عندي ملاحظه

قبل شوي كنت أتفرج في اليوتيوب عن شخص مسوي عملية تحوير مسار المعدة . كان كل أسبوع ينزل فديو عشان نشوف الفرق . بحط لكم رابط الفديو بس أخلص .


الملاحظه الي عندي .
كل الناس الي مسوين عمليات للتنحيف تتمحور فكرة عمليتهم ان يقل معدل الاكل عندهم كثير . وفي الاسابايع الأولى يكونو عايشين فقط على السوائل . وينزل وزنهم وهم كويسين وبصحه وعافيه .


أجل ليش لمن احد يسوي ريجيم قاسي . الناس تقوم عليه ....لا ما يصير انتبه ترى بيطيح شعرك ترى حالتك الصحية بتدهور .


الي مسوين عمليات لا يتقيدون باي نظام غذائي . يعني محد يقلهم الفطور كذا والغدا كذا والعشا كذا . ولازم سناك بين الوجبات عشان معدل الحرق ما يضعف .... لا لا ابد . كل هذا مافي منه .


جعت اشرب عصير ... وكمان في الفترة الأولى يقلك عصائر شفافه . تخيلو .
وهذا هم ما شاء الله وزنهم ينزل بارقام خياليه . ليه ما ضعف معدل الحرق عندهم عشان ما بياكلو ؟؟


الصراحه بديت احس ان في أشياء احنا مقتنعين فيها علميا .. لكن الصراحه انه مالها أساس صحي .
بدليل كمان ان الرسول عليه الصلاة والسلام والصحابة كانو تمر عليهم الأيام والليالي وهم لا يمتلكون ما يقوتهم ولم يوقد حطب في بيوتهم ليطهون الطعام عليه ... وهذا هم عاشو احسن حياه وفتحو بلدان وجاهدو من اجل نصرة الدين الإسلامي . واحنا مفي غير قاعدين في بيوتنا وناكل ناكل ... وكل يوم نقول بكره بنسوي رجيم . ويجي بكره واحنا اوزانا في تزايد خوفا من ان معدل الحرق عندنا يضعف .


حتى في برنامج مشاري الخراز الي يجي قبل الإفطار . في حلقة من الحلقات راح رحلة في الادغال . وجد امرأه عجوز تسكن في بيت من القش . سالها عن عمرها قالت 95 سنه .
قالها : انتي ايش تاكلي ؟؟ قامت جابت له كيس صغير فيه حبوب . قالت أنا طول عمري عايشه على هذ الطعام . اسلقه بالماء واكل منه مره وحه في اليوم . والكيس الواحد يكفيني يومين . تخيلو !!


وعاشت 95 سنه لا عندها ضغط ولا سكر ولا فكرت في معدل الحرق عندها .


احس في شي غلط ... لازم نعيد طريقة تفكيرنا ... والله العظيم اني ما عرفت السمنه الا من يوم صرت افطر في الصباح . لمن كنت ما افطر .. كانت شهيتي قليله . من يوم صرت افطر والله ان نفسي تنفتح وافضل طول اليوم ابلع .


والدكاتره يقولو أهم وجبه للي يبغى ينحف هي الإفطار . ..... لا تعليق .


هذا رابط الفديو الي حابب يشوفه .
http://www.youtube.com/watch?v=pRIMdR1yIJ8&list=UU5Dj2wNFknU168OpzEAQvAg