من ناحية الاهتمام و العنايه بالشكل
كثير بنات يقولون ما بنقص شعرنا او نصبغ او نسوي مساج
او او او الا لين ضعفنا عشان النيولوك مره وحده
و بالنهايه تحطمتي لانك ما ضعفتي و زدتي هم و ينعكس هالشي على
مظهرك الخارجي
العنايه والاهتمام ماهم مكافأه لانك نزلتي وزن
هذي واجب عليك تجاه نفسك وش ماكان وزنك
لانك انثى و لانك تحبين نفسك و لانك تستاهلين
لا تسمعين كلام احد
اسمعي كلام قلبك و سوي اللي تشتهينه بنفسك
هذا بيعطيك دفعه معنويه اكبر انك تستمرين بمشوارك للرشاقه
كافئي نفسك لانجازاتك الصغيره بشي يخليك تهتمين بنفسك اكثر
بودي شوب - عطر - مكياج - صبغة شعر - بديكير بالصالون
اذا شفتي الفرق اللي يسويه التغيير بشكلك بتتحمسين
عشان تضعفين زود وتصيرين احلى من الحين
اذا صبغتي شعرك ما تتحسن نفسيتك ؟
اذا سويتي تقشير بشره او حمام مغربي ماتحسين انك
تحبين نفسك ؟
هالشعور حق للجميع ماهو حصر على الضعيفات والمثاليات
قصي شعرك واصبغيه .. مو كافيك نفسيتك بسبب الدايت
ليش بعد تزيدين على نفسك بانك كارهه شعرك و شكلك ككل
يا سلام لون شعري يجنن ما شاء الله
يا ترى كيف بيكون لو كنت انحف ب 15 كيلو
و بدل ما توصلين الوزن المثالي و بعدها تبدين تتعدلين
من بقع غامقه لتقصف شعر لسليولايت لبشره باهته
بتوصلين وانتي احلى ما يكون
بدل ما تضيعين الوقت سنه لين ينزل وزنك
و على الاقل 6 شهور لين تحلين مشاكلك الثانيه
استغلي هالوقت اللي تنزلين فيه واهتمي بنفسك
خذي فيتامينات اذا تحتاجين .. حافظي على جفاف مناطق الاحتكاك
مثل بين الفخوذ جافه دائما باستعمال بودرة الاطفال
اشربي لترين ثلاثه ماي اغسلي هالسموم اللي تغلق البشره
عالجي الهالات و الرؤوس السودا
خذي لك نقعه بالبانيو مع زيت استرخاء
او استقطعي ربع ساعه من يومك تسترخين فيها لحالك
بدل ما تنشغلين بالاكل والتفكير بالاكل و تخبيص الدايت
اشغلي نفسك بالاهتمام بنفسك
بالذات لمن تضعفين وتحسين بتخربين الدايت خلاص
عشان اول ماتوصلين الوزن المثالي الا خلاص انتي جاهزه
بعض البنات يصيبهن احباط ويخربون كل شي
بالذات باول طله لها بعد الوزن الجديد
وتسمع لها هالتعليق
يوووه ياحليلك ضعفتي و جسمك يجنن
بس بشرتك و شعرك باهتين
هذا ضريبة الدايت يوم كنتي مليانه كانت بشرتك رويانه
و منوره و مورده و شعرك يلمع ويجنن الخ الخ الخ
و تبدا رحلتها مع قسم الجمال والعنايه بالبشره
بعد ما كانت مع قسم السمنه
ويبدا مشوار ثاني طويل
وهالمشوار ماهو خالي من الصعوبات والمشاكل والانتكاسات
و تجيها ردة فعل عكسيه وترجع تحط حرتها بالاكل
و ما تنتبه الا و هي رجعت لوزنها الاول بدون ماتحس
و بينحفر براسها ان الجمال مايجيها الا وهي دبدوبه ف ليش تضعف
الله خلقنا جميلات بس لازم نحافظ على هالجمال باستمرار
لازم نحتفل بجمالنا بكل مرحله من حياتنا
خصوصا اثناء مشوارنا للرشاقه
بتكوني خلاص تعودتي على الاهتمام
واليوم اللي بتوصلين فيه للوزن المثالي
باذن الله مابيكون وراه انتكاسه
لانك شفتي شكلك المثالي اللي تحلمين فيه مره وحده
عايشتي التغير بكل حب و ثقه
تعلمتي الجرأه في اختيار اللوك المناسب لك
طبعا بعيد عما يغضب الله
وبعدها تبدين مرحلة المحافظه على الوزن الجديد
عشان لا يخرب اللوك الجديد
******
قبل حوالي سنه كنت ابي اسوي كيراتين
و امي رفضت تقول لين تضعفين :icon36:
مرت سنه لا انا اللي ضعفت و زادت مشاكل شعري
من خفه لتساقط لتقصف لبهتان
صرت دبه و شعري شين
قبل عيد الفطر بكم يوم وافق لي البابا اسوي الكيراتين
من ورا امي. :tongue:
كانت نفسيتي مندمره بسبب شعري
