عندى طريقة صعيدى للحلبة جربتها على ابنى وبتنى بحمد **** شربوها

كنت قريت موضوع على النت عن النحافة وقال ان استخدام الحلبة المطحونة ست ملاعق يوميا صغيرين بتسمن وتستخدم على اللبن علشان المرار جربتها ما قدرتش استحمل طعمها فعملتها كالاتى تنقى الحلبة وتغسليها على مصفى بلاستيك ما بستعملش معدن وبعدين تحطيها فى الفرن تنشف المية مع التقليب ممكن تسيبيها فى الفرن لغاية ما تتحمص اوتتطلعيها وكملى فوق على النار او من البداية اعمليها من فوق ما تفرقش المهم تتحمص تبقى بنى كدة بعد ما تبرد تشيليها فى علبة زجاجية جاهزة للاستخدام حتعملى اية تجيبى ربع او نصف ملعقة حسب رغبتك تحطيها فى كوب وتضيفى عليها اللبن الساخن وتحليها حسب رغبتك سكر عسل ولو لبن بودرة حتضيفى الماء الساخن على الحلبة واستنى شوية وبعدين ضيفى اللبن علشان ما يكلكعش اللبن البودرة من السخونة وقلبى واشربى وبالهنا والشفاء على فكرة ماما كانت بتعملى فى الولادة الحلبة تجيبها تشوحها فى السمن البلدى لغاية ما تتحمص الحلبة وهى طبعا بالطريقة دى بتتحمص بسرعة تضيف المية لحد ما تغلى تطفى النار و تحلى بالعسل الاسود طعمها جميل جدا حتحبوها بالرغم انى ما بحبش الحلبة العادية ومش بطيقها وبكدة قيمتها الغذائية اكبر ممتازة للنحافة اكيد وفى الولادة لصحة الام ولادرار اللبن انا جربت الطريقة الاولى على عيالى ما اخدوش بالهم انة فى حلبة فى اللبن مع انهم متعبين فى الاكل مثل غالبية الاطفال يا ريت اكون افدتكم اول مرة ادخل القسم دة ويا ريت لوجربتوا وعجبتكم تردوا عليا على فكرة اعتقد انة مش لازم ست مرات علشان ما تملوش وتتضايقوا ومرتين كويس علشان تستمروا وممكن تستعملوا اليانسون بيقولوا علية عندنينا فى الصعيد مغدى وكنا بندية لاولادنا هما وصغيرين يعنى نوعى علشان ما تمليش انا وزنى 58وممكن ينزل 55 فى الحمل بيكون وزنى فى السيتينات وعمرى 34 للى عندها فضول تعرف صاحبة الموضوع وزنها وسنها كام وتسلموا حبيباتى سلام