نيجى بقه للمشكله بتاعة اليومين دول

انا قبل كده حكيت لكم باختصار كده عن تصرفات حماتى معايا وللى مش واخده بالها هى تعبانى يعنى بجد بطريقه مش طبيعيه

المهم هى جوزت كل ولادها الفتره الى فاتت دى وبقت عايشه لوحدها لكنها صحتها تمام ومش بتشتكى من اى حاجه

بس حضرتها مش عايزه تقعد لوحدها فقررت انها تقعد عند سلفتى شويه وعندى شويه

طبعا انا زوجى مش هنا وصعب اوى اتحمل تصرفاتها معايا دا غير انى اصلا تعبانه من الحمل وكمان نفسيتى تعبانه جدااااااااااا للاسباب الى قلت لكم عليها فمش ناقصه حد يقعد يحرق فى دمى طول الوقت

يوم الجمعه بصيت لقيتها جايه من الصبح وشكلها ناويه تقعد المهم قلت فى نفسى يومين ويعدو واحتسب الاجر وهتحمل واجى على نفسى

والله العظيم ربنا عالم كنت بعملها ايه مع ان انتم عارفين انى عندى انيميا ومش بقدر اعمل شغل كتير لكن كن واقفه على رجليا طول النهار عشان مقصرش معاها وهى ماشاء مش مخليه عن جهدها جهد فى التعليقات ربنا يسامحها وكل يوم من ده لغاية النهارده الصبح لقيتها قايمه الصبح بتزعق لى وتقولى انا هروح بيتى انتى دخلتى نمتى ومعبرتنيش ولا رشيتى الاوضه وسايبه النموس يبهدلنى ( انا اصلا عندى صاعق وحطاه عندها فى الوضه وكمان النموس ده بسيط لانى شقتى ع البحر على طول فالناموس اليومين دول بس ) قلت لها دا انا نمت بعد ما لقيتك نمتى وانتى قاعده وانتى عندك الصاعق المهم زعقتلى ولبست وبرده قلت عشان متعملهاش زعله قعدت اكلمها بس بجد وانا على اخرى لغاية ما مشت وقبل ما تمشى بقه بتقول لايمان اجيب لك ايه وانا جايه ...........

طبعا ده معناه انها نوت تيجى عندى شويه وعند سلفتى شويه بجد انا هتجنن ومش عارفه اعمل ايه

ده طبعا غير المواقف الكتيره الى حصلت فى اليومين دول مفيش داعى لذكرها والاصعب من ده انها من ساعة ما تصحى من النوم فاتحه التليفزيون ع المسلسلات لغاية ماتنام والله بدون مبالغه حتى ايمان بنتى تيجى تجيب كرتون تقوم هى قالبه وتشوف المسلسل والاعاده بتاعته تانى وهكذا وانا اصلا مش بشغل اى حاجه من دى غير الكرتون والقنوات الدينيه وعلى كده

طبعا معرفتش اتفرج على ولا برنامج

ومن ساعة ما جت وهى يا اما نايمه يا اما بتتفرج ع التليفزيون او بتاكل مش بتقوم غير للحمام وبس ومش عاجبها

انا تعبانه اوى ومتضايقه وعايزه حل لانى مش هتحمل انها تيجى تانى بجد

اصلا انا زوجى مش هنا هتيجى تقعد معايا ازاى وكمان انا تعبانه ومش قادره ع الوضع ده وبرده مش هقدر اقول لزوجى الكلام ده عشان مش يزعل مش عارفه انا من الصبح بعيط وخلاص ومنهاره جدا زدمى محروق

حاسه انى مش عارفه اعمل حاجه خالص ومش واخده راحتى فى بيتى دا غير حرق الدم بقه والموضوع مش يوم والا اتنين دا على طول بقه

بجد ردو عليا لانى عايزه حل ضروووووووووووووووووووورى

توته البطوطه ربنا يفك كربك
وكلامك كله صح يعنى احاسيسك مش مبالغ فيها
وفعلا كل وحده تعبانه من الغربه لو عاشت بدون زوجها غربه اكبر
توته نصيحه لازم تلمى شمل اسرتك يعنى تعيشى مع زوجك
فى المكان ال هو فيه فلازم تقعدى مع زوجك وتناقشى المشكله معاه وتشوفى الانسب انتى ال تروحى له
ولا هو ال يرجع يعيش معاكو لان العيشه المقسومه دى ليها ضريبه كبيره للطرفين الزوج والزوجه
وربنا يلم شمل اسرتك ويكمل لك حملك على خير ويفك كربك

عروس يا حبيبتى شكرا على ردك السريع

بس للاسف ظروف شغل زوجى مش تسمح انه ياخدنا معاه وفى نفس الوقت مش ينفع يرجع دلوقتى انا لو عليا موافقه باى وضع اروح له او ييجى هو لكن ظروف المعيشه بجد صعبه اوى هنا ولما بقوله ارجع يقولى هنعيش ازاى ............. هو الى مقعده اننا محتاجين مثلا نعمل مشروع عشان نقدر نعيش من غير مشاكل ماديه باذن الله

