عينهم في راتبي

مساء الخير ياحوائيات
انا متضايقة وبغيت افضفض
وابي تقولون لي رايكم
انا موظفة من ثمان سنين راتبي الحالي 12 الف
دوامي طويل متعب على الكمبيوتر طول اليوم ومواقع وزيارات
حاليا انا متزوجة وعندي بنت لله الحمد
اول ماتوظفت كان راتبي. 7500
خذت قرض للوالد ب 120 الف وتميت اسدده سبع سنين
خلال هالفترة ماجمعت لي فلس حمر
كنت بنت ماتزوجت وعايشة مع اهلي
وكل مرة هاتي وهاتي
وكل شي على حسابي من طلعات وغيرها اذا اكون موجودة معاهم
وانا ماعرف ارد احد ولا اقول لا
طبعا لاشريت سنوات خدمة اضمن فيها وظيفتي
ولا سيارة جديدة
كنت اعطي امي وقتها 1000
وكان ابوي يبغي اعطيه كل شهر مصروف
ويقول لامي عشان توصل لي الكلام
بالرغم من أنه يقطعون علي القرض
واهوا موظف مسؤول بعمله
كان حتى الشامبو أو الصابون لما يشوفني اخذ من المخزن
يقولي عندج راتب اشتري لج ليش تاخذين؟
و تالي تزوجت ولازال علي القرض
وصرت اساهم مع زوجي وهو مايقصر
انا ادفع حضانة بنتي
واهوا عليه كل اللوازم من اكل وحليب وحفاظ
وبينها طلعات وهدايا
وانا اشتري اغراض التنظيف
وساعات اهوا يجيب
يعني مافي فرق من بينا
طبعا ابوي يوم درى استحمق وكان يلي يكلم زوجي يهاوش
انه ليش موكل شي عل. حسابه
بس انا وقفت في وجوههم وقلت لهم يعني انتو تنهبون من عندي حلال وحلو على قلبكم وزوجي لا؟
رد علي انه فلوسي شرعا كلها لهم الولد ماله لأبيه و مدري شنو
لله الحمد زاد راتبي وصار 12 الف
صرت اعطي امي 1500
وابوي 400
و قرض الجامعة تبع اخوي 1000
وحضانة بنتي 1000
خلال فترةزواجي الخمس قدرت اوفر حول 6000 من راتبي كل شهر
وفتحت لي حساب اجمع فيه كل شهر
ووصل مقدار التجميع حول المئة الف خلال خمس سنين زواج
اتصلت فيني امي تترجاني اساعد اخوي
بيدرس في جامعة خاصة
اضطريت اخذ له قر ض مقداره 120 الف
يقطعون على كل شهر 1000
وباخلصها في 2024
إضافة إلى اني ساعدته بالتسجيل حول 10000 كاش
وطبعا اخوي تخرج وترقى في الشغل عشان صارت شهادته جامعية
وأذكر مرة قلت لامي دام توظف خل يتحول باقي القرض عليه
انا علي التزامات
طبعا كلتني بقشوري
وانتي خلاص مالج اجر دام تمنين واهوا لازال راتبه ضعيف وماخذ قرض زواج
المهم اتصلت امي تبغي سلفة خمسين الف حق حفلة زواجه
انا قلت لا ماقدر على ظهري دراسته وتبون عل. ظهري زواجه مسخت السالفة
طبعا تمت تقطط نغزات علي بين حين وآخر ما فيني خير ومن هالكلام
عموما ماطولها عليكم
امي سوت عملية تكلفتها عشرين الف وعطيتها من عندي
و ابوي تقاعد وعطيته 10000 من عندي
واليوم امي متصلة فيني تبغي خمس الاف وقلت لها ان شاء الله بكرة اعطيج
غير من يمسكون بنتي لو شوي تبيني اعطي خواتي فلوس
وتقطط نغزات
يعني على كل شي يبون فلوس
حتى مرة اخوي وهو موظف وخذ سيارتي الكراج تصليح
تمت تقطط نغزات مفروض اعطيه اكرامية
بنات شرايكم
انا ساعات اتمنى ماعندي اهل استغفر الله
انجان مجمعة فلوسي ومرتاحة
لانه من أرفض طلب احس ينسون كل احساني
ويحترموني بقدر الفلوس الي اعطيها
شالحل