وصفة النهاردة
كبدة اسكندراني
ولكن متبهرة ومتسبكه وطعمها يفتح النفس
وكمان عملت معاها مكرونه بطعم جديد ومميز
نبدأ بالكبدة
المقادير
كيلو كبدة
بصله كبيرة مقطعه مكعبات صغيرة
حبه فلفل اخضر مقطع مكعبات
واللي بيحب الحار يحط فلفل حار
3 حبه طماطم مقطعه
3 فص ثوم مفروم
معلقه كبيرة دبس الرمان بيدي طعم ولون للصوص حلو جداً
مكعب ماجي
ملح + فلفل اسود + كمون + كسبرة ناشفه + رشه من البهارات السبعة
الطريقه
نقطع الكبدة شرايح ونغسلها ونحطها في مصفاه حتي تتخلص من كل الماء الزائد
ودي الخضروات
نيجي بقي للسر اللي يخلي الكبدة مستويه
وفي نفس الوقت طريه ولذيذة
في إناء ع النار نضع شوية زيت ولو حبيتي تضيفي للزيت قطعه صغيرة سمن بتكون احلي
واخليه لما يسخن الزيت وأضيف له الكبدة وأخلي النار عاليه
عشان اعملها صدمه اخلي المسام اللي برة تتقفل
وفي نفس الوقت محتفظه بالعصارة اللي في داخلها
وأول ما لونها يتغير أضيف البصل واحرك عشان عايزة كل الخضروات اللي ها اضيفها تتحمص مع الكبدة
وبعد البصل أضيف الثوم ونحرك
ثم البهارات ونحرك عايزة الكبدة تأخذ طعم البهارات
ثم الفلفل الاخضر ونقلب
ثم الطماطم ومعلقة دبس رمان
والصراحه أنا حطيت شطه مجروشه مش كتيير
ولكن الكبدة لما تكون فيها نسبه حراق بتبقي الذ وأطعم
وخلي بالك اوعي تضيفي ولا نقطة مايه
هي هاتنزل العصارة اللي فيها
وهاتستوي مع بعض
وها يبقي عندك صوص رائع جداً جداً
والصور توضح
هنا لما عملت لها صدمه واتغير لونها
وهنا حطيت الخضروات بالترتيب
وهنا كل المكونات مع بعض نتركها تتسبك وتستوي مع بعض وكل حاجه تأخذ من بعضها ف الطعم
يتبع
رجاءً
رجاءً عدم الرد حتي اكتمال الموضوع
نكون جهزنا المكرونه
مكرونه بصوص الطماطم مع الكريمه
المقادير
مكرونه مسلوقه اي نوع أنا استخدمت القواقع
بصله مفرومه ناعم
حبة فلفل رومي مقطع
عصير طماطم
معجون طماطم
علبة قشطه او كوب كريمة خفق
1/2 كوب جبن موتزاريلا
ملح وبهارات
ومكعب ماجي
الطريقه
في إناء علي النار نشوح البصل مع شوية زيت ولما يذبل نضيف الفلفل الاخضر
وكمان نشوحه شويه عشان ياخد طعم ومش يكون طعمه كأنه مسلوق
ثم نضيف الطماطم ومعجون الطماطم والبهارات
ولما الطماطم تتسبك نضيف القشطة او كريمة الخفق
ونقلب سوف تلاحظي ان لونه اصبح برتقالي وجميل
ثم نضيف الجبن
ثم نضيف المكرونه المسلوقه
ونتركها علي النار خمس دقائق تأخذ وتتشرب طعم الصوص الجميل
ملحوظه مهمه يابنات
النوع دا من المكرونه من الافضل انك تاكليها ساخنه
يعني أنا بجهز الصوص
وبسلق المكرونه
وساعة تقديم الأكل بحط الكريمه والجبنه واقلبهم مع بعض ثم أضيف المكرونه
وعلي طول ع السفرة بتكون الذ وأطعم
ودي النتيجة النهائيه
بجد لذيذة جربوها مش هاتخسروا حاجه
نيجي للكبدة اللي استوت وطعمها وريحتها خياااال
ومفيش لها ريحة زفارة ودبس الرمان خلي الصوص لذيذ
وقدمت معاه خبز عملته في البيت خبز بالدقيق البر
والصراحه طري وأحسن من المخابز
ان شاالله انزله في موضوع
أنا بعمله واحتفظ بيه ف الفريزر لحين الاستخدام
وقدمت الكبدة مع الخبز
والمكرونه للي يحب
يتبع
رجاء عدم الرد