ففعلا لما بيقولى كده بلاقى عنده حق لان دخله هنا مش ينفع للمعيشه خالص

وهو من يوم ما سافر بحاول انه ياخدنا معاه لكن مش نافع

والله المستعان

والف سلامه على عنيكى يا حبيبتى

أزيك يا منومن عاملة ايه و اخبار الولاد بخير ؟ظ



تسلميلى يا قمر و يسلملى كلامك الحول و ربنا يدخل السرورو على قلبك زى ما ادخلتية على قلبى يا جميل
و اتمنى من الله انى اكون نفعت اى واحدة و لو لبكلمة صغيرة تكون استفادت منها او خففت عنها او نفعتها فى شىء
" اللهم استخدمنا و لا تستبدلنا "

و بعدين حاجة مهمة استغفرى كتير يا قمره بنية ان ربنا يشفى عينك الحلوين دول ماشى :35:





معلش حبيبتى هونى على نفسك و ده حال ناس كتيرررررررررررر زيك مش انتى لوحدك

بس انا هاقولك لوجة الله كلمتين اتمنى يكونوا حد لموضوعك و لوحدتك و مشاعرك اللى الشيطان بيزينها و يكبرها

احب اقولك احمدى ربنا دائما و ابدا انها وحدة وقتية بمعنى ان ان شاء الرحمن مهما طالت المدة ربنا هيجمعك بزوجك و يرجع لحضنك و تفرحى بيه و بصحبتة و تحسى بدفء مشاعر معاه

امال الناس اللى لا قدر الله ده كله راحححححححححححح خلاص بلا رجعة هيعملوا ايه ؟؟؟؟؟؟؟؟؟؟

و هاقولك حاجة كمان جميلة بنتك و طفلك اللى لسة فى بطنك الحمد لله انهم فى المرحلة ديه مش محتاجين غير أمهم اوى يعنى البيبى اللى فى بطنك لسة جوه و بنتك اللى معاكى لسة صغيرة برده كل ماتعيط تروح تجرى عليكى و تقول ماما " لاحظى الموضوع ده " حتى لو باباها موجود جنبها و بالتالى هى مش فى مرحلة حرجة عايزة فيها الأب

طيب لو هى دلوقتى مراهقة و بتمر بتخبط نفسى فظيع زى المراهقين و الموضوع محتاج تدخل الأب و حزمه و شدته يبقى كنا هانقول ايه

و بعدين فكرى فى حاجة جميلة كمان ان جوزك دلوقتى بعيد لأى سبب و طبعا اكيد عشان يأمن مستقبلك و دايما ذكرى نفسك انه يبعد دلوقت و الولاد صغيرين أحسن ما يبعد لما يكبروا و مسئوليتهم تكبر معاهم

و فى كل الأحوال استفعرى ربنا كتير بنيه انه يصبرك على الوضع و يهونها عليكى يا قمره

ام سوسو فينك حبيبتى وحشانىىىىىىىىىىى كتير ربنا يخليكى لينا و نسمع عنك كل خير دايما

السلام عليكم ورحمة الله وبركاته
ام مريم ........ تقريبا اللاسلكي عندي باظ بيفصل كهربا معلش هكلمك ان شاء الله تاني

توته ... يا حبيبة قلبي بجد زعلت عشانك اوي انا حاسه بيكي عشان مريت بالفتره دي لما كنت في مصر وجوزي هنا الله يكون في عونك ويلم شملكم علي خير يارب ..
بصي يا جميل موضوع حماتك عايز قاعده كبيره .... معلش ممكن تسمعي كلامي بصبر شويه
حبيبتي الانسان لما بيكبر بتكبر معاه عيوبه وبيبقي مش مستحمل اي حاجه تضايقه وخلق ضيق وعايز يحس بالاهتمام دايما وطبعا اكتر حاجه يكرهها الوحده ....
يعني يا قمر الام ألي حملت وولدت ىوتعبت وربت من حقها تجني ثمار تعبها .. من حقها انها ترتاح شويه بعد ما ادت رسالتها
معلش بتيجي شويه عندك نشيلها علي العين والراس ونحتسب الاجر ولو ضايقتنا ما نتضايقش لأننا عارفين انها ست كبيره ومش لازم ناخد علي كل حاجه بتقولها وصدقيني هتلاقي ثواب ده كبير اوي في ولادتك ربنا هيكرمك علشان انتي كنتي بتكرميها
وكمان لما جوزك يعرف منها قد ايه انتي كنتي اصيله ومعدنك طيب هتزيدي غلاوه وما تعرفيش يمكن ده اختبار من عند ربنا ليكي
يمكن ثوابه هيبقي كبير اوي
حبيبتي حاولي ما تخليش الشيطان يسيطر عليكي ويضايقك منها ويكبر كل حاجه بتعملها ... معلش طنشي مره واتنين وعشره
واعتبريها امك يعني لو مامتك قالت هتيجي تقعد معاكي وضايقتك هتقولي مش عايزاها ؟؟؟؟؟؟؟؟؟؟
وكمان مش ينفع تقولي لجوزك انك عايزاها تمشي اقصي حاجه ممكن يكون عارف انها ساعات بتضايقك بس انتي بتعامليها بما يرضي الله لأنها في مقام مامتك ..
توته يا قمر وسعي صدرك وبالك علي الاخر وخلي بالك برك ليها له ثواب كبير زي برك لأمك .... وهتلاقي كل الي بتعمليه معاها دلوقتي مع ولادك وان شاء الله هيجي يوم وتقولي الحمد لله ان انا عملت كده اهو ربنا بيكافئني
ربنا يصلحلك الحال ويوفقك الي ما يحب ويرضي