بعد ما سويته قلت ليتني مسويته من زمان
مافيه تقصف و يلمع ويهفهف
حتى امي عجبها وقالت ليتني سويته من اول :wink2:
بالعيد فكرت وانا امشط شعري
ماشاء الله شعري حلو
افتكيت من همه
لازم الحين اضعف عشان يكتمل اللوك و اصير احلى و احلى
و بديت مشواري مع الدايت قبل شهر تقريبا
كل ما نزلت كيلو احس جمالي يزيد ماشاء الله
ثقتي بشكلي تزيد ولله الحمد
و زاد حماسي اني اهتم باشياء ثانيه ماكنت حاطتها ببالي لين اضعف
بديت اهتم بنظارة بشرتي
عالجت الهالات السودا بالاكثار من شرب الماي
و دعكها بقوه بشرايح الخيار
احط فازلين وقت النوم و امسحه الصبح
استعمل ماسك الجل البارد
متوفر ببودي شوب و سعره معقول
احطه بالثلاجه واستعمله اول ماقوم من النوم
يعطي شد لمحيط العين و نظاره و يخفف الانتفاخ
يصير شكلك نشيطه و حيويه حتى لو ما نمتي كفايه
و تركت الكافيين تقريبا تماما
ماكنت اتوقع ان كمية الكافيين البسيطه اللي احصلها من الشاي
لها هالتاثير على لوني
كلنا نعرف ان الكافيين يمنع امتصاص الحديد
و قلة وصول الدم المشبع بالحديد لمناطق الجسم الهشه
واللي مافيها غدد دهنيه من نفسها يسبب غمقان لونها
مثل محيط العين و الركب و الاكواع
مو احيانا تلاحظون البنت اذا جاتها الدوره يشحب
فيسها و تقولين يبان عليها التعب و يصير لونها اغمق شوي
هذا بسبب فقدان الحديد
و ليش الوحده لمن تحمل وتاخذ حبوب الحديد تنتعش بشرتها
و تصير منوره ومشرقه ومافيها بهتان
هذا السبب والحل بيدنا
نقطع الكافيين وما بنحتاج لاي ادويه باذن الله
و مع شرب كاسين ماي على الريق مع اضافة ماي الورد
اقدر اقول اني تخلصت من 60 ٪ من الهالات
ركبي واكواعي ماكانوا غامقين حيل بس الحين تساووا مع بشرتي
و لون فيسي و رقبتي و يدي اللي كانوا غامقين بسبب شمس
الدوام فتح لونهم عن اول 50 ٪ على الاقل
مع العلم اني ما استعمل اي كريمات لفيسي
ماعدا الغسول مره بالاسبوع و ابخه بماي الورد اذا تذكرت
و حصدت النتيجه امس
كانت عندنا عزيمه
ووحده لها 4 سنوات ما شافتني
قالت اني ناحفه عن اول كثير
و فكرت بيني و بين نفسي
انا هالمره امتن من قبل 4 سنوات
وقتها كان وزني 83 والحين 89
لكن وش الفرق اللي خلاها تقول كذا
هذيك الفتره انا ماكنت اتمرن
كنت مترهله وكرشتي طبقات و فخوذي مايعه
امشي منحنيه و لابسه غامق
هالمره انا غير لاني اشد بالرياضه
امشي يوميا واسوي اوربتراك و تمارين ال 5 ميا
كرشتي ماعادت طبقات بس لسه ما اختفت تماما
فخوذي بدت تنرسم
صارت حركتي خفيفه وظهري مستقيم
و لبست بعد لون فرايحي
صحيح وحده بس علقت اني نحفت يمكن لانها تمون شوي
لكن الكل اثنى على لمعة و صحة شعري
اثنوا على نقاوة بشرتي و رزة مشيتي بعد ما كنت منحنيه
و كذا وحده علقت على الهالات اللي كانوا يشوفونها فيني
وكلهم اجمعوا اني صرت ابين صغيره وخفيفه بالحركه
وان كان وجهي سمح و اعطيت جو غير للمكان عن عادتي كل سنه
لاني بالعاده استحي وما اتكلم واحاول اتوارى عن الانظار
و اسوي شغلي من تحت لتحت
بس امس كنت استقبل و اسلم و اتحرك وسطهم بكل ثقه
اسولف مع ذي و مع ذي
و اليوم قمت الصبح و عزيمتي اقوى اني استمر اكثر
لاني ادري النتيجه النهائيه
انا بكون اسعد انسانه فيها :love:
******
فضفضه من دبدوبه لاخواتها الدبدوبات
و مكانها هنا مو بقسم الجمال
لان محد بيفهمنا ويلامس قلبنا الا اللي مثلنا
هذا الموضوع عباره عن دمج ل ردين مختلفين لي في
ملف تجمعنا بس حبيت احطهم
بموضوع وارتبهم عشان اللي مايدخلون
تجمعنا برضو يستفيدون منه
اما نعاقب نفسنا ونحرمها ونخليها مكافأه الين ننحف راح نتدمر نفسيااا
موضوعك حلو وحاسه فيكي