السلام عليكم ورحمة الله وبركاته
في صباح يوم الاثنين الرابع من ابريل نيسان باترول 2006 مراتب جلد
وبعد ليله حافله في استراحه في حي خنشليله النموذجي وعامره بالمعسل
والتتن وكذلك والعياذ بالله بالمنكر اللي يسمونه الوطني ومليئه بالتنقل بين القنوات الفضائيه ,
استيقض فالح على صوت ..ينادي ويقول:
يا فالح اصحى يا ابني دي الساعه بئت 7 الصوبح
ونهض فالح واخذ يفرك عيونه من ما شابها من الغمص
فوجد المرأه التي ايقضته وجهها وجه أمه والصوت صوت كريمه مختار
قال يمّه وشفيتس؟
قالت:
ايه يعني وش فيس؟
يا الله اصحى أوام وكل معانا الفطار وروح لللجامعه
قال : هااه ..وش فطاره .. شوش أوامه
ويطمر من سريره ويروح للحمام وهو يقول:
وش قصة امي تميلح على ذا الصبح
بعد ما بربس في الحمّام وقضى فيه حاجته( وين بيقضيها فيه في المستودع مثلا؟)
رجع لغرفته
ولبس وهو يطلع من الغرفه لقى ابوه وامه واخوه الصغير
على سفرة الطعام لا وابوه طاق البدله والكرفته
قال وجع وش ذا المسلسل؟
وش جاب ذا الطاوله في بيتنا؟؟؟
بالعاده كل اخواني ياخذون فسحتهم من الشغاله
وكلها جبن واللي تحبه الشغاله منهم تدفه ببيض عيون
وانا افطر في الكليّه وابوي يفوّل في فوال الافراح
شوي وينْزرَه ابوه.. وفي لهجة مدري منهم يهوشه ويقول:
شووووو العمى انتا رايح للجامعه بدون أكل؟؟
ارتاع فالح وقعد يكبّس بعيونه
الوجه وجه ابوه واللبس لبس عباس النوري
والصوت صوت سلّوم حداد
قال :
الله يقطع بليس اهلي وش طاعونهم اليوم ؟!!
قعد يفطر معهم وهو مضيّع وطايرتن بوهته ..
يوم شاف فطورهم فول وحمّص وحليب وخبز منفوخ
قعد يتحنطم في نفسه ويقول:
وش ذا الحاله ... وش جابني مع ذا الدوافير !!!
وشوي وتجي اخته شيخه اللي في ثالث ثانوي لابسه تنوره قصيره
وتبوس امها وتقول
صباح الخير يا ست الكل
وتبوس ابوها وتقول
صباح الخير يا بابا
وتسلم على فالح وتقول:
ازياك يا أبيه؟
ويكرها فالح ضحكه ويقول: اما عاد أبيه ما عاد الا هي
قالت له:
ما تنساش تاخدني توديني للناتشي (للنادي بس بالمصري) في سكتك
وانتا راجع من الجامعه علشان انا وصوحابي وصاحباتي حنتغدى هناك
قال : اقول لا يكثر و على تبن لاتمردغ في بطنتس
قالت له : انتا بتبرطم بتئول إيه؟
شوي ويدق جرس البيت ويقلط عليهم ولد اطخم جسم وشعر واناقه
ويسلم عليهم هاي صباح الخير عمي , صباح الخير عمتي
ويقول:
فينها حصه ؟ هيّا مو طلبت مني آخدها معايا للجامعه ؟
ويناظره فالح ويشوف وجهه والى هو وجه اللبناني الحلاق اللي جنب بيتهم
شوي وتجي اخته الكبيره حصه اللي في آخر سنه جامعه
نازله مع الدرج تربق تربق تربق <<<(ايه باقي العائله نازلين سلقاطي من الدور الثاني)
وتهفهف بشعرها ..ولابسه بنطلون.. لا ما لبسته الا داخله فيه غصب من الضوق
والتي شيرت اللي مقاس 7 سنوات
والبطن والسر البلدي النجدي العجيب مكشوفه للعالم.. اللهم يا كافي
وتروح لامها وتبوسها وتقول:
صباح الخير ماما كييييييفك؟
و ابوها وتبوسه صباح الخير بابا كيييييفاك؟
وتناظر فالح وتشر له بيدها هاي فالح كيييييفاك ان شالله منيييح؟
وتروح وتسلم على ذا الولد الاطخم وتقول له:
بلييز حبيب ألبي فادي انتظرني كمان خمس دقايق
واخَّسْ ما تشوف فالح وابوه
فالح ولّع واشتعلت نار الغيره في قلبه
(صح داشر بس يغار على محارمه)
وتوه بيقوم يتمردغها ويتمردغ الولد
لكن يوم شاف ابوه ذا الشامي ساكت وسمع صوت اخته العجرمي
هوّن وقال في نفسه :
لا بركد شوي لا اكون البارح مع ذا الترفيعه
