وأنمسح

أجمل الزهور انا انقهرت وبغيت ماارد:42:

:icon33:


:42: من قالك حمولتها ؟؟
صديقات امى

..

ليتنى اجل مرت اخووك :icon28:

حركات نذاله والظاهر الظاهر انك من اهل حايل :42:

الله يسعد قلبك على الوصفات

وراح اجربهن ان شاء اذا مو فى العزيمه اكيد بمناسبه ثانيه
الله يوفقك يارب ويرزقك ويصلح حمولة حريم اخوانك :42:

________________


شمعه زوجها هنا هلا والله وغلا ==> صراحه اسمى بلشه كود اغيره :42:

والله انك كذا ماشاء الله عليك
الله يسعد قلبك
احس ودى ارد عليك رد لكن يدى تعبت من الكتابه :icon33:
وصراحه توقعت تدخلين اعرفك نشميه وماتقصرين
الله يوفقك يارب ويخليك لكل عين ترجيك يارب
ومابعد فتحت الروابط لانى قمت اتسحر وقفلته وتو فتحته عشان ارد وابطلع
بس بكره ان شاء الله اتفرغ

الله يسعدك يارب

___________

ام عبد الرحمن
الله يغفر لامك يارب ويرحمها ويجعل ثوابه لها يارب
ويسكنها الجنه ويجمعكم بها يارب

وماقصرتى الله يخلي لك عبد الرحمن يارب
يوفقك ويسعدك يارب
وصدقنى الوالده لها دعوه باذن الله فى ظهر الغيب

اللهم اغفر للمسلمين والمسلمات الاحياء منهم والاموات
ويجعل هالتعب والبحث اجره للوالده الله يرحمها يارب
___________

بنت المماليح

والله ماهنا سنع

بعدين انا مااحب اغش احد :42:

والله فاضيه

تصدقين عاد كذا مرة يجونا ناس وامى اللى تقوم وتقهوى وتحوس وانا مرتزة ومكشره بعد :42:

مااحب التسنع والتصنع والصب تصدقين اذا جانا احد اقول من يبى يصب بدالى والا يبى ترمس ثانى

==> عشان ماابحل كل شوى ناطه بفنجال وحده :angry2:
==> مو كن السالفه تغيرت

والله انك ماقصرتى
بس بسالك انا عجزت اهضم اى سلطه فيها مكرونه ماادرى احس المكرونه بتصير بارده
مع ان اختى عندى تقول تجنن ذوقيها تنهبلين عليها

والناس اذواق انا عقده وبعذرى عصلا :angry:

الله يسعد قلبك يارب
الله يوفقك يارب ويحفظك

_____

والله انكم ماقصرتوا كلكم الله يحفظكم يارب

السلام عليكم ورحمة الله وبركاته
هلا والله وغلا بغلا كل عام وانتي بخير والله فقدتكم مع ايام العيد
وانا بكتب لك كم شي من اللي عندي وانتي شوفي ان اعجبك شي منهن
سلطة المكرونه بالصلصه المكسيكيه صحيح قلتي ماتحبين سلطة المكرونه بس هذي طعمها لذيذ مره جربيها واحكمي
نصف كوب مكرونه صغار مسلوقه في ماء وشوي زيت وملح
كوب شرائح ديك رومي مدخن قطعيه شرائح طوليه
نصف كوب ذره
نصف كوب فلفل احمر بارد مقطع صغار
نصف كوب فلفل اخضر بارد مقطع صغار
نصف كوب فلفل اصفر بارد مقطع صغار
نصف كوب فلفل برتقالي بارد مقطع صغار
تخلط جميع المقادير مع بعض ثم تضاف اليها الصلصه اللي هي
ملعقتين كبار مايونيز
ملعقتين خل
ملح وفلفل أسود
ملعقة زيت زيتون
وقدميها وبالعافيه عليكم تراها لذيذه مع انها كلها فلفل

وهذي سلطه ثانيه سلطة الخضار بالطحينه
: سلطة الخضار بالطحينة
المقادير : 1-حبتين باذنجان 2-حبتين بطاطس 3-حبتين طماطم 4-حبتين خيار 5-حبة فلفل أخضر بارد +حبة فلفل أصفر بارد 6-ورقتين ملفوف أبيض 7-نصف كاس ذرة 8-ربع كاس بقدونس
مقادير الصلصه
علبة زبادي + ملعقتين كبار مايونيز + ملعقة كبيرة طحينة+عصير ليمونة +ملعقة صغيرة ملح + فص ثوم
يقطع البطاطس والباذنجان مكعبات ويقلى وتقطع الخضار مكعبات صغيره ويقطع الملفوف الى شرائح وتخلط جميع المقادير ثم تخلط مقادير الصلصه وتضاف الى الخضار وتقدم وبالعافيه

