صباحكم رضا ورحمة ومغفرة وتفاؤل
وحشتونى وزعلتونى مش منكم طبعا ..
ونفسى آجى لكم نفراية نفراية وأطبطب عليكم واقول لكل واحدة فضفضى يا حبيبتى فضفضى يا قلبى"كنت بشوف افلام ابيض واسود" ...كلنا بتعدى علينا اوقات زى دى ولازم نتعلم نخرج منها بسرعة
فيه فلاشات كده فى حياتنا بتنور من وقت للتانى ويا ريت نحاول نحتفظ بيها
بالنسبة لى آخر فلاش مستمعة جدا بالتفكير فيه ويمكن ضحكنى جدا وأنا بقراه وبعدين همنى...من الهم، وبعدين ابتسمت تانى
كانوا تعليق ماما زوزو وعروس على موضوع الأخرى فى حياة الرجل
بس عشان ما ابقاش بانط من حاجة لحاجة ..هارجع تانى للموضوع ده بعد شوية
مالكم يا بنوتات ؟؟؟؟؟ أنا يمكن مش هاتكلم زى ماما زوزو ولا عروس ولا كمان أم سوسو ربنا يفتح عليهم ويرزقهم المزيد من رجاحة العقل..هاتكلم ببساطة شوية
لازم كل واحدة يبقى لها ركن وردى سعيد ف حياتها تلجأ له ..ركن خاص بيها هى اللليدر فيه ..
من شهرين تقريبا راسلت مامتنا حبيبتنا بجد...ماما زوزو ..والله يا امى انا بحبك ف الله
كنت فى حالة خوف وترقب من شئ معين بيجد فى حياتى..وازعجتها برسالة طوييييييييييييييييييييلة 20كم كده
وحكيت وفضفضت وقلت اللى جوايا
وكان ردها مختصر ومفيد ...عيشى حياتك..اتبسطى..ما تشيليش هم حاجة محدش غيرك بيفكر فيها
لما بارجع للرسالة دلوقتى اللى أنا كتبتها..بالاقيها مليانة شحنات سلبية..خوف وترقب لشئ أنا نفسى مش عارفاه ولا قادرة احدده "مش الجواز التانى والله"
تعرفوا ايه كمان
افتكرت نفسى من كام سنة ...كا م.... كام..طيب هاقول هم 10 سنين جواز هيكملوا السنة دى...وعندى32 يا ام مريم..نحن السابقون
فين اللى بيسعدنى فى حياتى ولا يرتبط بكونى مدام فلان؟ فين نشاطاتى الاجتماعية ليه قلت قوى........... فين حتى ثقتى فى نفسى وارادتى اللى كانوا بيضربوا بيها المثل ..الماستر بتاعتى اللى قطعتها غصب عنى للسفر مع زوجى كل ده ليه انا ناسياه ومركزة على نقطة واحدة او نقطتين وشاغلة نفسى بيهم؟ يمكن سبحان الله علاقتى بربنا هى الشئ الثابت لانى باحاول ما اقطعش عادة او عبادة تقربنى له اكتر...وده مثل حى على ان اللى بتقرر انه يدوم فى حياتنا بيدوم..بالعمل طبعا مش بالامانى..عشان كده ما صدقت لقيتكم ومسكت فيكم......باعمل 1/4 اللى كنت باعمله قبل كده..والباقى مع ابنى واخته وزوجى..ولسه فيه وقت لكن يمكن باقضيه بشكل احب انه يختلف ويكون ف اتجاه ايجابى اكتر
أنا ليه اتكلمت عن الكام حاجة دول...لانهم كانوا من أسباب سعادتى قبل دخولى قفص الزوجية ...كل واحدة بتقرا..فاكرة حاجات تانية كانت بتبسطك؟..فينها من يومك او اسبوعك او حتى شهرك؟...ليه بنربط السعادة دايما بالزوج...يا رب ما يتفهمش كلامى غلط. رينا يرزق كل من تقرأ الهنا والسعادة مع زوجها ..اللهم رد الينا جميعا يا رب أزواجنا ردا جميلا .اللى اقصده لازم يكون لنا واحة نجرى عليها فى اوقات العصبية والزعل ويمكن لما بنعد ناخد big picture للموضوع اللى مضايقنا هنعيد تفكير ونلاقى الحلول اسرع..
السنين دى علمتنى ايه...فيما يخص الزوووووووووج...واللى هاقوله مش شرط يكون خاص بيا...كل كابلز بيعانوا من نفس المشاكل تقريبا لكن ردود الافعال بتختلف حسب الشخصيات..
الرجل بطبيعته........ما بيحبش الكلام الكتير..( مع مراته)

مش عشان هى وحشة، ولا عشان مش حاسس بيها،ولا عشان مش بيحبها...ببساطة لان ربنا خلقه كده..بالطبيعة دى.."اللى جوزها مختلف تقعد ساكتة كده عشان ما تاخدلهاش عين..ههههههههههههههههه"
ملهمش تقل على النكد والحزن..بجد ..ربنا رزقنا نحن النسوووووة بنعمة الدموع ..الحكاية دى عندهم صعبة وبنفس الصعوبة بيكون قدرته على التفاعل مع اللى قدامه والاحساس بنفس اللى بيحسه
طبعا فى فترات الخطوبة الامر بيختلف..هو بيسايس وبيستحمل عشان فيه حاجة جمييييلة ولسه بعيدة شوية ومترقبها هو عايزها منك
مش وضع طبيعى ..انه يفضل يعامل مراته زى ايام الخطوبة لانها ومعلش ما تتصدموش " بقت عنده خلاااااااص"،،،،،،،زى ما بيقولوا صاحب الفستان لا يشتريه

زوجه مصريه

ماشاء الله بجد ماشاء الله كلام مقنع جدا

هى المشكله معامله الزوج فى الخطوبه


والصدمه فى الجواز طبعا

بس كمان هو مفروض شويه يحس كمان ربنا يهديهم علينا يارب

اهلا يا سكر
ده نورك يا قمر
انا مصريه مغتربه في الرياض ومعايا ولدين
بالنسبه للريجيم حاليا مفيش:D

اهلا يا عطر الشموع حاضر هحكيلك ولو اني اليومين دول مش ملتزمه

هاكمل فلسفة..
بلقيس يا ميرو...
د.ناعمة...مسكت الخيط الصح بجد عند معظم الزوجات العربيات... لما رحت قريت المواضيع اللى هناك وبالذات اللى هى كاتباها ، لقيت ان ده اللى بتعمله بالضبط..بتخلى كل زوجة تحس قوى بنفسها بقيمتها كفرد...بتوصل معاها لاسباب ممكن تخليها سعيدة كفرد الاول...وبالتالى سعادتها وثقتها بنفسها هتنعكس على حياتها..طبعا حلولها ساعات بتقى اوفر شوية -دى وجهة نظرى المتواضعة جدا-ومناسبة اكتر للبيئة الخليجية وعاداتها..لكن الخط الأساسى هو ده
موضوع "هذه قصتى" للدكتورة رحمة فيه يمكن اختصار لكل ده ..
وهارجع اقول برضه زى كل اللى قالوا
استغروا
ادعوا
قربوا اكتر لربنا ..
أنا ما بحبش اقول حاجات خاصة..لكن بجد الاستغفار لسه قريب جدا كان سبب لفك كرب عندى