عواطف ابلعيهم تتحداكم

صبحكن الله بالخير يا حريم

اليوم عندي لكم لعبه ما عمركن شفتنه
تدرون من وين جبتها

اللعبة جت عن طريق سالفه صارت البارح ونا معزومه عند المصرقعه ( جارتي )
السالفه هي
كنت معزومه عند المصرقعه البارح ويوم قلطتنا المصرقعه على العشا وكان العشا مفطح ( يم يم يم )
قامت هذيك الحرمه وقالت يا حيرم تروني اتحداكم
قلنا على ايش تتحدين
قالت اتحداكم الي تاكل الذنبه ( ذيل الخاروف الي كله شحم ) لها مني جايزة
قلنا وشهي الجايزة
قالت مصتسيه ( مصتسيه= خصر ذهب قيمته 20 الف ريال ) وكانت لابسته ( باعت كم عنز عندها وشرته لا تحسبون زوجها شراه لها غلا بها )
على العموم قامت هذيك الحرمة المقرودة وقالت انا قبلت التحدي

تدرون عاد وش سوت
قامت تلتهم الذنبه والذنبه كلها شحم الله يجيركن
وهي تبلع وتبلع وتبلع من هالشحم لين بغا يطلع من عيونها
بالأخير طاحت علينا ونصفرت ( اغما عليها )
و وديناها يم المشتشفى
بس سلمت والحمد لله

عاد جينا يم ذيك الحرمة الي تحدتنا وقلنا عطيها المصتسيه= ( خصر الذهب الي قيمته 20 الف
قالت طيب هي ما كلته كله قلنا بس انتي السبب الي خلاها تدخل المشتشفى قالت انا ما غصبتها عليه

على العموم طرحناها حنا واكثر من طرحها جارتي المصرقعه الله يخليه والله اناه حرمة قويه
خذت المصتسيه ورحنا يم المشتشفى وعطيناها ذيك الحرمة الي بغت تموت

ونتهت السالفه

اما بالنسبه للتحدي

اتحداكم مو تاكلون شحم لالالالالالالالالا
اتحداكم بس تقرأون هذه العبارة خمس مرات
حطبنا وحطب الخطيب

يالله
والجايزة خاروف هرفي

قبلتن التحدي ولا لا