عندي عزومه غذاء .. ولكني مبتدئة في الطبخ .. فزعتكم ..؟؟

على فكرة أقصد يوم السبت بتاريخ 13-8 -2005

يعني عندي أسبوع اجهز فيه ..

السلام عليكم ورحمة الله وبركاته

هذي وصفة بس ما ادري في احد حطها قبل كذا او لاء

ممكن تسميها المصقعة الكذابة
سهلة وما تاخذ وقت

المقادير :
* باذنجان * فلفل رومي * طماطم * ليمون * خل * ملح وفلفل اسود حسب الرغبة

صلصة التتبيل:
تحطين في الخلاط
نصف كوب صغير زيت زيتون + ربع كوب ليمون + ثلث كوب خل ابيض + فلفل حار مقطع شرايح صغيرة ملح وفلفل اسود حسب الرغبة
( انا ما حطيت الخل ) وطلعت زينة

الطريقة:

تقشرين الباذنجان ثم تقطعينه شرائح
ثم يقلى بالزيت ( هذى الخطوة ممكن تسوينها قبل بيوم وتحطينها بالثلاجة )

تقطعين الفلفل الرومى شرائح ( دوائر ) وتحطينه في صينية ودخلينه الفرن ( بس يذبل شوي تطلعينه من الفرن )

تقطعين الطماطم شرائح ( دوائر ) وتحطينه في صينية ودخلينه الفرن ( بس يذبل شوي تطلعينه من الفرن ) زي الفلفل الرومي

تجيبن صينية زجاج ( حقت التقديم ) انا استخدم الصينية الكبيرة
وترصين طبقات باذنجان ثم الفلفل الرومى ثم الطماطم شرائح وهكذا حتى تنتهي الكمية

وبعدين تحطين الصلصة اللى خلطيتها بالخلاط

وتحطينها بالفرن حواى خمسة عشر دقيقة او حتى يتسبك زي الايدام

وصحة وعافية

ام خالد1410


مشكورة يا عمري ما قصرتي الصراحه ....

انا دورت لي كم طبخه من المنتدى .....

بس اللحين أبغي منكم أفكار للعزومه ؟؟

شنو أسوي فيها أشلون أستعد لها ؟؟

ولو سويت السلطات والحلا من الليل عادي ما يغرب ؟؟

انا افكر اسوي التبوله وسلطة الفواكه والكنافه من الليل ؟؟؟

تتوقعوا ما يغرب طعمها ؟؟؟؟؟؟؟؟؟؟؟؟؟؟؟؟؟؟؟؟؟؟؟ ساعدوني الله يخليكم محتااااااااسه ؟

الله يعينك يا غلا الروح على الحوسه ..
انا اذا صارت عندي عزيمه اجهز لها قبل 3 ايام على الاقل واكتب كل شي علشان ما انسى

يوم الخميس : كتبي المنيو و المكونات المطلوبه لكل طبق .. واشتري كل شي ناقصك ..
بالاضافه الى المشروبات اللي بتقدمينها .. وجهزي الصحون وادوات المائده
علشان ما تتوهقين في آخر لحظه وانت مشغوله بالطبخ في نفس يوم العزيمه
وحتى صواني الاستكانات وفناجين القهوه ..
ونسيت ورق العنب تلفينه بعد وتحطينه بالثلاجه ..

يوم الجمعه: سوي الحلو + السلطات + صلصه السلطات بس لا تخلطينها طبعا +الخبز
المحمص للسلطه .. بالاضافه الى تجهيز جزء من الاطباق الرئيسيه يعني
مثلا (المكرونه بالبشاميل ) تسوين اللحم المفروم وتخلينه بالثلاجه
تطبخين ورق العنب بالليل . يعني حسب الاطباق اللي بتسوينها لا تخلين كل شي
ليوم العزيمه .
يوم السبت : طبعا من الصبح تدشين المطبخ ولا تنسين تطلعين الايدام من الليل وتخلينه
بالثلاجه علشان يفك الثلج على راحته ...

والله يسهل عليك ويعجبهم طباخك !!!

11صبا11

مشكورة اختي .. ما قصرتي ..
بس اذا على السلطات عندي كم سلطة سهلة راح أسويها ..
الحوسه ألحين في الباقي .. ولا السلطة مقدور عليها ..

الله يعطيك العافية ومشكورة لمرورك الكريم ..