غلطت في ذا الاهل , والا مخفوسن بي تحت الارض في مسلسل رمضاني بطولة سكن
بسم الله علي الرحمن الرحيم ,والا كاميرا خفيه ..بصبر وبشوف وش الدبره
وقعد يلوم نفسه ويقول:
الله يلعن اصله ذاالوطني لعب في مخي
حيوان ان شربته مرتن ثانيه ..قسم بالله ما عاد يطب بطني
شوي ويجي اخوه اللي في اولى ثانوي
شعره كن طاب فيه قطو من كثر ماهو حايسه بالجّل
وبنطلون ضيق وقميص ما شبك منه الا زر واحد وسلسال وخواتم
طالّعه فالح وقال:
وجع وشفيه اخوي صار جنس ثالث..؟؟
ما اقوم اتوطاه ذا الخكري
قعد يفكر يهوجس ويقول:
وش ذا الحتسي .. وشلون بعيش مع ذا الاهل الخمام
وش ذا الخوات ووش ذا الاخو ووش ذا الابو الدلخ الرخمه
والله لوالا امي وابوي معنا
كان قلت انا ممرح في البيت حق ستار اكاديمي
المهم قام فالح ينتفض فيه كل شي خوف على غيره ععلى ارتبااك
ومن ذا الام والاخت المصاريه والابو السوري والاخت والاخو اللبنانيين
ومن الغيره والقهرمن ذا الدافور اللي بيطلّع اخته عينك عينك
وابوه ذا الدجاجه الصقعا ساكتنن لها
وكل ذا يصير وهو الوحيد اللي قاعد على الطاوله بينهم بثوبه وشماغه
كنه سعودي جاي بدري لمرقص لبناني..
وفجأه دق جوال فالح ويرد وهو مرتاع:
الوووو
ويسمع ذاك الصوت الحنان الناعم الرومانسي لبنت تقول:
صباح الخير فالح حبيبي تعالا بسرعه البابا والماما راحوا للشغل وانا كزبت
عليهون وقلت انا تعبانه ..علشان بدي شوفك اليَوم
قال : طيب جاي جاي جاي ..
ومن الخقّه يطمر ويقرشع بسفرتهم ويطيح خبزهم وفولهم وحمصهم
واكوب الحليب تكسمرت وطشّم الحليب في جبهة ابوه وامه تلعوط الحمّص في خشتها
ويروح يركض ويشغل سيارته يبي يقابل ذا البنت..
وهو اصلا ما يدري من هي ولا وين ساكنه
ويرجع للمكالمات المستلمه ويدق عليها ويقول:
من انتي ووين بيتكم؟
قالت يا عيب الشوم يا فالح نسيتني بسرعه واحنا كنا تو قيذر من ثري ديز؟
وبعدين انا طلبتك عالموبايل كم مره امبارح علشان اشوفك وانتا رفضت؟
قال فالح : اما عاااااد ..انا أعيي؟ ما يخسى الا انا
قالت له:
المهم انا ساكنه في الأشرفيه عماره رقم 40 شقه رقم14
قال فالح : وجع... وش جاب الاشرفيه في السويدي؟
قالت اسأل اي تاكسي وهو يدلك
المهم سال عن العنوان وراح لها ويوم دخل
وتلاقيه هذيك البنت الأكه هذيك البنت الجرح
اللي كلشن فيها يلقّ .. تشوف المويه تمشي مع رقبتها من الصفاء والنعومه
ولابستن ذاك اللبس اللي ما ينحتسى به..
وتفتح يديها تبي تخمّه (وفي لهجة من تالي تحضنه)
وفجـــأه
سمع صوت قوي يقول:
يا كلب يا ابن الكلب , يا حيوان , يا الداشر ,
قم يا السمرمدي يا ابو البراطم قم لا اقظ كشرتك
ساعتين اقومك جعلك ما تقوم منه تروح لشغلك
وانت تخمخم في ذا المخده وتخنبق يا تزليل الحيا
كله من ذا الخياس اللي تلطّه في ذا الاستراحات
وقام فالح على صوت ابوه وهو فوق راسه
وما بقى سبّه ولا عياره في قاموس نجد وملحقاتها ما قالها فيه
تلخبطت مشاعر فالح بين الفرح والحسوفه
فرحان ان اهله ما طلعوا دوافير
وان اخته ما طلّعها الحلاق اللبناني
وان اخته الصغيره مهيب راعية نواتشي وصوحاب
وان اخوه مهوب جنس ثالث
وان ابوه مهوب ابو شكيم
وان اخته الصغيره مهيب راعية نواتشي وصوحاب
ولكن طقّته الحسوفه انه ما كمل خنبقته مع اللبنانيه الطخما
من ايميلي
شقآوه @shkaoh_4
محررة
يلزم عليك تسجيل الدخول أولًا لكتابة تعليق.
الصفحة الأخيرة
يسلمووو من جد ضحك لين مت هههههههههههههههههههه