أنا أحب كثييير هذا القسم و يوميا أدخل و أقرا فيه .. و في بعض المواضيع صراحه تستاهل انك تقرينها مرتين و ثلاث و عشر من كثر ماهي سهله و نتايجها حلوه ..
أنا ما بجيب شي جديد .. بس اني بعطيكم برنامج عنايتي قبل زواجي .. و بعطيكم الأشياء اللي فادتني مره و ان شاء الله تفيدكم انتوا بعد ..
بالنسبه للركب و الأكواع :
صراحه مالقيت حل جذري انه يشيل البقع السودا فيها بس صنفرة الـ ( سكر - ملح خشن - زيت اللوز - ليمون ) نعمتها و فتحتها شوي مو مره .. يمكن لأني ما كنت مستمره معاها مره بس ان شاء الله بعد الولاده برجع استخدمها و استمر عليها
في ناس مدحوا الفازلين مع الكركم بس أنا ما حبيت الكركم صراحه يصبغ ولا يطلع الا بالموت و يبهذل مره :09:
بالنسبه لباقي الجسم ( من الرقبه الى أخمص القدمين ) :
هذي خلطه يوميه استمريت عليها لمدة 7 شهور اللي هي كانت فترة ملكتي .. صراحه كلمة روعه قليل فيها .. أنا أذكر اني خذيتها من المنتدى بس ما أذكر من مين .. و الله يجزا صاحبتها كل خير يارب .. و عشان ما أطول عليكم .. الخلطه هي ( صابونة البابايا أو الصابونه السوداء و أنا أفضل الأخيره - كريم جليسوليد - اسكينول بالبابايا - علبة جلسرين سائل - ليمون )
طريقتها : تجيبين علبة قزاز و تغسلينها و تعقمينها من داخل بالمويه الحاره و تنشفينها كويس .. بعدين تخلطين علبة الجليسوليد و الاسكينول و الجلسرين زييييييين و تحطينهم بالعلبه و تسكرين عليها .. وقت ما تبين تحطين الخلطه تاخذين لك كميه كافيه لجسمك و تحطينها بصحن و تعصرين عليها ليمونه و اللي بشرتها حساسه مره لا تحط ليمون و تتدهنين فيها لين تتشربها البشره و تجلسين مو أقل من ساعتين .. و يفضل انك تنامين فيها بس لأني ما أحب انام و جسمي ملبد صراحه اخليها ساعتين بعدين اغسلها .. و طريقة الغسيل انك ترشين جسمك بمويه دافيه قريبه للحراره و تجيبين ليفة بودي شوي اللي على شكل قفازات و ترغينها بالصابونه و تفركين جسمك بدون عنف و دفاشه .. لأن يا بنات الاحتكاك الزايد هو سبب السواد يعني انتي كذا تزيدين المشكله ما تحلينها .. بعدين تغسلين جسمك و تشطفينه آخر شي بمويه بارده .. و اذا طلعتي ترطبين جسمك بأي مرطب تحبينه و أنا عن نفسي أحب زيت جونسن للأطفال ينعم بشكل خيااااالي :32:
و بسسسسسس .. شفتوا كيف الطريقه سهله ؟ بس يبيلها مداومه و صدقوني اذا شفتوا نتايجها ما بتستغنون عنها بإذن الله ..
الصور ( من قوقل مو من تصويري الخاص :35: ) :
اسكينول البابايا
الجليسوليد
الجلسرين السائل
الصابونة السوداء
و الحين جا دوركم انكم تدعون لي ان ربي يتمم حملي و يسخر لي زوجي :heart: