في شباب مو لاقين و في عنوسة ... موضوعي الأول

السلام عليكم
أسعد الله صباحكم
من فترة و أنا أتصفح المنتدى بدون تسجيل
يمكن أكثر من سنتين
كنت أستفيد منه كثير صراحة
ألقى فيها عينات رائعة أتمنى لو انها لي اخت او صديقة
واحد من اخواني تخرج قبل سنة تقريبا
و توظف وظيفة ما شا الله حلوه
قبل لا يتوظف طلب منا اننا ندور له بنت الحلال
و تعرفون هذا تخصصنا مع امي
بدينا ندور له من الاقارب طبعا أولا
لاحظنا شغلة انه اغلب قريباتنا الموجودات في الشرقية ما يناسبونه بالعمر
يعني يا اكبر منه
او اصغر منه بواجد يعني بالمتوسط
او انهم في خارج المنطقة الشرقية و اخوي ما يبغى هذا الشي لانه راح يتعب معها
و تعرفون بنات هاليومين تبي كل يومين و هي عند اهلها و هذا من حقها و كيفها
غير اذا ولدت و الا احد لها مرض و الا مناسبة و حنا عارفين هالشي
بتسير حياة صعبة
و بسير رايح جاي عالرياض
بدينا ندور له خارج العايلة
يعني في النسايب و الجيران
و سبحان الله ما ادري وين اختفن البنات
اغلبهم يا اصغر منه او اكبر
و حنا بحكم اننا ××× فحنا محدودين بها الشي و صعب اننا نغامر بعادات و طبايع مختلفة
زرنا ثلاث بيوت من فترة و لقينا البنت مسكينة تفتقد للجمال
يعني ما فيها أدنى ما يبحث عنه اخوي او حنا نبيه له
و الله ما ظلمناهم لكنه واقع
كنت احاول اقنع نفسي اذا دخلت علينا البنت لكن ما في مجال
حتى خواتي و امي بحكم اننا نروح ثلاثتنا مع بعض يقولون انها ما تصلح و الله يرزقها
في وحده قلنا انه فيها امل و البنت مو شينه رضوا اهلها انه يشوفها الشوفة الشرعية
لكن يوم شافها ما عجبته و طلعوا اهلها زيادة لاعبين علينا بعمر البنت طلعت كبره
ردينا عليهم و هو ضاق صدره المسكين انه شاف بنت الناس و ردها
اخوي له شروطه يعني ان البنت تكون محافظة مصلية عباتها عالراس
لمته انا على هالشي في البداية لكن لقيت كلمته صحيحة و اعرف اكثر من واحد و حتى لقيت في النت زيه يبون هالشي و ما احد يلومه
دخلنا الى الان يمكن عشر بيوت
غير اللي تفاصلنا معهم بالتليفون بس
بعض البنات كانوا مناسبات لكنها ما تبي تروح معه الجبيل لانها تبي تكمل دراسة و بعضهم من الجبيل بس تقول ابي اكمل دراسة الحين و ما بي عرس و هي حرة
و اكثر من وحدة امها تطري عباية الكتف و انها ما راح تغيرها اذا درت ان اخوي ملتزم
و هذا شي اخوي كلمناه عليه لكنه ما وافق
اقصد العباية
و في بنتين و هم و كيفهم يرفضون لان الولد يقولون ملتزم و يخافون يطلع متشدد مع اننا بينا لهم هالشي ما هو فيه بالعكس
لنا الحين فوق عشر شهور و حنا ندور له ما حنا لاقين
كنا قبل لا ندور له نشوف البيوت مليانه و العروس فيها بنات واجد
صرنا نحضر عروس علشانه
لاحظنا كثير بنات نلقاهم لابسين ملابس مخلعة حتى و لو قدام حريم لكن ما نرضى تكون زوجة لاخونا وحدة بهالمستوى من الحياء المعدوم
صرنا نشوف شي مختلف
يمكن خاصة اننا ما نختلط كثير بغير الاقارب اللي ما لقينا فيهم اللي تناسب اخوي
فكرنا نكلم خطابة
و كلمنا وحدة يقولون ثقة و لها معنا الحين فوق خمس شهور و ما لقينا معها اللي يناسب
احيانا احس ان المجتمع فيه مشكلة التواصل و حنا من المجتمع اكيد في المشكلة
بيوت كثير اقول لأمي ان فيها بنات ينتظرون ولد الحلال و بعضهم ملتزمات لكن طريقة الوصول للاسف مفقودة
احيانا اشوف بنات و انا في المستشفى و الا السوق او المسجد لكن استصعب اني اسالها
بنفس الوقت اللي فيه العنوسة منتشرة بنفس الوقت في شباب يدورون و مو لاقين

الله يوفق كل ام او اخت تدور لقريبها و يوفقنا واياهم
كلام في القلب حبيت اطلعه
و اسعد بمشاركاتكم و اراكم في موضوعي الاول معاكم