وان شاء الله ابرجع اقولك على الحلى اللي في بالي انتظريني

خذي هذا حلى قهوه لذيذ ويواجه في العزايم حلى الفناجيل
اول شي غلفي الفناجيل بالسوليفان اللي هو غلاف الساندوتشات بعدين اخلطي علية بسكوت شاهي مطحون مع ملعقة كاكاو بودرة مع علبة قشطه حتى تكون عندك عجينه متماسكه ولينه شوي بعدين خذي منها كوره وافرديها في قاع الفنجال ثم الطبقه الثانيه جالكسي فلوتات اللي يجي اصبعين فتتيه وحطي منه شوي في كل فنجال فوق طبقة البسكوت بالقشطه ثم الطبقه الثالثه اخلطي علبة نستله مع 6 حبات جبنة كيري وصبي منها قد ملعقه كبيره على كل فنجال ثم الطبقه الرابعه جيبي بسكوت اوريو الأسود واغمسيه بحليب سايل وحطيه على الفنجال فوق طبقة النستله وغلفي الفناجيل ودخليها في الثلاجه حتى تبرد وتتماسك بعدين عند التقديم قلبي الفناجيل وشيلي الغلاف وزينيها بالهرشي الشوكولاته السايله وحطي كل فنجال في ورقة حلى وقدميه بصراحه شكله خطير مره وممكن تسوينه من قبل يوم العزيمه مايتغير

وعندك البسبوسه المحشيه بعطيك طريقه كل من ذاقها يسال عنها
كاس سميد والأفضل يكون ناعم + نصف كاس سكر + كاس حليب سايل+ ثلاثة ارباع الكاس زيت او اقل شوي + بيضتين + ملعقة بكنج باودر + ذرة فانيليا تخلط جميع المقادير مع بعض وتكون سائله يصب نصف الخليط في صينيه متوسطه ويدخل الفرن حتى يتماسك ثم نقوم بعمل الحشوه في قدر نضع كاس ماء + 5 ملاعق حليب + 3 ملاعق نشا + ملعقتين سكر تخلط وتوضع على النار مع التحريك حتى تثقل ثم يضاف عليها علبة قشطه وترفع عن النار ثم توضع على طبقة البسبوسه ثم نصب فوقها باقي خليط البسبوسه بالملعقه شوي شوي حتى يتغطى الوجه بالكامل وتدخل الفرن حتى تنضج ثم يحمر الوجه وبعد الفرن تسقى بالشيره وتقطع حسب الرغبه مربعات صغيره او مربعات كبيره في صحن مع الشوكه وفي العزايم اكيد الأفضل تقطعينها صغار وتصفينها في ورق الحلى وتقدمينها

وممكن تسوين السينابون العادي او سينابون الصامولي كلها حلوه وتواجه

وهذا حلى عشاء اسمه تشيز كيك بالفيمتو
الطبقه الأولى : شرائح كيك سويس رول بالفراوله
الطبقه الثانيه : في الخلاط ظرف دريم ويب + قشطه + ملعقتين حليب جاف +شوي ماء تقريبا نصف فنجال تخلط وتصب على طبقة الكيك ثم تدخل الثلاجه لتتماسك
الطبقه الثالثه : ظرف جلي فراوله او كرز + بيالة فيمتو مركز + ملعقة نشا +تخلط وتوضع على النار مع التحريك حتى تغلي ثم ترفع عن النار وتترك حتى تبرد قليلا ثم تصب في الصينيه على طبقة الدريم ويب وتدخل الثلاجه

وهذا حلى عشاء ثاني حلى القبه شكله حلو للعزايم
تغلف الصينيه اللي بتسوين فيها الحلى بغلاف الساندوتشات والأفضل صحن السلطه اللي على شكل باديه بحيث اذا قلبتيه يكون شكله مثل القبه
كيك فانيليا +كيك كاكاو تسوينه في البيت او تجيبين الجاهز امريكانا وتقطعينه مكعبات صغيره
ثم في الخلاط علبتين قشطه + ظرفين دريم ويب +ظرفين كريم كرامل +نصف بيالة ماء وتخلط
تسيحين جالكسي في حمام مائي او ممكن تستبدلينه بهرشيز الشوكولاته والهرشي الذ
تحطين في الباديه المغلفه طبقه من الكيك المقطع شوي بس ثم صبي عليه من خلطة الدريم ويب ثم صبي شوي شوكولاته ثم طبقة كيك ثم دريم ويب ثم شوكولاته وهكذا طبقات ولا تدققين مره يعني خلي كل شي حوسه بحيث يتداخل الدريم ويب بالكيك بالشوكولاته حتى تنتهي الكميه بعدين دخليها الفريزر حتى تتماسك ثم يوضع في الصثلاجه حتى وقت التقديم بعدين اقلبيه في صحن التقديم وشيلي الغلاف وزينيه بالهرشي الشوكولاته ولو بغيتي شوي مكسرات وبالعافيه

وممكن تسوين كريمه او جلي او كاسترد او مهلبيه او حلى كاسات او حلى الشتلات اللي يكون في كاسات البلاستك الصغيره وعندك في القهوه ممكن تسوين كرات التمر اللي فوقها نستله وكيري لذيذه وتواجه والسلطه ممكن تسوين الفتوش او الفته وممكن تسوين ورق عنب او كبه يعني مقبلات والله عندي اشياء كثير بس تعبت من الكتابه وان شاء الله يعجبك شي من اللي كتبته والله يعينك