فيني طبع سيء عجزت اغيره ساعدوني الله يعافيكم

السلام عليكم


اكتب لكم وانا ابكي والله متضاااايقه من نفسي فيني طبع عجزت اغيره


مشكلتي لما زوجي يقهرني بكلمه او موقف ويكون متعمد ويطنشني ويزيد في كلامه انا خلاص انفجرر واجلس ارمي عليه كلام بس ما اسبه ولا اتجاوز حدودي


يعني مثلا اقعد اقول العيشه عند اهلي احسن من هنا اصلا انت نكد في نكد اخواني احسن منك انت مو محترم انت مو معيشني صح انا طفشت منك انا ابي الفكه منك


طبعا مو دايم اكون كذا ، بالعكس اصبر كثير واسكت له كثير بس اذا زادت معي خلاص انفجر واتكلم كذا واقعد رايحه جايه عليه ارمي كلام ولما ادخل غرفتي القى نفسي في قلبي حره واقوم احطها بعيالي ويكسرون خاطري وش ذنبهم اضربهم وابوهم اللي مأذيني واقوم افتح جوالي وارسل له ع الواتس انت وانت او اتصل عليه واقول تعال ودني لأهلي


والله اني احاول امسك نفسي واترك هالعاده بس مقدر اقعد ابكي بحررررقه غصب عني والله اتعوذ من الشيطان واتوضى واصلي بس حتى وانا اصلي اجلس ابكي وما ارتاح لين ارمي عليه كلام وتقوم هوشه كبيره بيننا بعدين اهجد


اليوم حسيت اني مقهوووره منه وهو مايسمع لي قهرني وظلمني بكلامه وطلع من البيت وانا مقهوووره رحت المطبخ ورميت صحن وكسرته عشان لا اضرب عيالي


ورجعت غرفتي توضيت وصليت وانا اصلي ولدي قاعد يطلع ع ادراج الشوفنير وهو كبير يفهم قمت صفقت عشان ينزل ويطالعني ويطنش وانا خايفه لا يطيح وصفقت له مره ثانيه وثالثه ويطالعني ويعاند قمت قطعت صلاتي وشلته ضربته وصرخت عليه قعد يبكي وانا ابكي قهر من نفسي ومن شي جوا قلبي ماني عارفه ايش هو بعدها مسكت المصحف وقرأت سورة البقره كامله وهديت بعدها كم ساعه ولما رجع زوجي قام النذل يقط علي كلام انتي فيك ومافيك ورجعت ابكي بحرقه مره ثانيه


تعبت والله من هالطبع وزوجي دايم يقول اني مو متربيه مع العلم اني في غير اوقات الزعل احترمه جدا ولا اتكلم عليه ولا بنص كلمه