فنجان شاي وفضفضة ....."" للآنسات فقط ""

انا متزوجه بس دخلت غلط:23:

يله مع السلامه :21:

lمعليش نسيت ودخلت.راح عن بالى انى متزوجه من 15 سنه:23:
لكن يوم انى دخلت بقول لك وش اكبر همومهن اللى هو .............ان الله يرزقهن بالزوج الصالح اللى يخاف الله فيهن ويخشاه :arb:

بسم الله الرحمن الرحيم
السلام عليكم ورحمة الله وبركاته:
في البداية اشكر المشرفة شام هذه البادرة الطيبة وكلامك حلو وطيب وعلى العين والراس
ولكن عندي تعليق بسيط بعد اذنك
(ولكن يسعدني أن أخبركن أن الأيام قبل الزواج لن تعرف قيمتها ولن تحس بسعادتها ولن تسعد بذكرياتها إلا من تزوجت وحنت لتلك الأيام ....

اسمحي لي بعذ اذنك ان اقول(وطبعا اختلاف الراي لا يفسد للود قضية)

(ربما يكون هذا الكلام للبعض وليس للكل على العكس من منا تريد ان تذكر او تعيش ايام تنغصها عليها كلمة عانس وهي لم تتعد الثانية والعشرين من العمر وبدات تسمع الكلمات الجارحة حتى من اقرب الناس اليها اخوانها واخواتها واغلب اقاربها (انا من كم يوم بس جرحتني قريبة لي امام جمع من الاقارب) ومن منا تريد ان تتذكر نظرات الناس المؤلمة مع العلم ان البنت لاذنب لها بذلك وكل شيء بيد الله عز وجل ومن منا تريد ان تتذكر الايام التي ترى فيها اطفال صديقاتها وقريباتها الاتي يصغرنها بسنوات وهي محرومة من لذة الاحساس بالامومة ومن منا تريد ان تتذكر الايام او اللحظات التي .... والتي .. والتي....الخ)
اعذريني على هذا الكلام ولكن احس بان الكيل طفح و ان الحياة في هذا المجتمع اصبحت لا تطاق ما ذنبي انا كي اعامل بما لا استحق ..ما ذنبي ان الله اراد لي ذلك.. ما ذنبي ان المجتمع وضع مقاييس ومعايير لايتقبلها العقل لاختيار الزوجة هل ذنبي اني جعلت الحياء ردائي ولم استخدم اساليب او طرق توصلني لما اريد وفي الوقت الذي اريد؟
هل ذنبي اني خفت من الله تعالى وجعلت اسمه بين ناظري قبل ان اخطو اي خطوة او انوي القيام باي عمل؟
وهل ذنبي اني التزمت بالحجاب وجعلت العفاف ستاري ولم ابرز ما يلفت الي الانظار؟؟؟
ان كان ذلك هو ذنبي فانا لا اقول الا لاحول ولا قوة الا بالله وحسبنا الله ونعم الوكيل
وفي النهاية اعتذر ان كنت قد انفعلت زيادة عن اللزوم ولكن.....
تحياتي

السلام عليكم ورحمة الله وبركاته:
تحياتي للاخوات
اختmisa22 كلامك صحيح 100% اكيد من السعودية صح؟؟؟

