عالطاولة عندك
لان اللي اعرفه ان الظيوف يجو ومعاهم قهوتهم وشايهم والحلا بعد يعني بس يبيلك ترتيب الصينيه ودامها مرتبه خلاص الله لايهنهم هم بيقدمون القهوه لك وللي يجي بعدهم واذا كانت موجوده وحده من خواتك هذاك الوقت اتوقع هي اللي بتصير تظيفهم واذا جت تطلع الحرمه قولي لها ترامسك لاتنسينهم عشان ماتتكركب عليك المواعين بالمطبخ بس اذا جايبه معها تمره نادي بنتك وخليها تشيل التمر بحافظه انت خليها مخصصه للتمر وبس يعني الضيافه ماراح تتعبك ان شاء الله اهم شي لاتكدرين على نفسك
بالنسبه لاكلك انت شوفي ياغناتي
الحين فيه قرصان مجففه جاهزه انت الحين اسلقي لوبيا وصفيها من المويه وشيليها بالفريزر واذا ولدتي خلي زوجك اذا ماعنده مانع بس يسلق الدجاجه ويظيف لها اللوبيا والرز اذا تبينها كبسه وبدون رز اذا تبغينها مرقه
وشوربة العدس والماش اتوقع مايبيلها شي واحسهم مررررره مفيدين وقت النفاس يعني يصلح تسوين كميه كبيره وتحطينها بالفريزر وتسخنين تسخين بس وقت الحاجه
وكمان خلي زوجك يجيب من الخبازين حقين القرصان كم رقاق وكذلك يصير مايبيله غير تقطيع وحطي عليه شوية سمنه وتصير بعد زينه ومفيده
والحليب سهل الصبح املي ترمس كبيره وخليها جنب راسك عشان مو كل شوي تقومين وصبي لك منها والتمره بعد قبل النفاس جهزي لك تمره بسمن ورشاد وحبة سمرا بدون نوى ويصير بعدين بس تشيلين من الحافظه شوي وينسخن بالماكرويف وتاكلينه وتشربين عليه قهوه وبالعاااااااافيه على قلبك
وعساك تولدين بالسلامه يارب وتفرحين فيهم ويرزقك الذريه الصالحه
اهم شي لاتتعبين نفسيتك ترى نفسية النفاس لهادوووووور كبير باأغلب الامور اولها حليبك ينشف اذا تعبت نفسيتك وتأثر على البيبي
وكل شي لما تكبرينه يكبر ولما تصغرينه يصغر
اتمنى اكون افدتك لو بفكره
يلا ننتظر تبشرينا بسلامتك