وشكرا

عليكم السلام اختh20اي انا من السعودية وشكرا
تتمة الموضوع وان شاء الله تكون آخر مشاركة
بما ان الموضوع اسمه فضفضة فانا نفسي افضفض عن شيء من زمااااااااااااااااااااااااان
النقطة الاولى
واتمنى من الاخوات يقراونها بسعة صدر
في حركة اتوقع انها تغيظ معظم الاخوات مثلما تغيظني تجي عضوة وتكتب موضوع وتحط له عنوان(للمتزوجات فقط او المتزوجة بس تدخل وما اشوف بنت داخلة وغيرها من هذي العناوين) طيب انا عندي سؤال لهذي الاخت اللي تكتب مثل هذي العناوين
وانتي تكتبين مثل هذا العنوان ما تجيك فطنة ان العنوان يجذب اكثر من انه يردع البنت انها تقرا العنوان ولو ارادت البنت او الشاب ان يقرا مثل هذي المواضيع فبضغة زر واحدة يدخل عالم متسع وغني بهذ الاشياء وماراح يلجا الى منتدى (محترم وتحت رقابة مشرفات ومراقبات(والنعم فيهم) يخافون ربهم وكل عضو وعضوة فيه محاسبين على كل حرف وكل كلمة وكل صورة حتى يقرا مثل هذي المواضيع) يعني مثل هذي العناوين مالها داعي يعني لازم تذكرونا بهذا الشيء في كل دقيقة وكل ثانية انا عن نفسي مع اني مشغولة الحين بدراستي الا اني صرت اسمع عن هذا الموضوع في كل مكان في مكان الدراسة في مكان العمل في اماكن تجمعات الاقارب كل الكلام اللي سمعته اليوم اسمعه بكرة ما فيه غير مواضيع الزواج والحمل والولادة وغيرها يعني كل ما احاول انسى والهي نفسي بشيء او مكان لازم يجي احد يذكرني والله لدرجة اني صرت اكره الخروج من البيت واجي ابغى اوسع صدري وارتاح وانسى همومي على النت الاقي مثل هذي المواضيع والعناوين مو بس تقهر الا ترفع الضغط والسكر يعني ما اتوقع ان الوحدة تقدر تحط كلام ما ينقال .. بالعربي الفصيح كل اللي بينقال معروف وواضح والله اعرف بنات مو متزوجات يعرفون اشياء سواء علمية او غير علمية اكثر من المتزوجات والزبدةكتبتي مثل هذا العنوان او ما كتبتي انتي ما راح تمنعي اي وحدة من الدخول.
ثانيا:
انا لاحظت هذي العناوين حتى في قسم العناية بالبشرة او قسم المكياج والعطور يعني مثلا (عطور للمتزوجات فقط او مكياج للمتزوجات فقط(بس للامانة هذا العنوان قراته في منتدى ثاني) طيب يعني احنا البنات ما لنا حق نتعطر او نتجمل او نهتم بانفسنا والا كل هذي الاشياء ما انوجدت الا لسواد عيون ال(والله كرهت حتى اقول اسمه) يعني كان الدنيا ما انخلقت باللي فيها الا علشانه اا والله ان رضي رضي وان ما رضي بالطقاق عمرينه ما يرضى
انا بصراحة اول مرة اكتب مثل هذا الكلام بس من كثر ما كتمت احس نفسي بانفجر يعني اول مرة قلنا يالله اوكي ما فيها شيء ثاني مرة هم ما عليه ثالث مرة بلعناها رابع مرة بلعنا فوقها هواء خامس مرة شربنا فوقها مويه الحين لا المويه ولا الهواء ينفع وادري ان ممكن بعض الاخوات لما يقراون الكلام يقولون وحدة معقدة وغيرانة وحاقدة على الناس وعلى نفسها ..لا ابدا ولا عاد يهمني والله من كثر ما شفت وسمعت الكلام اللي ما يرحم بس عن جد يعني اتمنى من الاخوات مراعاة المشاعر طيب انتي تزوجتي واستقريتي وجاك عيال غيرك انحرم من الاستقرار ومن العيال لازم تذكرينها كل دقيقة وكل ساعة وتحسسينها انها ناقصة عنك وانك احسن وافضل منها وانا اتوقع ان فيه هنا قسم خاص بالاسرة والحياة الزوجية ما تحسين انه احسن قسم لمثل المواضيع على الاقل لاني ما ادخل هذي الاقسام الكثير من امثالي ماراح يحشرون انفسهم في مثل هذي الاقسام.. والا الافضل نقطع النت والمنتديات مرة وحدة وهذا الافضل برايكم؟؟
والله احس اني تعبت مو من الكتابة لا من هذي الدنيا
وفي الاخير انا طبعا اعتذر للكل عن كلامي الجارح والاكيد انا ما قصدت اي وحدة بعينها بس انا من جد محتاجة افضفض واطلع كل اللي عندي لاني اذا ما تكلمت.... ومرة ثانية ان شاء الله يكون آخر رد لي هنا
وشكرا<<<<<<قوية عين بصحيح تهزأ وبعدين تشكر لرحابة الصدر وحسن الاستماع....دنيا عجيبة